Hop akŏm đei pơgơ̆r kiơ̆ trong pơgơ̆r kơtă tơ̆ Hnam hôp dêh char păng pơih trư̆k tuyê̆n truh 7 anih pơih pơdăh tơ̆ apŭng păng 71 anih pơih pơdăh tơ̆ xăh. Truh hop akŏm đei 400 ‘nu kon pơlei jang chŭn mir rơgei, dơ̆ng tang ăn hlŏh 60.000 ‘nu kon pơlei jang chŭn mir păng hlŏh 400 HTX, grŭp jang hơdoi lơ̆m dêh char, tơlĕch nơ̆r apinh tơpăt hăm ƀok Hồ Văn Mười, Kơdră vei lăng kon pơlei dêh char Dak Nông găh dôm tơdrong oei tơhlăk păng pơtruh nơ̆r apinh, gô chang đơ̆ng kon pơlei jang chŭn mir lơ̆m dêh char. 

Adrol kơ ‘nŏh, kon pơlei jang chŭn mir, HTX tơ̆ dêh char Dak Nông hlôi gơih hlŏh 300 nơ̆r apinh ăn Kơdră vei lăng kon pơlei dêh char, pơma truh dôm trong jang, tơdrong tơgŭm vă hơmet pơ ‘lơ̆ng mơmat tat ăn tơdrong choh jang xa. Dôm tơdrong đei kon pơlei jang chŭn mir tơ̆ tơring tơrĕk mă lơ ‘nŏh tơdrong tơgŭm jên jang xa; tơdrong tơlĕch trong jang hơdoi ‘moi kiơ̆ trong pơm hơtŏk kơ jă tơmam jang đei.