Ƀok Tổng Thư ký Kuôk hô̆i, Kơdră Anih jang kơ Kuôk hô̆i Bùi Văn Cường ăn tơbăt: Sơnăm 2024, Anih juăt jang kơ Kuôk hô̆i akŏm hơmet păng pơgơ̆r dôm tơdrong hop akŏm kơ Kuôk hô̆i; Tơdrong chiha kŏm khôi luơ̆t; Tơdrong dăr  lăng; Hơlen tơchơ̆t dôm tơdrong kăp gĭt; Tơdrong jang tơbôl păng jang hadoi apŭng plenh teh; Tơdrong jang hơvơn kon pơlei; Pơtho tơdrong jang kơ bơngai tang măt ăn Kuôk hô̆i, Khul jang tang măt ăn Kuôk hô̆i păng vei sơđơ̆ng tơchơ̆t pơm jang kơ bơngai tang măt ăn Kuôk hô̆i; Tơlĕch tơdrong jang kơ Hô̆i đŏng kon pơlei păng pơgơ̆r Dôm tơdrong hopa kŏm kơ Anih juăt jang Kuôk hô̆i lơ̆m sơnăm 2024.

Dôm nơ̆r tơgop đei tơdrong pơdrơ̆ng hơtŏk ki luơ̆t, tơchơ̆t lơ̆m pơm kiơ̆ Tơdrong tơlĕch jang, mă kăl noh athei kơhret ki luơ̆t, tơchơ̆t, pơkăl dôm anih jang đei tơrĕk dih băl pơm kiơ̆ tơnăp dôm tơchơ̆t gah pơtruh hla bơ-ar kăl ăn ‘măng hop akŏm. Lơ̆m noh, kăl tơrĕk truh hơmet hô sơ, hla bar pơkăp ‘lơ̆ng, trŏ khei năr, vă Anih jang gah Kon kông, rim Anih jang kơ Kuôk hô̆i hơlen lăng păng dôm bơngai jang lơ̆m Anih juăt jang kơ Kuôk hô̆i gơh chă đŏk hơlen hơdah, tơgop hơtŏk pơ-‘lơ̆ng hăm ‘măng hop akŏm...

Kơdră Kuôk hô̆i Vương Đình Huệ akhan, hơmet Tơdrong tơlĕch jang sơnăm 2023 jĭ tơdrong jang hơnơ̆ng, kơyua tơdrong đei ƀôh phara băl. Mă lei, Kơdră Kuôk hô̆i drơ̆ng nơ̆r hăm dôm bơngai jang lơ̆m Anih juăt jang kơ Kuôk hô̆i jing tơdrong hơmet tơlĕch jang lơ dêh hnang, tơdrong mă âu athei băt hơdah: "Phơ phŏ rim khei, tam mă tơroi truh rim sơnăm, ril jăl jang, ah tơmơ̆t jang bơih, mă lei ah hop akŏm ‘noh sut lê̆ păng chih tơmơ̆t dơ̆ng. Tơdrong mă âu jĭ sơnong kơ dôm anih jang tơm, dôm Anih jang athei  athei băt hơdah vă pơm jang hadoi hăm rim anih jang kơ teh đak. Ning mônh kơnh vă hơlen lăng dơ̆ng kiơ̆ rim khei noh dôm yơ tơdrong jang adar păng athei tơplih kơyua anih jang yơ pơm jang. Tơjê̆ khei năr kăl noh pơtơm hơmet đang kơ noh athei hơmet tơdrong tơlĕch jang. Yơ̆ng âu ki, Kuôk hô̆i jang kơjăp gah tơdrong âu. Inh pơkăl ah sơnăm 2024 kơhret kơjăp tơdrong âu, vă sơkơ̆t hơdah sơnong jang kơ dôm bơngai jang, anih jang đei tơrĕk dih băl lê̆ đei tơdrong adar, athei jang mă kơjăp tơdrong mă âu".

Tơgop nơ̆r lơ̆m chih tơbang gah tơdrong jang hơvơn hơvơn kon pơlei đơ̆ng Kuôk hô̆i khei 10 păng khei 11 sơnăm âu, Anih juăt jang kơ Kuôk hô̆i akhan, kon pơlei tah hla tơrĕk truh ‘mi kial đak hơbông tơ̆ tơring tŏk bŏk; kơjă đak xăng đak dâu, kơjă unh hơyuh tŏk kăp; tơnap tap kơ anih jang mŭk drăm hlôi đei hơmet mă lei tơdrong hơrih kon pơlei tơ̆ tơring tơrang ƀơm lơ tơnap tap, mă kăl noh unh hnam pơm jang xa jên tŏ sĕt, dôm tơring tơnap tap... Phŏ Kơdră Kuôk hô̆i Trần Quang Phương ră hưdah, tơdrong tơlĕch jang lơ̆m khei năr tơjê̆ âu, kon pơlei pơngơ̆t kơ đon nhen tơdrong pơm glăi, lơ̆m noh đei ‘măng klĕ tơtông kơnê̆ tê̆. Tơblang hơdah gah tơdrong hiơ̆r âu, Thư̆ trương Anih tơm Kŏng an Trần Quốc Tỏ ăn tơbăt:  "Minh ƀar tơdrong klĕ tơtông lơ̆m khei năr âu ki noh đei tơpă păng kon pơlei adoi hiơ̆r kơ đon. Dôm tơdrong đei ƀôh nhôn adoi tenh kuăng dăr hơlen sơkơ̆t hơdah păng sek tơlang kơjăp, trŏ nhen tơchơ̆t tơlĕch. Chŏng mă đơ̆ng tơdrong dăr hơlen ăn ƀôh, lơ̆m khei năr tơjê̆  Têt ah hơtuch sơnăm kơ tơdrong pơm glăi tŏk lơ kiơ̆ tơdrong. Mă 2 dơ̆ng, minh ƀar bơngai giêng et ma túy, đei ƀôh "ngăo đă" adoi lơ. Mă 3, adoi đơ̆ng tơm dôm bơngai trŏ pơrăm adoi pơm ưh kơ trŏ tơchơ̆t, gah tơroi tơbăt, kơchăng jang hadoi hăm dôm anih jang vă tang găn, tơdrong âu nhôn hlôi jang atŭm hăm tơring, hăm dôm khul jang tơ̆ tơring, mă kăl noh bơngai ƀơm răm vă tơlĕch tơroi tơbăt tang găn tơnăp".

Anih juăt jang kơ Kuôk hô̆i pơtruh nơ̆r hăm Jơnŭm pơgơ̆r teh đak pơgơ̆r rim Anih jang tơm păng dôm tơring tơ̆ anăp noh dah hrôih đei trong hơmet dôm anih teh hơlih dah mă ‘nhăk unh hnam kon pơlei lĕch đơ̆ng tơring hli hlơt vă sơđơ̆ng tơdrong hơrih jang xa. Anih tơm Asong jang, Linh jĭ rơka păng Tơpôl sek tơlang, vei sơđơ̆ng tơdrong pơyua ăn dôm bơngai jang ƀơm jĭ jăn. Anih tơm Kŏng thương đei trong vei lăng tơnăp tơdrong tĕch pơdro online vă vei sơđơ̆ng tơdrong pơyua ăn bơngai răt yua. Anih tơm Kŏng an hơtŏk trong vei sơđơ̆ng tơpôl, mă kăl noh lơ̆m pơyan Têt Dương lĭch păng Têt Nguyên đan truh âu kơnh.