Tơ̆ Gia Lai, Kơdră chĕp pơgơ̆r Kuô̆k hô̆i Vương Đình Huệ hôn bơnê kơtang tơring hlôi hơdrin atŏk tơ iung mŭk drăm-tơpôl, atŏk ‘lơ̆ng jơhngơ̆m đon oei sa păng mŭk drăm ăn kon pơlei. Mă kăl, lơ̆m tơdrong oei sa joh ayŏ kơdŏ soang-tơpôl đei lơ tơdrong tơplih hơ iă, jang kiơ̆ ‘lơ̆ng rim tơdrong oei sa joh ayŏ ‘lơ̆ng rŏ kơ rim hơdrĕch hơdrung dêh char Gia Lai; atŏk ‘lơ̆ng  pơtho pơhrăm, jang pơgang. Rim tơdrong oei sa tơpôl, xut xa pơngot rơvĕt, tơjur dơnuh tơjur pă 8,11%. Akŏm chĕp pơgơ̆r rim hơnih jang, rim tơring jang kiơ̆ ‘lơ̆ng trong tơgŭm djru hơrih sa tơpôl, vei lăng năng tông ăn kon pơlei lơ̆m jơ ‘năr Têt, sơđơ̆ng ăn rim ŭnh hnam, rim bơngai jei đei chơt hiôk lơ̆m jơ ‘năr Puih mak sơng têt. ‘Nau jĭ tơdrong hơdrin tôch kơtang kăl pôk bơnê kơ dêh char.

Kơdră chĕp pơgơ̆r Kuôk hô̆i jei akhan, kơ yuơ đei ƀơm kơnê̆ đơ̆ng jĭ hơbuh Covid-19, dang ei oei đei lơ ŭnh hnam tơnap tap, kŏng nhân bơngai jang đei tơring ưh kơ măh tơdrong jang. Tơ̆ hơnăp tơdrong au, Đảng, Teh đak bơ̆n jei lăng ba kơjăp truh hăm kon pơlei kiơ̆ trong pơjing rim trong jang tơgum vă pơjing rơvơn ‘lơ̆ng hơ iă hloh. Mă kăl ‘noh Ban bĭ thư hlôi pơjing Nơ̆r athei jang kiơ̆ kơsô̆ 26 găh vei lăng năng tông Têt ăn bơngai dơnuh. “Tơgop kơtăn jing plei, jơhngơ̆m đon ‘mêm kơ đe nhen kơdih” kơ hơdrĕch hơdrung Việt Nam păng ‘nau jing tơdrong jang hơnơ̆ng, mă kăl lơ̆m khei năr lêh têt truh, Puih mak vih. Kơ yuơ Têt ‘noh kăl hloh, ưh kơ đei yă kiơ hơtŏ hăm Têt. Đĭ đăng kơdră chĕp pơgơ̆r Đảng, teh đak jei ‘meh vă đei rơvơn ‘lơ̆ng hơ iă hloh vă rim răih bơngai, rim ŭnh hnam, bu bu jei đei pơgơ̆r chơt hơ iă puih mak, sơng Têt. Nhôn hôn bơnê kơtang păng mă kăl pôk pơ ư Hơnih Đảng, khul kơdră chĕp pơgơ̆r, pơđĭ khul chinh trĭ dêh char Gia Lai mă đơ̆ng oei tơnap tap, kơƀăh kơƀôch, jĭ dêh char dơnuh, mă lei hlôi hơnơ̆ng lăng ba păng lăng kơjăp tơdrong mă au. Ĭnh athei, khul jang chinh trĭ bơ̆n hlôi lăng ba kơjăp bơih ‘noh hơnơ̆ng lăng ba kơjăp hloh dơ̆ng, atŭm hăm khul mơdro sa, dôm bơngai đei jơhngơ̆m đon ‘lơ̆ng tơgŭm djru kon pơlei păng trong kăl hlŏh ‘nŏh atŏk tơ iung choh jang sa pơm tơlĕch tĕch mơdro lơ liơ vă kon pơlei kĕ yak hloh dơnuh hin. Lăng ba hơtŏk lơ hloh dơ̆ng măt bơngai răt yua ƀao hiêm tơpôl, ƀao hiêm jang pơgang”.

Jơ ‘năr au, Kơdră chĕp pơgơ̆r Kuô̆k hô̆i Vương Đình Huệ hăm Khul bơ̆ jang hlôi pôk ăn 400 tơnô̆ tơmam drăm ăn rim unh hnam đei iŏk yua ăn teh đak, kang ƀô̆, ƀô̆ đô̆i kŏng ang, ŭnh hnam dơnuh, bơngai jo jăn đơ̆ng ƀrơ̆m phao pơgang pơm ăn, kŏng nhân bơngai jang ŭnh hnam tơnap tap lơ̆m dêh char; chă hơvơn tơgŭm djru pôk ăn 200 pơbŭng hnam tơgoăt tơgoăl, kơjă kơjên 10 ti hlak jên ăn Mặt trận Tổ quốc dêh char Gia Lai. Jei lơ̆m ‘măng năm tơmang păng bơ̆ jang tơ̆ dêh char Gia Lai, Kơdră chĕp pơgơ̆r Kuô̆k hô̆i Vương Đình Huệ hlôi vang năm Hơnih mong jên Mơdro sa Việt Nam (Vietinbank) pôk ăn 10 ti hlak jên ăn dêh char Gia Lai vă ming man hơnih bơ̆ jang Kŏng ang tơring sơlam teh đak.

Jei lơ̆m ‘măng năm bơ̆ jang tơ̆ tơring Tây Nguyên, Kơdră chĕp pơgơ̆r Kuô̆k hô̆i Vương Đình Huệ hlôi pơjao ăn ƀok Bùi Văn Cường, Tổng thư ký, Kơdră Hơnih bơ̆ jang Kuô̆k hô̆i, pơtruh 300 tơnô̆ tơmam drăm Têt ăn dêh char Dak Lăk. Kiơ̆ Nơ̆r athei jang kiơ̆ đơ̆ng Ban Bí thư Trung ương Đảng păng jang kiơ̆ trong pơjao jang đơ̆ng Hơnih tơm Chinh trĭ, Kơdră chĕp pơgơ̆r Kuô̆k hô̆i hlôi năm ngôi pôk tơmam drăm păng hmach Têt tơ̆ 3 dêh char ‘noh: Bạc Liêu, Gia Lai, Yên Bái. Mă lei, hăm jơhngơ̆m đon ‘mêm kơ eng đơ̆ng kơdih, Kơdră chĕp pơgơ̆r Kuô̆k hôi hlôi chă hơvơn dơ̆ng tơmam drăm vă pôk ăn rim ŭnh hnam đei iok yua ăn teh đak, kon kông tơnap tap tơ̆ mĭnh ƀar tơring. Hơdrô̆ tơ̆ dêh char Dak Lăk, Kơdră chĕp pơgơ̆r Kuô̆k hô̆i pơtruh ăn 300 tơnô̆ tơmam drăm (minh tơnô̆ kơjă 1 triu 300.000 hlak jên) gơnang kơdră chĕp pơgơ̆r dêh char năm pôk ăn kon pơlei ƀlep lơ̆m Puih mak Giáp Thìn 2024 jê̆ truh. Kơdră chĕp pơgơ̆r Kuô̆k hô̆i Vương Đình Huệ pơtruh nơ̆r apĭnh jet gia pơma dơnuh ‘lơ̆ng hơ iă hloh truh hăm Khul Đảng, Khul kơdră chĕp pơgơ̆r, kon pơlei rim hơdrĕch hơdtjng oei tơ̆ dêh char Dak Lăk ƀlep lơ̆m khei ‘năr blŭng puih mak sơnăm ‘nao. Ƀok Bùi Văn Cường tơbăt:“Ƀok Vương Đình Huệ, Kơdră jang lơ̆m Hơnih tơm Chinh trĭ, Kơdră chĕp pơgơ̆r Kuô̆k hô̆i pơjao ăn kơ ĭnh păng pơtruh nơ̆r apĭnh jet gia pơma dơnuh ‘lơ̆ng hơ iă hloh truh hăm Khul Đảng, Khul kơdră chĕp pơgơ̆r, kon pơlei rim hơdrĕch hơdtjng oei tơ̆ dêh char Dak Lăk. Hmach sơnăm ‘nao pran jăng grăng akau, hơnŭk hơnoa păng jơnei keh kong. Hơvơ̆h hơvơi hơpơi ăn dêh char hơ̆ng đei hơyak atŏk tơ iung mŭk drăm-tơpôl, sơđơ̆ng dơ̆ng kơjăp tơring, tơ iung pơjing đảng, tơ iung pơjing khul jang chinh trĭ iŏk đei jơnei tih tên”

Kiơ̆ đơ̆ng ƀok Nguyễn Đình Trung, Kơdră jang lơ̆m Trung ương Đảng, Bí thư Đảng dêh char Dak Lăk: Têt sơnăm au, dêh char Dak Lăk hlôi chă hơvơn đei hloh 80 ti hlak jên vă jang kiơ̆ tơdrong jang vei lăng năng tông Têt ăn ŭnh hnam đei iŏk yua ăn teh đak, kon pơlei hơrih sa tơnap tap. Lơ̆m dôm khei năr au ki, rim khul bơ̆ jang kơ dêh char jei hlôi năm truh tơ̆ tơring atăih yăih vă pôk ăn tơmam drăm Têt hăm hơpơi ‘meh vă ưh kơ lê̆ bơngai bu pơngot, ưh kơ lê̆ bơngai bu hơchăng hŭt tơ̆ rŏng.