Kodră chĕp pơgơ̆r Teh đak Tô Lâm ‘nao tơƀơ̆p muh măt khul tang măt rim ƀok soi lui khop. ‘Măng tơƀơ̆p muh măt đei rim ƀok soi lui khop kơ 45 hơnih lui khop găh 16 tơdrong lui khop đei Đảng, Teh đak drơ̆ng nơ̆r.

Tơ̆ jơ tơƀơ̆p muh măt, Kơdră chĕp pơgơ̆r Teh đak Tô Lâm hlôi pơtruh nơ̆r apĭnh jet gia pơma dơnuh ‘lơ̆ng hơ iă hloh hăm đĭ đăng kon pơlei lui khop lơ̆m teh đak đơ̆ng Tổng Bí thư Nguyễn Phú Trọng. Adoi hơvơh hơvơi hơpơi ăn rim ƀok soi lui khop ling lang pran jăng grăng hơkou, vang iung yak hơdoi hăm hơdrĕch hơdrung. Kơdră chĕp pơgơ̆r Teh đak ‘meh vă rim ƀok soi lui khop hơnơ̆ng jang ‘lơ̆ng hơnăp jang pơm gơng tơroh kloh klĕch ƀar păh Đảng, Teh đak truh hăm kon pơlei lui khop; krao hơvơn kon pơlei lui khop lơ̆m teh đak păng oei tơ̆ teh đak đe tơgoăt tơgoăl kơjăp hăm kon pơlei lơ̆m teh đak hơdrin jang kiơ̆ ‘măng hơvơn pơting dih băl ‘mêm kơ eng teh đak, atŏk tơ iung mŭk drăm-tơpôl, sơđơ̆ng teh đak, sơđơ̆ng pơlei pơla, jang tơbôl; pơm jŭk yŭk trong hơlou jang kiơ̆ kơjăp trong bơ̆ jang đơ̆ng Đảng păng Khôi luơ̆t Teh đak; jang kiơ̆ ‘lơ̆ng hơnăp jang, sơnong jang kơ mĭnh ‘nu kon pơlei, pơm kiơ̆ ‘lơ̆ng tơdrong lui khop ‘lơ̆ng tơklep kơjăp hăm hơdrĕch hơdrung.