Kơdră chĕp pơgơ̆r Teh đak Võ Văn Thưởng vang năm, iung pơma tơ̆ ‘măng pơgơ̆r. Tơdrong pơgơ̆r Têt chơt hơ iă-Puih mak hôn bơnê hlôi pơgơ̆r lơ̆m jơ ‘năr Têt Nguyên đán rim sơnăm, kơ yuơ Kŏng đoàn rim hơnih pơgơ̆r, vă pơjing đei jơ ‘năr chơt hơ iă ‘nă hal ăn rim bơngai kŏng đoàn păng bơngai jang ƀlep lơ̆m sơnăm ‘nao, mă kăl dôm bơngai tơnap tap, ưh kơ đei rơvơn vă brŏk sa têt hăm ŭnh hnam.

Iung pơma tơ pơgơ̆r, Kơdră chĕp pơgơ̆r teh đak Võ Văn Thưởng pơma hơdăh, pơlei tơm Hồ Chí Minh ‘noh pơjing đei lơ trong jang pơyua ăn hơrih sa tơpôl ‘lơ̆ng hơ iă, tơgop kơtang vei lăng năng tông ăn bơngai dơnuh, bơngai tơnap tap, ŭnh hnam đei iŏk yua ăn teh đak, ưh khan lăp hơdrô̆ lơ̆m Pơlei tơm mă lei pơđĭ lơ̆m tơring păng lơ̆m teh đak. Mă lei, Kơdră chĕp pơgơ̆r Teh đak akhan, sơnăm 2023 đei lơ hơnih mơdro sa tơƀơ̆p tơnap tap, kon jên hơpăh khei ‘năr têt tŏ sĕt, pơm kơnê̆ truh tơdrong vei lăng năng tông têt ăn kŏng nhân, bơngai jang. Lơ̆m khei ‘năr au, hăm tơdrong iung jang đơ̆ng MTTQ Việt Nam, Jơnŭm vei lăng Tơdrong jang Việt Nam păng rim khul jang anai, Tơdrong pơgơ̆r Têt chơt hơ iă-Puih mak pôk bơnê hlôi tơgop gĭt kăl ăn vei lăng năng tông Têt ăn kŏng nhân, bơngai jang hơrih sa tơnap tap vă bu bu jei đei sơng Têt ngăl.