Nhen 1 ‘măng hop akŏm tơ̆ dôm ‘măng hôp kơ Kuôk hô̆i, dôm “Bơngai tang măt Kuôk hô̆i hơioh” kŭm hăm dôm “Bơngai jang lơ̆m Khŭl kơdră teh đak hơioh” hlôi đei jơ pơma dơnuh, apĭnh jet păng roi tơƀlang tơdrong jang vei lăng ăn hơioh găh: tang găn sar bar jĭ rơka, teh dong, ngơ̆r pơ brơh kơ hơ ioh; vei lăng hơioh hơdai ‘lơ̆ng hiôk, pơcheh hơgei lơ̆m hơnih mạng.

Pơma tơ̆ Jơ hop akŏm pơtih Kuôk hô̆i hơioh ‘măng mă I, Kơdră Kuôk hô̆i Vương Đình Huệ pơma hơdăh, Đảng, teh đak păng đĭ đăng tơpôl ling lang ‘măn tơdrong bơngơ̆t truh vei lăng gĭt kăl ăn hơioh. Vă hơnơ̆ng jang kiơ̆ ‘lơ̆ng hloh dơ̆ng tơdrong jang vei lăng, pơtho pơhrăm hơioh, Kơdră Kuôk hô̆i athei rim kơdră đảng, khŭl kơdră chĕp kơ̆l hơnơ̆ng jang kiơ̆ gĭt kăl trong jang đơ̆ng Đảng, trong jang tơgŭm, khôi luơ̆t đơ̆ng teh đak găh tơdrong jang vei lăng, pơtho pơhrăm hơioh. Tơdrong jang tơgŭm, khôi luơ̆t găh vei lăng, pơtho pơhrăm hơioh, găh tang găn teh dong, ngơ̆r pơ brơh, sar bar jĭ rơka tơ̆ hơioh hlôi đei tơlĕch ăn tôm, hlôi hơnhăk ăn dôm jơnei ‘lơ̆ng lơ̆m yan âu.