Pơma pơtôch jơ bơ̆ jang, Kơdră chĕp pơgơ̆r Teh đak Võ Văn Thưởng pơma hơdăh: Bơ̆ jang xek tơlang hô sơ tơdrong yoch tơchơ̆t pơlôch păng jang kiơ̆ tơchơ̆t pơlôch ‘noh jing tơdrong jang tôch gĭt kăl đei ƀơm truh tơdrong lôch hơrih kơ kon bơngai, kăl đei lăng hơlen, xek tơlang păng pơgơ̆r jang kiơ̆ hăm hơnăp jang hơlen tôch brĕ, jơhngơ̆m đon băt ‘mêm mơnat, sơđơ̆ng pơm kiơ̆ khôi luơ̆t tơm teh đak păng khôi luơ̆t, sơđơ̆ng tơdrong pơm tơm kơdih kơ bơngai pơm yoch tih kiơ̆ ƀlep tơdrong tơchơ̆t.

Kơdră chĕp pơgơ̆r teh đak athei, khei năr au kơnh, rim hơnih bơ̆ jang kăl hơnơ̆ng bơ̆ jang mă tôm tong, mă tơnăp hăm tơdrong bơ̆ jang, tơdrong gơ̆h jang đơ̆ng kơdih kiơ̆ ƀlep tơdrong tơchơ̆t kơ khôi luơ̆t; hơlen hơdăh hơnăp gơ̆h jang kơ rim hơnih bơ̆ jang; atŏk kơtang iung jang hơdoi; bơ̆ jang năm dăr lăng, lăng hơlen hơnơ̆ng; jang kiơ̆ jơnei tơdrong bơ̆ jang au. Kơdră chĕp pơgơ̆r Teh đak jei athei rim hơnih bơ̆ jang kăl tơchĕng hơlen, pơchoh trong hơmet ming, tơmơ̆t dơ̆ng rim tơdrong tơchơ̆t khôi luơ̆t hrei au găh tơdrong tơchơ̆t phak pơlôch trŏ lăp hăm tơdrong yan au, tơroi tơbăt ăn kơdră kơpal lăng hơlen, tơchơ̆t ăn.