Tơ̆ plt Quảng Trị, Kơdră Kuô̆k hô̆i Vương Đình Huệ kŭm hăm khul jang ƀlŏk hơdơ̆r, ‘mêm bơnê kŏng tih tên đơ̆ng đe linh muih mơng, lôch tang ăn tĕh đak chu hŭt hơkâu lơ̆m tơdrong tơblăh 81 măng năr (khei 9/1972), tơblăh păng vei lăng thĭ xăh Quảng Trị. Lơ̆m tơdrong tơblăh 81 măng năr tôch krưp krĕnh dŏh sơ̆, rơbâu ‘nu linh tơblăh lơ̆m tĕh đak păng kon pơlei Quảng Trị vang iung tơ blăh tôch kơtang, chu lôch hŭt hơkâu tơ̆ groi tĕh âu.

Kơdră Kuô̆k hô̆i Vương Đình Huệ kŭm hăm khul jang sŏh plang nhang, pơyơ̆r pơkao tơ̆ Pơsat linh lôch tang tĕh đak Trường Sơn. ‘Nâu jĭ anih ƀŭ hơmet đe linh đơ̆ng jơ̆p tơring lơ̆m tĕh đak, lôch tang lơ̆m khei ‘năr tơblăh Mi dŏng tĕh đak. Đei lơ linh ƀŭ tơ̆ pơsat âu pơlei đơ̆ng tơring găh Tu. Kơdră Kuô̆k hô̆i kŭm hăm khul jang sŏh plang nhang, pơyơ̆r pơkao tơ̆ Pơsat linh lôch tang tĕh đak Trong 9, anih ƀŭ hơmet lơ linh lôch tang tĕh đak vang iung tơblăh, pơvih ăn tơdrong tơblăh tơ̆ Trong 9 păng tơ̆ tĕh đak Lào lơ̆m khei ‘năr tơblăh Mi, dŏng tĕh đak.