Lơ̆m 235 unh hnam kon pơlei oei arih xa tơ̆ tơring tơhlăk tăk, hơlam băl âu, kon pơlei găh xăh Đăk Nên, apŭng Kon Plông, dêh char Kon Tum păng xăh Trà Vinh, apŭng Nam Trà My, dêh char Quảng Nam đei hlŏh 1 puăt ‘nŏh jĭ unh hnam tơnuh hin. Yoa ưh rơđăh găh tơring sơlam, kon pơlei ưh iŏk đei tơdrong tơgŭm, tơmât jên pơm trong, man anih jang, chô̆ unh điên, man hnam trưng; ưh đei pơm ăn hla ar teh… kơna jing hiong đĭ tơdrong ‘lơ̆ng vă jang xa, pơm hơtŏk tơdrong arih.

Ƀok Phan Quốc Vũ, Kơdră Anih vei lăng bri ‘long tang găn sar bar Thạch Nham, dêh char Kon Tum, ăn tơbăt, anih jang tôch ‘mĕh pơjao bri ăn kon pơlei, khul tơpôl vei lăng mă lei yoa bri ‘nŏh găh dêh char Kon Tum oei kon pơlei ‘nŏh găh dêh char Quảng Nam vei lăng, kơna ưh gơ̆h pơjao bri. Kơlih thoi noh mă kon pơlei, khul tơpôl ưh đei pơjao bri vă đei dơ̆ng iŏk yoa, oei khul vei lăng bri ‘nŏh hơnơ̆ng tơƀâp pơmat tat lơ̆m tơdrong bơ̆jang vei lăng: “Tơdrong jang vei lăng bri tơ̆ tơring âu tôch pơmat tat. Tơdrong arih xa tơ̆ âu tam mă đei unh điên, kŭm nhen hơyuh điên thoăi, dôm anih jang, trong nơnăm tam mă ‘lơ̆ng kơna tôch mơmat hăm tơdrong arih xa kơ khul vei lăng bri. Tơring âu jĭ tơring hơlam, bri ‘long ‘nŏh găh dêh char Kon Tum vei lăng mă lei kon pơlei ‘nŏh găh dêh char Quảng Nam. Anih jang tơƀâp pơmat tat dêh hlŏh jĭ tơdrong năm roi tơbăt, krao hơvơn kon pơlei vang vei lăng bri”.

Dang ei tơ̆ tơring oei tơhlăk găh trong sơlam âu, kon pơlei đơ̆ng xăh Đăk Nên, apŭng Kon Plông, dêh char Kon Tum păng xăh Trà Vinh, apŭng Nam Trà My, dêh char Quảng Nam, ưh đei trong nơnăm, anih jang yơ đei man ‘lơ̆ng đơ̆ng kơsô̆ jên teh đak. Tơdrong ‘nâu pơm ăn tơdrong arih xa kơ kon pơlei đĭ pơmat tat bơih roi pơmat hlŏh dơ̆ng.

Yă Y Thị, Phó Bí thư chĕp kơ̆l Đảng apŭng Kon Plông, dêh char Kon Tum, ăn tơbăt: “Tơdrong ‘mĕh tơmât jên jang vă hơmet pơ ‘lơ̆ng dôm tơdrong pơmat tat lơ̆m tơdrong arih xa kơ kon pơlei kŭm nhen tơmât jên man anih jang, trong nơnăm păng dôm tơdrong kăl vă pơyoa ăn tơdrong arih xa tơpôl tơ̆ xăh Trà Vinh, apŭng Nam Trà My ‘nŏh ưh gơ̆h jang yoa luơ̆t ưh ăn tơmât jên jang tơ̆ ‘ngoăih kơ tơring vei lăng. Đơ̆ng rŏng lơ ‘măng khul kơdră 2 xăh Đăk Nên - Trà Vinh păng 2 apŭng Kon Plông - Nam Trà My bơ̆ jang mă lei oei ưh gơ̆h sek tơlang kĕh”.

Tơ̆ hơnăp tơdrong arih xa pơmat tat đơ̆ng 235 unh hnam, hăm vă jê̆ 1.100 ‘nu bơngai tơ̆ tơring sơlam âu, lơ̆m 3 sơnăm âu ki, lơ ‘măng hop akŏm đơ̆ng anih jang kơpal păng khul kơdră pơgơ̆r tơring kơ 2 dêh char Kon Tum păng Quảng Nam hlôi đei pơgơ̆r mă lei tơdrong tơhlăk oei ưh gơ̆h sek tơlang yoa 2 păh ưh đei drơ̆ng pôm nơ̆r.

Ƀok Đặng Quang Hà, Kơdră vei lăng kon pơlei apŭng Kon Plông, dêh char Kon Tum, đei nơ̆r pơma: “Hơpơi ‘mĕh anih jang kơpal jăh set hơlen, sek tơlang tơdrong tơhlăk tơ̆ tơring sơlam hlôi đei đơ̆ng sơ̆ âu. Đơ̆ng noh dôm tơring găh tơmât jên man anih jang, pơm trong, vei lăng tơdrong arih xa kơ kon pơlei, pơm ‘lơ̆ng ăn kon pơlei đei hnam oei, đei teh choh jang xa, pơm ‘lơ̆ng vă kon pơlei đei tơdrong arih xa hiôk hian, sơđơ̆ng ‘lơ̆ng”.

Đơ̆ng rŏng lơ ‘măng tơƀâp đơ̆ng 2 păh, dêh char Quảng Nam oei hơnơ̆ng vei kơjăp đon tơchĕng ‘mĕh vei lăng kon pơlei tơ̆ âu păng iŏk teh păih Kon Tum tơmât lơ̆m teh păih sư. Tơplơ̆ kơ ‘nŏh, dêh char Kon Tum akhan, athei vei kơjăp tơring teh sơlam păng iŏk hô khâu vă jê̆ 1.100 ‘nu bơngai đơ̆ng Quảng Nam tơmât lơ̆m dêh char Kon Tum dơ̆ng. Lơ̆m sơnăm 2023, 2 dêh char drơ̆ng nơ̆r pơjing 2 khul jang truh dăr lăng tôm tơdrong tơ̆ tơring âu, atŭm hăm ‘nŏh, chih kơphĭu iŏk nơ̆r kon pơlei kiơ̆ 2 trong “chĕng hơmet ming teh dăh mă tơplih ming hla ar hô̆ khâu” mơ̆ng kon pơlei rơih.  

Mă hơtuch lơ̆m 2.240 ‘nu kon pơlei đei apinh ‘nŏh đei 882 ‘nu bơngai, iok đei hlŏh 37% athei chĕng hơmet ming tơring sơlam đơ̆ng 2 tơring; 1.358 ‘nu bơngai, iŏk đei hlŏh 60% athei pơm hơmet hla ar hô̆ khẩu ăn kon pơlei xăh Trà Vinh, apŭng Nam Trà My oei arih xa lơ̆m tơring sơlam ưh băt găh yơ âu mât tơ̆ dêh char Kon Tum. Mă lei truh dang ei tơdrong dăr hơlen tôch rơđăh đơ̆ng 2 dêh char oei tam mă đei yoa kiơ. Kon Tum păng Quảng Nam oei tam mă drơ̆ng nơ̆r păng kon pơlei oei hơnơ̆ng arih xa lơ̆m tơdrong pơmat tat, kơƀăh kơƀôch.