VOV4.Bahnar - Pơ gê 14/3, tơ̆ pơ sat linh lôch tang tĕh đak apŭng Ngọc Hồi, dêh char Kon Tum, Anih jang đảng apŭng, Jơ nŭm pơ gơ̆r kon pơ lei, Dơ nŏ anih vei lăng kon pơ lei, Anih MTTQ Việt Nam apŭng Ngọc Hồi pơm lêh hơ pong, pơ dong ƀŭ 5 kơ̆l linh lôch tang tĕh đak lôch lơ̆m tơ drong tơ blăh Mi dŏng tĕh đak sơ̆. 

Ƀŭ hơ met kơ ting linh lôch tang tĕh đak

Lêh hơ pong, pơ dong păng ƀŭ 5 kơ̆l linh lôch tang tĕh đak đei pơ gơ̆r tơ păt ‘lơ̆ng, hăm ƀĕnh jơ hngâm đon kŭp yom, tơ ƀôh hơ dăh jơ hngâm đon ‘mêm bơ nê tôch ai đơ̆ng kon pơ lei hăm đe linh nuih mơng chu lôch tang yoa tơ drong rơ ngei kơ hơ drĕch hơ drung păng vei lăng tĕh đak Việt Nam xã hội chủ nghĩa.

Dôm kơ̆l linh lôch tang tĕh đak đei Khul năm chă kơ ting linh lôch tang tĕh đak kơ Quân đoàn 3 chă ƀôh ƀât hơ tuch khei 2 âu ki găh xăh Ya Xiêr, apŭng Sa Thầy păng pơ jao ăn khul kơ dră tơ ring. Kiơ̆ tơ drong tơ chĕng blŭng a đơ̆ng Khul sir chă kơ ting linh lôch tang tĕh đak, Quân đoàn 3, 5 ‘nu linh lôch tang tĕh đak đei chă ƀôh âu rŏ năng găh Trung đoàn 209, Trung đoàn 66 păng 1,2 khul linh vang tơ blăh, lôch tang tơ̆ kơ drăn tơ băh Tây Nguyên lơ̆m khei 3/1968.

Dơ̆ng: Tơ blơ̆