VOV4.Bahnar - Pơ gê 19/7, Dơ nŏ anih vei lăng kon pơ lei dêh char Kon Tum pơ gơ̆r hop akŏm pôk pơ ư bơ ngai đei kŏng rơ gei păng xăh, phường jang ‘lơ̆ng tơ drong vei lăng, tơ gŭm ăn linh jĭ rơ ka, linh lôch tang tĕh đak. Vang truh akŏm đei 101 ‘nu bơ ngai đei kŏng rơ gei păng bơ ngai tang măt ăn dôm xăh, phường jang ‘lơ̆ng tơ drong jang vei lăng, tơ gŭm ăn linh jĭ rơ ka, linh lôch tang tĕh đak.

Kon tum jang ‘lơ̆ng tơ drong tơ gŭm ăn bơ ngai đei kŏng

Lơ̆m dêh char Kon Tum đei hlŏh 50.600 ‘nu bơ ngai hlôi păng tŏk bŏk xa yoa tơ drong tơ gŭm, truh dang ei oei đei hlŏh 5.100 ‘nu bơ ngai xa jên tơ gŭm rim khei. 5 sơ năm âu ki bơ̆ jang tơ drong tơ gŭm, bơ ngai đei kŏng đei rim anih jang kơ pal lơ̆m dêh char tơ lĕch jang ‘lơ̆ng, tơ ƀôh hơ dăh jơ hngâm đon ‘mêm băt kơ đe linh lôch tang tĕh đak, kơ tum kơ tŏng ‘nhŏng ŏh linh lôch tang tĕh đak, bơ ngai đei kŏng hăm kăch mang. Dêh char hlôi ‘măn hlŏh 51 ti hlak jên pơm hơ met pơ ‘lơ̆ng 21 anih chih tơ băt kŏng đe linh lôch tang tĕh đak.

Dơ̆ng: Tơ blơ̆