Hơnih bơ̆ jang chĕp pơgơ̆r Kuô̆k hô̆i tơchơ̆t pơgơ̆r Hop akŏm Kơdră tang măt Kuô̆k hô̆i ‘măng mă 4, jăl jang XV vă pơma dơnuh, tơgop nơ̆r găh 9 tơdrong vă pơjing Khôi luơ̆t pơtruh ăn Kuô̆k hô̆i tơ̆ ‘Măng hop akŏm mă 6.

Hop akŏm kơdră tang măt Kuô̆k hôi gô đei pơgơ̆r hop akŏm kơtă lơ̆m hơnih hop akŏm Diên Hồng, Hnam Kuô̆k hô̆i đơ̆ng năr 28 - 30/8/2023. Mă hơdăh, rim kơdră tang măt Kuô̆k hô̆i gô tơgop nơ̆r lơ̆m rim tơdrong vă pơjing Khôi luơ̆t: Khôi luơ̆t groi teh (hơmet ming); Mơdro sa teh hnam (hơmet ming); Rim hơnih jang ăn tŏk iŏk jên (hơmet ming); Hnam oei (hơmet ming); Cham char đak (hơmet ming); Viễn thông (hơmet ming); Kăn kươk kon pơlei (hơmet ming); Khul vang jang vei lăng sơđơ̆ng dơ̆ng kơjăp tơring; Vei lăng năng tông hơnih ming man sơđơ̆ng teh đak păng hơnih oei khul Ƀô̆ đô̆i. ‘nau jing trong vă pơjing Khôi luơ̆t đei mĭnh ƀar tơdrong kăl oei đei nơ̆r tơgop phara dih băl, hlôi đei Kuô̆k hô̆i ăn tơgop nơ̆r lơ̆m ‘măng hop akŏm mă 5 au ki, lơ̆m au, Kuô̆k hô̆k ăn tơgop nơ̆r ‘măng mă 2 hăm trong vă pơjing Khôi luơ̆t Groi teh (hơmet ming) păng ăn tơgop nơ̆r ‘măng mă blŭng lơ̆m 8 tơdrong vă pơjing khôi luơ̆t uơ oei.