Ƀok Điệu Út – bơngai hơdrung S’Tiêng, tơ̆ kueng Mười Mẫu, tơring xơlam teh Phước Thiện, apŭng Bù Đốp tơroi, unh hnam ƀok vih erih jang xa tơ̆ kueng Mười Mẫu vă jê̆ mơjĭt xơnăm kơ âu bơih, đei teh đak axong ăn teh, tơgŭm man hnam, noh hơ iă lơ̆m jơhngơ̆m. Xơnăm 2017, unh hnam ƀok păng kon pơlei lơ̆m kueng âu chơt hơ iă hloh, unh hơyuh teh đak hlôi đei dui truh tơ̆ tơring, tơdrong mă kon pơlei hơpơi 'moih đơ̆ng đunh xơ̆ hlôi jing tơpă.

Tơring 67 lơ̆m kueng Mười Mẫu, xăh Phước Thiện, apŭng Bù Đốp đei  200 unh hnam kon pơlei hăm kơ hrĕng măt bơngai, 95% kơsô̆ măt kon pơlei noh bơngai kon kông, lơ̆m noh mă lơ noh bơngai S’tiêng. Adrol âu ki, tơring âu đei lăng jing anih tơnap tap pơngơt rơvĕt hin dơnuh kơ tơring, kơlih tơdrong hlôh vao kơ kon pơlei oei kơđeh, anih pơm jang ưh đei 'lơ̆ng, tơring teh vih vơ̆t tơnap tap, kơsô̆ unh hnam đei hnam oei kơjăp 'lơ̆ng păng đei unh hơyuh yua noh tŏ xĕt đĕch, đe hơ-ioh ưh đei năm hŏk tơ̆ hnam trưng, prăt xơnăm   “tơdrong pơngot hin dơnuh” tơklep hăm kon pơlei. Jô̆ đơ̆ng unh hơyuh, tơdrong erih kơ kon pơlei hlôi tơplih hloh. Kon pơlei hlôi pơtăl kơmăi đôh hăm kơmăi ƀơm yua unh hơyuh, tơgŭm hiôk hian hloh, tơjur jên huach ăn tơdrong ruih đak ăn 'long pơtăm. Atŭm hăm noh, kon pơlei đei unh hơyuh tơ̆k hơdăh ăn tơdrong hŏk pơhrăm tơnăp hloh. Ưh adrô̆ đei unh hơyuh tơ̆k hơdăh, rim unh hnam oei răt đei tivi, kơtuh hơngeo, hla pơi kơdâu hăm unh hơyuh, gŏ pai por hăm unh hơyuh... gơnơm đơ̆ng noh, tơdrong erih kon pơlei đei hơtŏk hơdăh. 'Nhŏng Điểu Thâm, bơngai erih xa tơ̆ tơring 67 ăn tơbăt, kon pơlei erih tơ̆ âu đei hơdrung bơngai, nhen bơngai Stiêng, M’Nông, Mạ păng Khmer. Đơ̆ng đei unh hơyuh, lơ unh hnam pơ 'nam pơm jang hloh, tơdrong erih tơplih tenh kuăng,  Điểu Thâm chơt hơ iă tơroi: Teh đak hlôi tơlĕch jang thoi noh bơih, đang kơ noh adoi axong ăn tơdrong jang noh duh nhen đei jên khei xa hơpăh vă man pơ 'lơ̆ng hnam oei, răt tơmam drăm yua lơ̆m hnam nhen tivi, kơtuh hơngeo păng kơmăi pih hơbăn ao noh lơ unh hnam adoi đei. Dang ei hơtŏkt ơ iung, đei tơmam mă âu mă to.

Đơ̆ng anih tơm jang kơ xăh Phước Thiện tơroh truh Tơring 67 noh jăl trong kơsu tơpăt 'lơ̆ng, rim khul bơbe, rơmo hăt hot xa 'nhĕt tơ̆ hơla tơm 'long găr xơlơ̆k, kơsu 'nao pơtăm, unh hơyuh teh đak đei dui tôm tơring, lơ̆m um ai muh măt kon pơlei bang hơdăh tơdrong chơt hơ iă kơ tơdrong erih. 'Nhŏng Điểu Phúc, bơngai oei tơ̆ tơring 67 tơroi: Klo hơkăn inh oei tơ̆ âu đei 11 xơnăm bơih, adrol ki tơnap tap dêh, unh hnam đei 4 măt bơngai mă lei adrin hăt noh duh măh xŏng xa đĕch, tơ̆ âu đei 10 unh hnam noh đĭ 9 unh hnam hin dơnuh, unh hnam nai noh adoi tơjê̆ hin dơnuh. Chŏng mă, đei Đảng, Khul Kơpal teh đak tơrĕk tơgŭm, dui unh hơyuh vih tơ̆ tơring, bơngai yơ ưh đei rơmo noh đei axong ăn rơmo, ưh đei bơbe noh đei axong ăn bơbe, ưh đei hnam noh man ăn hnam, dang ei rim bơngai bu bu adoi pơ 'nam pơm jang, kon pơlei phĭ tơtŏ dơnŏ 'lơ̆ng, lui ngeh kơ Đảng, kơ Khul Kơpal teh đak.

Ƀok kră pơlei Điểu C’re, minh lơ̆m dôm bơngai đei kon pơlei lui yom tơ̆ tơring pơma dơnuh, đei axong ăn teh pơm jang kiơ̆ Tơdrong jang 134 đơ̆ng xơnăm 2005, truh xơnăm 2017 Tơring 67 đei teh đak axong dui unh hơyuh, bơ̆ trong nơnăm, hnam trưng hŏk, hnam pơgang. Dôm xơnăm tơjê̆ âu, gơnơm lơ̆m Tơdrong pơkăp jang kơ teh đak găh pơjing tơring pơxĕl 'nao păng tơjur hin dơnuh, kon pơlei tơ̆ âu pơtoi đei teh đak axong ăn hnam păng tơmam drăm pơm jang. Hăm đon pơkăp khŏm mă hơtŏk tơ iung khĭn iŏk yua tơdrong rơgei khua hŏk kih thuơ̆t lơ̆m pơm jang. Truh dang ei, tôm kueng Mười Mẫu oei pă 5 unh hnam đĕch hin dơnuh, tơjur hloh 90% pơtêng hăm dôm khei năr Tơring 67 'nao truh jang. Kon pơlei tơ̆ âu chơt hơ iă dêh.

“Đơ̆ng “4 ưh” (ưh đei: unh hơyuh, trong nơnăm, hnam trưng hŏk, đak xŏ nhă) tơ̆ Tơring 67 adrol ki, truh dang ei hlôi tŏk jing “6 đei” (đei:  unh hơyuh, trong nơnăm, hnam trưng hŏk, đak xŏ nhă). Kĕ đei tơdrong erih tŏk bŏk rim năr “tơplih hơkâu hơkar” noh gơnơm đei Đảng, Khul kơpal teh đak, đe kơdră kơpal, jơnŭm pơgơ̆r tơring tơgŭm dăp đond ăp bơnôh păng tơdrong kơ 'nôh hơtŏk tơ iung klaih đơ̆ng hin dơnuh đơ̆ng kơdih po kon pơlei.