‘Nâu kŭm jing đon pơhnŏng mă Tơdrong tơchơ̆t đơ̆ng Hop akŏm Đảng ƀô̆ dêh char ‘măng mă XVI tơlĕch. Lơ̆m dêh char Kon Tum dang ei đei hlŏh 2.200 unh hnam kon kông ưh măh, mă ưh ‘nŏh ưh đei teh oei, teh choh jang xa. Mă hơdăh, găh teh oei, oei đei 875 unh hnam, lơ̆m noh, hlŏh 330 unh hnam ưh kơmăt teh păng vă jê̆ 540 unh hnam ưh đei teh oei.

Găh teh choh jang xa oei đei hlŏh 1.300 unh hnam, lơ̆m noh, đei hlŏh 800 unh hnam ưh kơmăh teh păng hlŏh 550 unh hnam ưh đei teh choh jang xa. Ƀok Đinh Quốc Tuấn, Kơdră Anih vei lăng hơdrĕch kông dêh char Kon Tum, ăn tơbăt, dêh char bơ̆ jang lơ trong jang vă sek tơlang tơdrong ưh kơmăh teh oei, teh choh jang xa, adrin truh sơnăm 2025 đĭ đăng unh hnam kon kông đei teh oei păng teh choh jang xa ngăl.