VOV4.Bahnar - Dêh char Kon Tum đei hlŏh 50.600 ‘nu bơ ngai đei kŏng hăm kăch mang. Gơ nơm jang ‘lơ̆ng dôm tơ drong tơ gŭm đơ̆ng Đảng, tĕh đak păng đĭ đăng tơ pôl vang tơ gŭm ăn bơ ngai đei kŏng kơ na truh dang ei 99,82% unh hnam bơ ngai đei kŏng tơ̆ dêh char đei tơ drong arih xa dang ăi mă ưh ‘nŏh kơ jung ƀiơ̆ tơ drong arih xa jô̆ păh lăp kơ kon pơ lei tơ̆ tơ ring.

Tơ̆ xăh Hiếu, apŭng Kon Plông, dêh char Kon Tum, unh hnam linh jĭ jăn Đinh Lôi, tơ̆ plei Vi Ching ‘nŏh jĭ 1 anih hơ nơ̆ng iŏk đei tơ drong “tơ gŭm”. Lơ̆m dôm sơ năm âu ki, khul kơ dră tơ ring kŭm nhen dôm khul tơ pôl tơ̆ xăh Hiếu ling lang ‘măn tơ drong tơ gŭm, vei lăng linh jĭ jăn păng unh hnam sư. Kŭm hăm dôm tơ drong tơ gŭm đơ̆ng Đảng, tĕh đak vă jang atŏk tơ iung mŭk drăm, vei lăng tơ drong arih xa ăn kon pơ lei tơ̆ tơ ring mơ mat tat dêh hlŏh, unh hnam linh jĭ jăn Đinh Lôi oei hơ nơ̆ng iŏk đei tơ drong tơ gŭm, pơ tho tơ ƀôh trong jang atŏk tơ iung mŭk drăm, pơm hơ tŏk tơ drong arih xa. Lơ̆m dôm năr lêh têt, năr linh jĭ rơ ka, linh lôch tang tĕh đak 27/7… bơ ngai tang măt ăn khul kơ dră tơ ring, khul grŭp tơ pôl lơ̆m xăh hơ nơ̆ng năm ngôi, hơ păh tơ mam, pơ lung jơ hngâm linh jơ jăn păng unh hnam sư.

Linh jĭ jăn Đinh Lôi ăn tơ băt: “Kŭm gơ nơm kơ Đảng, tĕh đak tơ rĕk, đei trong tơ gŭm hăm linh jĭ jăn tôm tĕch, tôch tơ tom. Đang kơ ‘nŏh khul kơ dră pơ gơ̆r, khul grŭp tơ pôl tơ̆ xăh vang tơ gŭm hai kơ na inh kŭm hăm unh hnam gơ̆h jang tŏk mŭk drăm, tơ drong arih xa gơ̆h nhen thoi unh hnam kon pơ lei nai. Chơt hơ iă kơ na roi pran ƀiơ̆, inh oei adrin jang hăm kon sâu chă pơ tăm bơ̆n ‘long, jang chŭn hai”.

Công ty jang unh điên Kon Tum hơ păh tơ mam ăn unh hnam đei kŏng hăm kăch mang tơ̆ xăh Mường Hoong, apŭng Đăk Glei

Jĭ dêh char đei mŭk drăm, tơ pôl oei mơ mat tat, mă lei Đảng ƀô̆, khul kơ dră chĕp kơ̆l dêh char Kon Tum hơ nơ̆ng năng, tơ drong jang vei lăng năng tông linh jĭ rơ ka, linh lôch tang tĕh đak, tơ lĕch trong tơ gŭm hăm bơ ngai đei kŏng ‘nŏh jĭ tơ drong jang chinh trĭ gĭt kăl athei jang hơ nơ̆ng. Hăm jơ hngâm đon thoi nŏh, ưh lăp tơ̆ tơ ring hiôk hian đĕch mă tơ̆ tơ ring hơ tăih yăih, tơ ring mơ mat tat dêh hlŏh, tơ ring kon kông oei, tơ drong jang vei lăng, tơ gŭm ăn bơ ngai đei kŏng hăm kăch mang đei bơ̆ jang ‘lơ̆ng ngăl.

Yă Mai Thị Luận, Phŏ Kơ dră vei lăng kon pơ lei xăh Đăk Rơ Ông, apŭng Tu Mrông ăn tơ băt, lơ̆m xăh đei 56 ‘nu linh jĭ rơ ka păng unh hnam linh lôch tang tĕh đak. Tơ drong jang “Tơ gŭm ăn bơ ngai đei kŏng” đei bơ̆ jang hơ nơ̆ng hăm khul kơ dră pơ gơ̆r păng khul grŭp tơ pôl tơ̆ tơ ring: “Tơ rĕk truh tơ̆ đe yă ƀok, anih jang Đảng, Jơ nŭm pơ gơ̆r kon pơ lei, Dơ nŏ anih vei lăng kon pơ lei xăh pơ gơ̆r tơ ƀâp muh măt tơ băt Năr linh jĭ rơ ka, linh lôch tang tĕh đak. Ƀlep ƀât têt pơ gơ̆r năm ngôi hăm đe yă ƀok, đang kơ ‘nŏh năm ngôi tơ̆ unh hnam oei soi kơ kŭh kơ linh lôch tang tĕh đak. Găh noh dơ̆ng tơ̆ rim pơ lei đei pơ jao ăn đe Bí thư Chi đoàn, krao hơ vơn đe đoàn viên, druh dăm, drŏ kăn tơ gŭm năr jang nhen kŏh ‘long unh, choh ‘ngiĕt ƀum, ƀuch ‘ngiĕt ƀa, jang lơ tơ drong jang nai hai chă tơ gŭm ăn đe yă ƀok”.

Nơ̆r tơ roi đơ̆ng Anih vei lăng tơ drong jang xa, linh jĭ rơ ka păng tơ pôl dêh char Kon Tum ăn ƀôh, lơ̆m 5 sơ năm âu ki, dêh char pơ gơ̆r năm ngôi păng hơ păh vă jê̆ 99.000 tơ pu tơ mam ăn bơ ngai đei kŏng ƀât Tết Nguyên đán păng năr linh jĭ rơ ka, linh lôch tang tĕh đak 27/7 hăm kơ sô̆ jên vă jê̆ 24 ti 200 triu. Kŭm hăm ‘nŏh Anih mong jên “Tơ gŭm ăn bơ ngai đei kŏng” dêh char mong akŏm đei vă jê̆ 5 ti, tơ gop hơ met ming pơ sat linh lôch tang tĕh đak; năm ngôi ƀât jơ jăn jĭ pơ lŏ tŏ hơ kâu, tơ gŭm khăm hơ met jĭ ăn bơ ngai đei kŏng; tơ gŭm man ‘nao, pơm hơ met hlŏh 1.200 tŏ hnam ăn bơ ngai đei kŏng păng unh hnam đe sư, hăm kơ sô̆ jên hlŏh 37 ti 200 triu hlak jên. Tơ drong iŏk rong, vei lăng unh hnam đei kŏng, Mĕ Việt Nam nuih mơng hlôi đei đĭ đăng tơ pôl vang bơ̆ jang tôch ‘lơ̆ng, kiơ̆ đơ̆ng tơ drong jang “Tơ gŭm ăn bơ ngai đei kŏng”.

Dơ nŏ anih vei lăng kon pơ lei dêh char Kon Tum hơ păh Ƀăng khen ăn dôm xăh, phương, thĭ trơ̆n jang ‘lơ̆ng tơ drong tơ gŭm ăn linh jĭ rơ ka, linh lôch tang tĕh đak

Ƀok Nguyễn Thanh Tính, Phŏ Kơ dră Anih vei lăng tơ drong jang xa, linh jĭ tơ ka păng tơ pôl dêh char Kon Tum pơ ma hơ dăh: “Tơ drong tơ lĕch jang ‘lơ̆ng tơ drong tơ gŭm hăm bơ ngai đei kŏng hlôi tơ gŭm ăn bơ ngai đei kŏng đei tơ drong arih xa sơ đơ̆ng ƀiơ̆, vang tơ gop vei sơ đơ̆ng chinh trĭ, tơ pôl. Ƀơm tôch ‘lơ̆ng truh tơ drong pơ tho jơ hngâm đon ‘mêm tĕh đak, tơ drong juăt jang kăch mang lơ̆m khul kăn ƀô̆, đảng viên, bơ ngai jang kơ tĕh đak păng đĭ đăng kon pơ lei. Tơ drong arih xa găh jơ hngâm đon, tơ mam drăm kơ dôm bơ ngai đei kŏng roi đunh roi tŏk”.

Gơ nơm jang ‘lơ̆ng tơ drong tơ gŭm đơ̆ng Đảng, tĕh đak kŭm nhen đĭ đăng tơ pôl vang bơ̆ jang “Tơ gŭm ăn bơ ngai đei kŏng”, truh dang ei 99,82% unh hnam bơ ngai đei kŏng tơ̆ dêh char Kon Tum đei tơ drong arih xa dang ăi mă ưh ‘nŏh kơ jung ƀiơ̆ tơ drong arih xa jô̆ păh lăp kơ kon pơ lei tơ̆ tơ ring, tơ drong arih xa găh tơ mam drăm păng jơ hngâm đon kơ dôm bơ ngai đei kŏng hơ nơ̆ng tŏk roi ‘lơ̆ng. Nơ̆r pơ ma đơ̆ng khul kơ dră pơ gơ̆r jơ̆p tơ ring tơ̆ dêh char Kon Tum oei ăn ƀôh, đĭ đăng 102 xăh, phường, thĭ trơ̆n lơ̆m dêh char tơ tă jang ‘lơ̆ng tơ drong jang “Tơ gŭm ăn bơ ngai đei kŏng” păng Tơ drong vei lăng năng tông linh jĭ rơ ka, linh lôch tang tĕh đak kiơ̆ 6 tơ drong hơ găt đơ̆ng Anih tơm vei lăng tơ drong jang xa, linh jĭ rơ ka păng tơ pôl.     

                                                                                                                                                Khoa Điềm: Chih

Dơ̆ng: Tơ blơ̆