Kiơ̆ kơtơ̆ng ang đơ̆ng Grŭp jang Ŭnh hơyuh Việt Nam (EVN), Grŭp au hlôi đei Tơchơ̆t kơsô̆ 377 găh hơmet ming kơjă ŭnh hơyuh. Kiơ̆ kơ ‘nŏh, đơ̆ng năr 4/5/2023, kơjă ŭnh hơyuh ‘nŏh 1.920 hlak jên lơ̆m 1kWh (tim mă jô̆ truh thuê̆ kơjă).

Tơdrong hơmet au tŏk 3% pơtêng hăm kơjă ŭnh hơyuh dang ei. Hơdrol kơ ‘nŏh, năr 31/3, Hơnih tơm vei lăng Mơdro sa hlôi tơbăt hơdăh ‘măng dăr lăng kon jên jang pơm tơlĕch tĕch mơdro ŭnh hơyuh sơnăm 2021 păng 2022 kơ EVN, đei ƀôh, kơjă pơm tơlĕch tĕch mơdro ŭnh hơyuh sơnăm 2022 ‘noh 2.032 hlak jên lơ̆m 1kWh, tŏk 9% pơtêng hăm sơnăm sơ̆. Hơnih tơm vei lăng mơdro sa hlôi athei EVN jang kiơ̆ hơmet pơ ‘lơ̆ng kơjă ŭnh hơyuh kiơ̆ nơ̆r athei đơ̆ng Khul Kơdră teh đak, vă sơđơ̆ng ăn vei lăng năng tông kơjă, sơđơ̆ng chinh trĭ păng sơđơ̆ng dơ̆ng kơjăp tơpôl, đei iŏk yua pơđĭ hơnih mơdro sa păng kon pơlei.