Tơ̆ jơ tơ ƀơ̆p pơma dơnuh, tang măt Khŭl bơngai tang măt Kuôk hô̆i pơ lei tơm Hải Phòng hlôi tơ roi tơbăt tơ̆ hơnăp bơngai tăh hla tơdrong tơm đơ̆ng ‘măng hop akŏm mă 5, Kuôk hô̆i jăl 15 vă jê̆ truh; tơdrong hơtŏk tơiung mŭk drăm- tơpôl, tơ roi tơbăt pơtôch ‘măng hop akŏm mă 4. Bơngai tăh hla Hải Phòng hlôi tơ lĕch lơ tơdrong ƀơm truh tơdrong arih sa kon pơlei lơ̆m teh đak nhen tang găn sa pơ gơ̆m pơ jĭp, brăh brư, tŭn pran tơ lĕch jên tơmơ̆t jên jang teh đak păng dôm jên tơgŭm, tơ iung ming mŭk drăm; tơgŭm mơ mat tat ăn dôm anih jang mơdro sa, hơtŏk tơiung tơmang lăng…

Tơl nơ̆r apĭnh đơ̆ng bơngai tăh hla ƀơm truh tơdrong hơmet pơ ‘lơ̆ng mơ mat tat ăn dôm anih mơdro sa găh trong tơgŭm anih mơdro sa sơđơ̆ng lơ̆m khei ‘năr hrei ‘nâu, kơdră Kuôk hô̆i Vương Đình Huệ pơma hơdăh: Khŭl kơdră Teh đak pơtruh ăn Kuôk hô̆i hơnơ̆ng tơdrong jang găh tơ jur thuê̆ kơ jă tŏk 2% nhen sơnăm sơ̆. Tơdrong tơ jur, pơ dui, pơdơh iŏk thuê̆, jên nôp hrei ‘nâu tŏk bŏk bơ̆ jang kiơ̆. Kơna jô̆ hloi dôm tơdrong găh ƀơ̆t măt păng đunh đai, ưh kơ tŭn tơdrong mơ mat tat ăn kon pơlei, anih mơdro sa.