Vang Hop akŏm đei 500 ‘nu kơdră tang măt ‘noh rim kơdră jang lơ̆m Hơnih chĕp pơgơ̆r, Khul Thư ký, Kơdră Khul Joăt jang  Trung ương, hơnih jang kơ Hơnih chĕp pơgơ̆r 35, Khul kơdră đảng, Đảng đoàn, Đảng ủy găh Trung ương; kơdră tang măt Hơnih chĕp pơgơ̆r 35 rim Hơnih Đảng dêh char, pơlei tơm găh Trung ương...

Hăm hơnăp jang kơtang, tơpăt, Hop akŏm hlôi ‘măn lơ jơ ‘năr mơ̆ng rim kơdră tang măt chă pơma dơnuh, hơlen hơdăh găh tơdrong đei pơma truh lơ̆m Hla bơar chih tơbăt bơ̆ jang pơtôch 5 sơnăm jang kiơ̆ Tơdrong tơchơ̆t kơsô̆ 35-NQ/TW, akŏm lăng hơlen kơtang păng hơdăh dôm tơdrong hlôi iŏk đei, tơdrong jang tim mă ‘lơ̆ng, tơdrong tơnap tap, tơhlăk tơhlĭn, tơƀôh hơdăh dôm tơdrong tơm pơm ăn, đơ̆ng noh tơlĕch lơ trong jang vă pơm hơtŏk bơ̆ jang ‘lơ̆ng lơ̆m jăl jang kơnh. Lơ kơdră tang măt hlôi tơbăt lơ tơdrong jang hơ iă, trong tơchăr, trong jang ‘lơ̆ng lơ̆m bơ̆ jang vei lăng jơhngơ̆m đon kơ Đảng; hơdrin iung tơjră nơ̆r pơma pơdăr, tang găn, xek tơlang dôm kơtơ̆ng ang kơnê̆, đon tơchĕng kơnê̆, pơm tơhlĕk au to...

Iung pơma pơrô̆ Hop akŏm, Kơdră chĕp pơgơ̆r Teh đak Võ Văn Thưởng hơlen, đơ̆ng rŏng 5 sơnăm tơlĕch jang kiơ̆ Tơdrong tơchơ̆t kơsô̆ 35-NQ/TW, jơhngơ̆m đon hlôh vao rim kơdră đảng, Hơnih jang Đảng, kang ƀô̆, đang viên găh hơnăp jang, hơnih dơ̆ng, tơdrong kăl lơ̆m vei lăng năng tông jơhngơ̆m đon Đảng, iung tơjră phă pơrăm nơ̆r hơlĕnh pơdăr đei tơplih hơdăh, ‘lơ̆ng hơ iă; jang đei jơhngơ̆m pran kơ pơ đĭ khul chinh trĭ, tơdrong vang iung jang đơ̆ng rim kơdră đảng, hơnih jang Đảng, MTTQ, rim khul chinh trĭ tơpôl păng pơjing đei jơhngơ̆m pran kơtang, pơjing đei kon pơlei lui kiơ̆ kơjăp lơ̆m vei lăng năng tông jơhngơ̆m đon bơ̆ jang kơ Đảng.

Bơ̆ jang tơbăt kơtơ̆ng ang, pơrô̆ pơrôp đei lơ trong tơplih ‘nao hơ iă găh pơđĭ trong jang, trong pơgơ̆r, jang kiơ̆ ‘lơ̆ng hơnăp jang tơbăt hơdăh kơtơ̆ng ang trŏ lăp đơ̆ng rim hơnih chih kơtơ̆ng ang, mă kăl ‘noh lơ̆m internet păng mạng tơpôl, lang să tơtom trong bơ̆ jang đơ̆ng Đảng, đơ̆ng Teh đak, dôm kơtơ̆ng ang hơ iă, dôm tơdrong iŏk đei jơnei kơ ‘măng Tơplih ‘nao Teh đak lơ̆m rim tơring tơrang; pơrô̆ pơrôp tơƀôh tơbăt dôm trong jang hơ iă, dôm bơngai ‘lơ̆ng tơdrong jang hơ iă truh hăm kơdrơ̆m kang ƀô̆, đang viên păng kon pơlei. Dôm tơdrong iŏk đei jơnei 5 sơnăm tơlĕch jang kiơ̆ Tơdrong Tơchơ̆t kơsô̆ 35-NQ/TW hlôi tơgop git kăl vei kơjăp iăp kơtang sơđơ̆ng chinh trĭ, sơđơ̆ng dơ̆ng kơjăp tơpôl, hơmet pơ ‘lơ̆ng jơhngơ̆m đon lui kiơ̆ kơ jăp đơ̆ng kon pơlei hăm Đảng, Teh đak.

Kơdră chĕp pơgơ̆r Teh đak athei rim hơnih Đảng hơnơ̆ng tơlĕch jang kiơ̆ kơjăp hloh dơ̆ng tơdrong jang vei lăng năng tông jơhngơ̆m đon Đảng, iung tơjră phă pơrăm nơ̆r hơlĕnh pơdăr, pơm tơblĕk đơ̆ng ayăt, mă kăl lơ̆m chăl hrei au; sơkơ̆t hơdăh hơnăp jang bơngai chĕp kơ̆l păng rim kang ƀô̆, đảng viên lơ̆m jang kiơ̆ bơ̆ jang au. Atŭm hăm ‘noh, iung jang kơtang hơnăp jang kơ rim hơnih bơ̆ jang lơ̆m vei lăng năng tông jơhngơ̆m đon Đảng; pơm hơtŏk iŏk đei jơnei kơtơ̆ng ang, pơrô̆ pơrôp, lang să kơtơ̆ng ang ‘lơ̆ng; iung tơjră kơtang dôm nơ̆r hơlĕnh pơdăr, pơm tơblĕk au to.

Tơ̆ Hop akŏm, rim kơdră tang măt hlôi vang năm lăng hơnih pơdă tơmam drăm chă tơchĕng hơlen khoa hŏk, kơsơ̆p hla bơar kăl, hla bơar chih tơbăt bơ̆ jang hop akŏm khoa hŏk, tơmam drăm khoa học - kmăi kmŏk tơgŭm ăn bơ̆ jang vei lăng năng tông jơhngơ̆m đon kơ Đảng; chă lăng phim tư liệu găh pơtôch 5 sơnăm tơlĕch jang kiơ̆ Tơdrong tơchơ̆t 35-NQ/TW đơ̆ng Hơnih tơm Chinh trĭ jăl XII. 

Hơnih chĕp pơgơ̆r 35 Trung ương jei pôk ăn Hla bơar hôn bơnê ăn rim tơpôl, rim bơngai jang ‘lơ̆ng lơ̆m prăt 5 sơnăm tơlĕch jang kiơ̆ vei lăng năng tông jơhngơ̆m đon kơ Đảng, iung tơjră phă pơrăm rim nơ̆r hơlĕnh pơdăr, pơm tơblĕk au to.