Tơ̆ pơlei tơm Quảng Ngãi, Thượng tướng Trần Quang Phương, Kơ iĕng Kơdră chĕp pơgơ̆r Kuôk hô̆i atŭm hăm Khul Kơdră tang măt Kuô̆k hoiŏi dêh char Quảng Ngãi hlôi tơƀơ̆p pơma dơnuh hăm bơngai tăh hla ‘noh kang ƀô̆ vei lăng păng ƀok thây kô pơtho kơ Hơnih jang pơtho pơhrăm dêh char Quảng Ngãi. Tơ̆ jơ tơƀơ̆p, Khul Kơdră tang măt Kuô̆k hô̆i dêh char Quảng Ngãi hlôi tơroi tơbăt pơtôch ‘Măng hop akŏm mă 6, Kuô̆k hô̆i jăl XV păng mĭnh ƀar tơdrong jang kơ Khul kơdră tang măt Kuô̆k hô̆i dêh char.

Tơ̆ au, Kơ iĕng Kơdră chĕp pơgơ̆r Kuô̆k hô̆i Trần Quang Phương hlôi pơtruh nơ̆r hmach bơnê ăn khul kang ƀô̆ vei lăng hơnih Pơtho pơhrăm păng rim ƀok thây kô dêh char Quảng Ngãi kơ yuơ hlôi tơgop tih tên lơ̆m tơdrong jang pơtho pơhrăm. Kơ iĕng Kơdră chĕp pơgơ̆r Kuô̆k hô̆i Trần Quang Phương jei pơkă kơchăng tơdrong sar bar ma tuý, teh dong lơ̆m hnam trương ... hlôi păng tŏkj bŏk đei ƀôh lơm pơtho pơhrăm kơna Hơnih jang pơtho pơhrăm păng kơdră tơring kăl đei trong jang pơrô̆ pơrôp, pơtho tơbăt, tang găn, pơm sơđơ̆ng ăn tơdrong pơtho pơhrăm ‘lơ̆ng hơ iă:“Hrei au đe kôn mon lăng truh tơdrong hŏk găh tơdrong jang roi lơ. Mă lei ưh khan bơngai bvu jei gơ̆h jing bơngai pơtho ngăl ôh, adoi ‘nĕ kơ lê̆ tơpôl ngăl ƀok pơtho mă ưh kơ lăng truh bơngai jang. Nơ̆r pơkoĕl ƀok thây mă ƀlep kơ ƀok thây, ƀok thây kăl hơgei tơpă. Lăp hơdrô̆ bơngai hơgei mă pơtho pơjing đei bơngai hơgei, ‘nau jĭ dôm tơdrong mă bu bu jei ƀôh hơdăh, ưh kơ byơh đei 1 khul ƀok thây pơtho ưh kơ gơ̆h mă pơtho pơjing đei hŏk tro hơgei ôh”.

Tơ̆ jơ tơƀơ̆p, pơma dơnuh, rim bơngai tăh hla ‘noh dôm kang ƀô̆ vei lăng Hơnih jang pơtho pơhrăm dêh char Quảng Ngãi hlôi đei lơ nơ̆r apĭnh ƀơm truh tơdrong pơtho pơhrăm. Mă hơdăh, rim bơgai tăh hla lơ̆m Hơnih jang pơtho pơhrăm athei tơmơ̆t dơ̆ng khul đei iŏk yua sa yuơ trong tơgŭm djru lơ̆m Tơdrong tơchơ̆t 105 đơ̆ng Khul kơdră teh đak găh tơdrong tơchơ̆t trong tơgŭm atŏk tơ iung pơtho pơhrăm mâm non; kon jên sŏng sa ‘năr dơ̆ng ăn hơnih rong ‘me hơ ioh đơ̆ng 1-2 sơnăm; tơgŭm kon jên ăn kô pơtho mâm non lăm hơgrop, atŏk kơtang pơtho nơ̆r Yuăn ăn hơ ioh kon kông tơ̆ rim hnam trương…Rim ƀok thây kô apĭnh athei hrôih jang kiơ̆ tơdrong pơkăp jên khei hle ăn ƀok thây kô, sơđơ̆ng hơrih sa đơ̆ng jên khei, trŏ lăp, drơ̆ng nơ̆r hơnih jang gĭt kăl hăm tơdrong jang pơtho pơhrăm.

Lơ nơ̆r tơgop jei athei Trung ương hơnơ̆ng tơgŭm djru kon jên tơmơ̆t jang ming man, tơmam drăm tơ̆ rim hnam trương mâm non, jăl ƀar pêng, mă kăl tơ̆ rim apŭng groi kông, đơ̆ng kon jên jang Tơdrong jang tơm Teh đak păng rim kon jên đơ̆ng tơdrong jang anai kơ Trung ương vă trŏ lăp đei tôm hnam trương, tơmam drăm tơgŭm ăn pơtho păng hŏk pơhrăm. Kơ iĕng Kơdră chĕp pơgơ̆r Kuôk hô̆i tơgoăt iŏk dôm nơ̆r tơgop au; adoi tơbăt dôm tơdrong tơhlăk tơhlĭn, tim mă trŏ lăp hrei au gô hơnơ̆ng đei Kuô̆k hô̆i păng rim Hơnih tơm, hơnih bơ̆ jang Trung ương lăng ba hơmet pơ ‘lơ̆ng.

Tơ̆ jơ tơƀơ̆p pơma dơnuh hăm bơngai tăh hka Kuân 3 kơ Khul Kơdră tang măt Kuô̆k hôi pơlei tơm Hồ Chí Minh đơ̆ng rŏng ‘Măng hop akŏm mă 6, Kuôk hô̆i jăl XV, bơngai tăh hla lăng truh lơ tơdrong nhen jang kiơ̆ khul kơdră chĕp pơgơ̆r Tơring kơdrơ̆m, tang găn sa pơgơ̆m pơjĭp, tơbăt hơdăh jang sa iŏk đei kơ kang ƀô̆ ... Bơngai tăh hla Nguyễn Văn Công, phương 9, kuân 3 tơtăm tơdrong sa pơgơ̆m pơjĭp oei hơnơ̆ng kơtang. Nhen tơdrong Vạn Thịnh Phát hăm kon jên lơ truh jô̆ ưh kơ kĕ tŏk bŏk pơm găn ga ăn tơdrong atŏk tơ iung kơ teh đak. ‘Ngoăih kơ ‘noh, hrei au tơdrong sa pơgơ̆m pơjĭp tŏ sĕt đei ƀôh lơ tơring, “tơdrong yă kiơ jei hơla ăn kon jên”, “hơpăh ăn tơmam drăm”.“Hrei au tơdrong sa pơgơ̆m pơjĭp tôch kơtang. Sa pơgơ̆m pơjĭp tŏ sĕt tŏk kơtang păng gei kơjăp lơ̆m jơhngơ̆m klơm klak lơ bơngai. Kon pơlei ‘meh vă chă hơvơ̆h pơm ăn tơdrong yă kiơ jei ăp mă hơla, hơpăh ‘mơ̆i mă jang, kơna ‘nau jĭ tơdrong tŏk bŏk pơm pơrăm kơtang ăn tơpôl”.

         ‘Ngoăih kơ ‘noh, bơngai tăh hla jei apĭnh athei rim hơnih jang xek tơlang keh đang tơdrong sim rơ̆m rĕk, kơsô̆ điên thoăi pơm pơgơ̆m hơnih bơ̆ jang vă hơlĕnh pơdăr kon pơlei; ưh sơđơ̆ng dơ̆ng kơjăp, tơdrong chă chhơ̆ kư̆ kă, ‘mê̆ ‘mach, pơklep hla bơar tơbăt tơmam drăm kĕt keng ...

Tơ̆ jơ tơƀơ̆p, Kơ iĕng Kơdră chĕp pơgơ̆r Jơnum vei lăng kon pơlei kơ Pơlei tơm Hồ Chí Minh Phạm Thành Kiên tơbăt: ‘măng Hop akŏm Jơnŭm vei lăng kon pơlei kơ pơlei tơm truh au kơnh, Jơnŭm vei lăng kon pơlei kơ Pơlei tơm gô pơma dơnuh păng pơdrơ̆ng kiơ̆ lơ tơdrong kăl đei ƀơm truh tơdrong mŭk drăm-tơpôl, tơdrong tơlĕch jang kiơ̆ Tơdrong tơchơ̆t 98 găh jang pơlong năng mĭnh ƀar trong jang kăl atŏk tơ iung Pơlei tơm Hồ Chí Minh. Đei ƀơm truh tơdrong tơlĕch jang kiơ̆ Tơdrong tơchơ̆t 98, Kơdră tang măt Kuô̆k hô̆i Trần Kim Yến, Kơdră chĕp pơgơ̆r Hơnih bơ̆ jang MTTQ Việt Nam pơlei tơm HCM tơbăt dơ̆ng:“Vă tơlĕch jang păng jang kiơ̆ Tơdrong tơchơ̆t 98 ‘noh mĭnh tơdrong hơdrin tih tên đơ̆ng khul kang ƀô̆, đơ̆ng rim hơnih bơ̆ jang pơlei tơm, kơ rim kuân, apŭng, truh hloi tơdrong vang iung jang kơtang đơ̆ng rim Hơnih tơm, hơnih bơ̆ jang  Trung ương tơgop atŭm hăm pơlei tơm Hồ Chí Minh. Hăp ưh kơ lăp akhan bơ̆n tơ iung pơjing trong pơprŏ jang păng jang kiơ̆ mă lei kăl đei mĭnh Hơnih chĕp pơgơ̆r, lơ̆m au Thủ tướng pơm Kơdră chĕp pơgơ̆r Hơnih pơrô̆ jang au”.

        ‘Ngoaih tơƀlang hơdăh kơtă, mĭnh ƀar tơdrong mă bơngai tăh hla Kuân 3 pơm truh, khul Kơdră tang măt Kuô̆k hô̆i pơlei tơm HCM păng Jơnŭm vei lăng kon pơlei kơ pơlei tơm HCM jei tơgoăt iŏk mĭnh ƀar nơ̆r apĭnh athei vă pơtruh ăn rim hơnih bơ̆ jang kơpal vă xek tơlang ăn kiơ̆ ƀlep hơnăp jang.