Tang măt ăn kơdră chĕp kơ̆l Đảng, Tĕh đak, Kơdră tĕh đak Nguyễn Xuân Phúc đei nơ̆r jet gia, pơma nuh, pơtruh nơ̆r thơthou Tết ‘lơ̆ng hơ iă hlŏh hăm dôm bơngai tang măt, đe ƀok kơdră chĕp kơ̆l dang ei, kơdră chĕp kơ̆l adrol sơ̆ tơ̆ tơring Tŏk bŏk, tơring đei ƀĕnh tơdrong juăt jang kăch mang, đei lơ tơdrong tơgop tih lơ̆m tơdrong pơjing păng vei lăng tĕh đak.

Kơdră tĕh đak ăn tơbăt, sơnăm âu ki, hăm tơdrong chĕp kơ̆l pơgơ̆r đơ̆ng Đảng, đon kơchăng, jang tơnăp, vang yak hơdoi, bơ̆ jang hơdoi kơjăp đơ̆ng dôm anih jang gĭt kăl lơ̆m rim anih jang chinh trĭ, jơ̆p lơ̆m teh đak hlôi jang đei lơ tơdrong jơnei ‘lơ̆ng găh mŭk drăm, tơpôl, vei sơđơ̆ng tĕh đak păng jang tơbôl. Lơ̆m nŏh, mŭk drăm tŏk pran, iŏk đei truh 8,02%. Mŭk drăm lơ̆m tĕh đak đei vei lăng kơjăp ‘lơ̆ng, pơm lăp hăm lơ tơdrong tih. Hăm trong jang ưh đei hŭt hơchăng bu tơ̆ rŏng, tơdrong jang vei lăng sơđơ̆ng tơdrong arih xa tơpôl đei bơ̆ jang tôch ‘lơ̆ng, tơgŭm ăn bơngai iŏk đei jang păng hlŏh 68 triu ‘nu bơngai jang, hăm kơsô̆ jên hlŏh 104 rơbâu ti hlak jên.