Pơma pơih blŭng Hop akŏm, Kơdră Quốc hội Vương Đình Huệ ăn tơbăt, tơ̆ Hop akŏm âu, dôm bơngai tang măt jang kơtă lơ̆m tơgop nơ̆r ăn 08 kơ luơ̆t. Athei dôm bơngai tang măt akŏm jơhngâm tơblang hơdăh dôm tơdrong oei đei trong jang pha ra băl; Hơlen năng rim tơdrong hơgăt mă hơdăh lơ̆m rim kơluơ̆t vă gơ̆h trŏ hăm khôi luơ̆t tơm, hăm đei tơdrong tam mă drơ̆ng pôm nơ̆r, hrơ̆ch ‘lơ̆ng hăm dôm luơ̆t ‘nao tơlĕch dăh mă ưh?

Hơdai hăm ‘nŏh tơrek truh dôm tơdrong hơgăt găh apăng chih tơmât lơ̆m luơ̆t. Mă loi, athei hơlen năng hăm đei tơdrong kiơ tam mă kơjăp, vă găn pơđĭ tơdrong "xa pơjĭp, iŏk pơgâm tơdrong tơgŭm", tơmât hơdai "vă pơyoa ăn grŭp kơdih”, pơyoa ăn anih vei lăng mă tam đei set hơlen ‘lơ̆ng truh tơdrong đei yoa trŏ luơ̆t, tôch tơgăl đơ̆ng kon pơlei păng anih tĕch mơdro.