Đơ̆ng rŏng 25 sơnăm pơjing păng bơ̆ jang, Anih mong jên hŏk ƀŏng Vừ A Dính hlôi hơpăh jên hŏk ƀŏng ăn lơ hŏk tro bơngai kon kông hŏk hơgei lơ̆m tĕh đak; lơ ŏh đei hŏk pơhrăm tôch hơlen yoa Anih mong jên pơgơ̆r, kiơ̆ đơ̆ng noh vang tơgop gĭt kăl pơm hơtŏk khul bơngai jang rơgei ăn tĕh đak. Khul jang yoa Hoàng sa păng Trường Sa ‘mêm kơ eng tơlĕch lơ tơdrong jang tôch đei yoa, akŏm jơhngâm đon, plei nuih, đon ‘mêm kơ eng đơ̆ng đĭ đăng kon pơlei lơ̆m tĕh đak vang tơgop jên, tơmam, jơhngâm jang… vă pơjing păng vei lăng Hoàng Sa păng Trường Sa kơ tĕh đak bơ̆n.

Kơdră tĕh đak Võ Văn Thưởng tơƀôh đon hơiă tơ̆ hơnăp dôm tơdrong jang đei tôch ‘lơ̆ng păng kăp gĭt đơ̆ng Anih mong jên hŏk ƀŏng Vừ A Dính păng Khul jang Yoa Hoàng Sa, Trường Sa ‘mêm kơ eng lơ̆m dôm sơnăm âu ki. Kơdră tĕh đak Võ Văn Thưởng pơma hơdăh, hơnơ̆ng vei kơjăp ‘lơ̆ng tơdrong jang đơ̆ng Anih mong jên hŏk ƀŏng Vừ A Dính, pơtrơp dôm tơdrong kăp gĭt mă Anih mong jên hlôi jang đei; hơnơ̆ng tơgŭm đei yoa ‘lơ̆ng ăn đe ŏh hŏk tro bơngai kon kông.