Iung pơma tơ̆ jơ tơƀơ̆p, tang măt ăn kơdră chĕp pơgơ̆r Đảng, Teh đak, Kơdră chĕp pơgơ̆r teh đak Tô Lâm pơtruh nơ̆r apĭnh jet gia pơma dơnuh ‘lơ̆ng hơ iă hloh đơ̆ng Tổng Bí thư Nguyễn Phú Trọng ăn rim  kơdră hơdruh tơdăm năm iung jang sơ̆, đĭ đăng rim bơngai lơ̆m khul lơ̆m teh đak ling lang chơt hơ iă ‘nă hal, pran jăng grăng akou, hơrih sa hơnŭk hơnoa, hơnơ̆ng lang să pran kơtang jơhngơ̆m đon “hơdruh tơdăm năm jang sơ̆” lơ̆m bơ̆ jang tơ iung pơjing Teh đak Việt Nam ‘mêm kơ eng.

Hrei ou lơ̆m teh đak đei hloh 650.000 ‘nu hơdruh tơdăm năm jang sơ̆ hlôi vang iung tơblăh kơ yuơ tơdrong pơm tơm kơdih hơdrĕch hơdrung. Khei năr ou ki, Khul hlôi pơgơ̆r lơ tơdrong jang hơ iă tơgŭm djru rim hơdruh tơdăm năm jang sơ̆. Lơ̆m ou hlôi pơrô̆ hơvơn rim bơngai lơ̆m khul păng tơpôl pôk ăn hloh 1.000 pơbŭng hnam ‘mêm mơnat, ming hơmet 509 pơbŭng hnam; pơrô̆ hơvơn pôk ăn tơmam drăm păng rim tơmam drăm anai nhen hla bơar mong jên, tang vang, phe ƀa, hơbĕn ao, tơmam hŏk pơhrăm kơjă kơjên hloh 269 ti hlak jên.

Ƀlep lơ̆m jơ ‘năr hơmet ăn Pơm lêh hop akŏm Kơdră tang măt lơ̆m teh đak Khul hơdruh tơdăm Việt Nam năm jang sơ̆ ‘măng mă V, jăl jang 2024-2029, Kơdră chĕp pơgơ̆r teh đak hơpơi ‘meh vă rim bơngai lơ̆m khul chĕp răk kơjăp păng hơdrin đĭ ai pơm kiơ̆ nơ̆r pơsư̆ kơ Ƀok Hô: “Hăm dôm bơngai hlôi nuih mơng plang pham lĕch sĕch huŏng kơ dih”, Đảng, Khul kơdră Teh đak păng kon pơlei kăl tơchă trong ăn kơ đe sư đei hơnih oei sa, sŏng sa sơđơ̆ng, adoi pơ̆ih lăm pơtho tơdrong jang ăn rim bơngai vă rim bơngai gơh jang sa đei iŏk yoa kơjăp”. “Gei kơjăp nơ̆r Ƀok Hô pơtho, ƀô̆ đô̆i păng kang ƀô̆ đei pơhrăm jơhngơ̆m đon ‘lơ̆ng hơ iă nhen: Hơdrin nuih mơng, kơrŭn đĭ ai ưh kơ hli tơnap tap, đei pơhrăm iung jang tơpôl, pơm kiơ̆ tơnăp kơ yuơ kon pơlei kơna pơma tơgop nơ̆r tơpăt păng kang ƀô̆ kĕ hŭt hloi dôm jơhngơ̆m đon kơnê̆ nhen ưh kơmơ̆ng, sa pơgơ̆m pơjĭp, pơhoach brăh brư; tơ̆ hnam trương hok ‘noh nơ̆r pơma tơ-‘ngla iung jang hloi, hơlen tơklep hăm iung jang hloi pơm ăn kang ƀô̆ đei jơhngơ̆m đon ‘lơ̆ng, jơhngơ̆m đon nuih mơng, bơ̆ jang tơpăt. Dôm tơdrong hŏk pơhrăm ‘noh mĭnh păh pơhrăm, mĭnh păh long kang ƀô̆”.

Kơdră chĕp pơgơ̆r teh đak ‘meh vă rim bơngai lơ̆m khul hlôi kơrŭn bơih ‘noh kơrŭn hloh dơ̆ng, đĭ hơdrin bơih ‘noh hơdrin kơtang hloh dơ̆ng, hăm lơ tơdrong jang ‘lơ̆ng hơ iă hloh vă hrôih xek tơlang dôm tơdrong oei tim mă ‘lơ̆ng lơ̆m bơ̆ jang hăm Khul hơdruh tơdăm năm jang sơ̆, lăng ‘noh jĭ hơnăp jang, jơhngơ̆m đon ‘mêm kơ eng dih băl, plang pham lĕch sĕch huŏng ăn tơdrong jang pơm rơngei ăn hơdrĕch hơdrung, teh đak rơngei hiôk hian, tơ iung pơjing păng vei lăng Teh đak. Kơdră chĕp pơgơ̆r teh đak Tô Lâm sơkơ̆t hơdăh:“Rim hơnih tơm, hơnih jang, mă kăl ‘noh Đoàn hơdruh tơdăm kŏng san Hồ Chí Minh hơnơ̆ng chă tơchĕng, tơlĕch jang kiơ̆ trong hơ iă jơhngơ̆m đon ‘lơ̆ng Hồ Chí Minh găh hnam trương hŏk tih kơ hơdruh tơdăm năm jang sơ̆, tơ iung pơjing khul kang ƀô̆, tơ iung pơjing jơhnơr hơdruh tơdăm Việt Nam đei jơhngơ̆m đon ‘mêm kơ eng teh đak, kơrŭn đĭ ai hưch hanh hơmanh bơnê hơdrĕch hơdrung, đei jơhngơ̆m đon ‘lơ̆ng, bơ̆ jang hơgei nuih mơng vang mơ̆t hơdoi apŭng plĕnh teh, đei jơhngơ̆m đon hơpơi ‘meh vă kơtang, pơm jŭk yŭk trong hơlou tơchăr, jang gơ̆h khoa hŏk kmăi kmŏk gơ̆h hơgei trŏ lăp hăm chăl hle, iung jang plang jơhngơ̆m đon, tơpă jing dôm bơngai hơgei ăn tơdrong jang tơ iung pơjing păng vei lăng Teh đak”.

Kơdră chĕp pơgơ̆r teh đak jei athei hơnơ̆ng hơvơn akŏm, tơgoăt tơgoăl pôm nơ̆r ƀơ̆r đon tơ iung pơjing Khul păng khul hơdruh tơdăm năm jang sơ̆ lơ̆m teh đak pran kơjăp iăp kơtang; vang iung jang kơtang, jơnei lơ̆m tơplih ‘nao, tơ iung pơjing Teh đak. Adoi lăng kơjăp ƀôh, tơ iung pơjing, hơmet ming rim hơnih gru gra gĭt kăl dăr sơnăm găh hơdruh tơdăm năm jang sơ̆, tơpă jing “Hơnih gơnang” pơtho tơbăt joăt joe kĕch mang.

Hrei ou Trung ương Khul hơdruh tơdăm năm jang sơ̆ tŏk bŏk tơlĕch mĭnh ‘măng pơrô̆ hơvơn păng 2 tơdrong jang tih ‘noh đei ‘Măng pơrô̆ hơvơn “Hơdruh tơdăm năm jang sơ̆ pơm jŭk yŭk trong hơlou kiơ̆ jơhngơm đon ‘lơ̆ng, trong jang hơgei kơ Ƀok Hô; Tơdrong jang “Hơdruh tơdăm năm jang sơ̆ choh jang sa hơgei kơ yuơ jơhngơ̆m đon ‘mêm kơ eng dih băl bôl boăl”; Tơdrong jang “Kơ yuơ jơhngơ̆m đon ‘mêm kơ eng dih băl bôl boăl, rim kang ƀô̆, bơngai jang lơ̆m khul tơlĕch jang lơ tơdrong ‘lơ̆ng hloh dơ̆ng". 74 sơnăm rim jơhnơr hơdruh tơdăm năm jang hlôi plang akou, chĕp răk tơƀăk mong tơdrong joăt joe nuih mơng kơ hơdruh tơdăm năm jang sơ̆ păng rim jơhnơr Việt Nam; năm iung jang hloi rim tơdrong jang yă kiơ, yak năm jang hloi mă đơ̆ng truh tơ̆ yơ mưh Teh đak krao; hơrih kơ yuơ jơhngơ̆m đon bôl boăl ‘mêm kơ eng dih băl.