VOV4.Bahnar - Vă hơ len năng rim tơ drong jang đei lơ̆m tơ drong tang găn, sut pơ đĭ tơ drong lui Hà Mòn, chih hơ dăh tơ drong jang tang găn hơ drol, hơ mơt lui Hà Mòn pơ gơ̆r hơ lơ̆k dơ̆ng tơ̆ hơ năp kơnh, Anih jang đảng dêh char Kon Tum pơ gơ̆r Hop akŏm pơ tôch tơ drong jang tang găn, sut hŭt tơ drong lui Hà Mòn tơ̆ dêh char.

Nơ̆r tơ roi đơ̆ng Anih jang đảng dêh char Kon Tum lơ̆m hop akŏm ăn ƀôh, bơ̆ jang kiơ̆ nơ̆r pơ tho đơ̆ng Trung ương, đơ̆ng sơ năm 1999, Khul kơ dră chĕp kơ̆l đảng dêh char Kon Tum pơ tho ăn rim anih jang, khul grŭp tơ lĕch dôm tơ drong jang vă tang găn, sut hŭt lê̆ tơ drong lui Hà Mòn. Truh dang ei hlôi sut đĭ đăng tơdrong lui ‘nâu bơih, kŭm nhen hlôi sek tơ lang dôm tơ drong ƀơm truh chinh trĭ, tơ jră phă ngơ̆r, ‘mĕh tơ klăh hơ drô̆, chĕp kơ̆l pơ gơ̆r kơ dih đơ̆ng lui Hà Mòn. Dang ei đei 7 ‘nu bơ ngai chĕp kơ̆l tơm dơ nơm kơ tơ drong lui Hà Mòn hlôi brŏk đơ̆ng hnam phak vih dơ̆ng tơ̆ tơ ring, oei pă 2 ‘nu bơ ngai oei phak kron tơ̆ Hnam phak Gia Trung- Anih tơm vei lăng Công an păng đei đon tơ plih ‘lơ̆ng, kơ na đei tơ jur lơ sơ năm phak. Kiơ̆ tơ drong hơ len năng đơ̆ng Anih jang đảng dêh char Kon Tum, tơ̆ dêh char hrei ‘nâu ưh đei bơ ngai yơ kiơ̆ lui Hà Mòn.

Bí thư đảng dêh char, Kơ dră Jơ nŭm pơ gơ̆r kon pơ lei dêh char Kon Tum Dương Văn Trang ing pơ ma lơ̆m hop akŏm

Ƀok Dương Văn Trang, Kơ dră jang lơ̆m Trung ương Đảng, Bí thư đảng dêh char, Kơ dră Jơ nŭm pơ gơ̆r kon pơ lei dêh char Kon Tum pơ ma hơ dăh: “Tơ drong sơ đơ̆ng tơ̆ dôm tơ ring adrol ki đei tơ drong lui Hà Mòn pơ sơ̆r dang ei đei vei lăng ‘lơ̆ng bơih. Lơ bơ ngai hŭt lê̆ tơ drong lui Hà Mòn đei tơ ring tơ gŭm ăn đe sư jang xa, tơ drong arih xa roi đunh roi tŏk. Tơ drong hil hơ reh băl đơ̆ng dôm bơ ngai adrol ki kiơ̆ lui Hà Mòn păng bơ ngai ưh đei kiơ̆ lui ‘nâu đei hơ met pơ ‘lơ̆ng. Đei bơ ngai vang krao hơ vơn đe ƀok tho lui khop vang bơ̆ jang sut pơ đĭ tơ drong lui Hà Mòn, pơih trong ăn lơ bơ ngai hŭt lê̆ tơ drong lui Hà Mòn truh dơ̆ng hăm tơ drong lui Công giáo”.

Tơ drong lui Hà Mòn yoa yă Y Gyin pơ jing ƀât hơ tuch sơ năm 1999 tơ̆ xăh Hà Mòn, apŭng Đăk Hà, dêh char Kon Tum. Tơ drong pơ jing lui Hà Mòn đei đơ̆ng yă Y Gyin tơ roi akhan, yă lăng ƀôh “Mĕ Maria jur” kơ pal hnam păng kơ dih kâu yă đei “Mĕ Maria” athei pơ jing 1 tơ drong lui ‘nao, hơ dai hăm ‘nŏh tơ roi akhan: bu kiơ̆ lui gô đei tơ drong arih xa phĭ tơ nŏ, hiôk chơt, jĭ jăn ưh kăl hơ met jĭ kŭm klăih, hre đom (jô̆ hloi hre ngân hang) gô đei sut hŭt đĭ… Kơ plăh khei ‘năr đei bơ ngai kiơ̆ lui lơ hlŏh lơ̆m sơ năm 2012, Lui Hà Mòn hlôi đei tơ̆ 6 apŭng, plt; 10 xăh, phường, thĭ trơ̆n; 21 pơ lei pơ la tơ̆ dêh char Kon Tum hăm hlŏh 2.300 ‘nu bơ ngai kiơ̆, 92 ‘nu bơ ngai chĕp kơ̆l, pơ gơ̆r, 48 ‘nu bơ ngai kơ dâu klĕnh đơ̆ng tơ ring; Lui Hà Mòn oei pơ jing đei khul pơ gơ̆r, bơ ngai vei lăng dôm anih hơ kŭm; 1,2 ‘nu bơ ngai chĕp kơ̆l tơ̆ tơ ring chă pơ ma nuh hăm đe nai, tơ lĕch trong tưk tơ iung tơ drong lui Hà Mòn năm tơ̆ dêh char Gia Lai păng Dak Lak.

Thượng tướng Lương Tam Quang, Phŏ Kơ dră tơm vei lăng Công an iung pơ ma lơ̆m Hop akŏm

Lui Hà Mòn pơm tơ lĕch lơ tơ drong krê găh tơ drong sơ đơ̆ng tơ pôl nhen: dôm bơ ngai kiơ̆ FULRO oei tơ̆ tĕh đak đe, pơ tho ăn dôm bơ ngai kiơ̆ lui Hà Mòn tơ lĕch lơ trong jang tơ jră plơ̆ Khul kơ dră pơ gơ̆r tơ ring. Tơ drong lui Hà Mòn oei pơm tơ lĕch lơ tơ drong krê tơ jră băl đơ̆ng dôm tơ drong lui khop hai, pơm che re hơ drĕch hơ drung, pơm kơ nê̆ truh tơ drong arih xa kơ lơ kon pơ lei kon kông tơ̆ tơ ring…

Pơ ma lơ̆m hop akŏm pơ tôch tơ drong jang tang găn, sut pơ đĭ lui Hà Mòn tơ̆ dêh char Kon Tum, Thượng tướng Lương Tam Quang, Kơ dră jang lơ̆m Trung ương Đảng, Phŏ Kơ dră tơm vei lăng Công an tơ chĕng ‘lơ̆ng tơ drong kăl đơ̆ng hop akŏm âu. Phŏ Kơ dră Lương Tam Quang akhan, đơ̆ng tơ drong kăl đei chih iŏk mưh bơ̆ jang tang găn sut pơ đĭ lui Hà Mòn kơ dêh char Kon Tum hlôi tơ lĕch đei lơ hơ yak năm, trong jang gĭt kăl, jing tơ drong tơm tôch kơ jăp vă găn, sut pơ đĭ rim tơ drong lui kư̆ kă, ưh trŏ ƀlep, dôm tơ drong lui ưh trŏ luơ̆t tơ̆ tơ ring kon kông nhen thoi âu lơ̆m tĕh đak:   

“Tơ pă đơ̆ng tơ drong jang tang găn, sut pơ đĭ lui Hà Mòn lơ̆m dôm sơ năm âu ki tơ̆ Kon Tum ăn ƀôh: mưh đei anih jang đảng, khul kơ dră tơ ring mă loi jĭ bơ ngai chĕp kơ̆l đei đon kơ chăng, jang tơ năp, gơ̆h hơ gei, iŏk yoa ‘lơ̆ng dôm trong jang tang găn, akŏm đei jơ hngâm pran đơ̆ng rim anih jang chinh trĭ păng kon pơ lei, tơ drong vang jang tơ tom đơ̆ng dôm anih jang kơ pal, khul grŭp tơ pôl hăm tơ drong chĕp kơ̆l pơ gơ̆r đơ̆ng anih jang Đảng lơ̆m nŏh đei khul linh Công an pơm tơm ‘nŏh tơ drong krê hăm tơ drong sơ đơ̆ng gô đei sek tơ lang tôch, pơ jing đei tơ drong ‘lơ̆ng vă jang atŏk tơ iung mŭk drăm, tơ pôl păng tơ plơ̆ kơ ‘nŏh dơ̆ng tơ drong jang tŏk mŭk drăm, tơ pôl kŭm jing jơ hngâm pran vă vei lăng ‘lơ̆ng tơ drong sơ đơ̆ng tĕh đak”.

Thượng tướng Lương Tam Quang, Phŏ Kơ dră tơm vei lăng Công an hơ păh Ƀăng khen đơ̆ng Kơ dră tơm vei lăng Công an ăn dôm khul grŭp păng rim bơ ngai jang rơ gei

Iŏk đei đơ̆ng 23 sơ năm chĕp kơ̆l pơ gơ̆r, adrin jang tang găn, sut pơ đĭ lui Hà Mòn, Anih jang đảng dêh char Kon Tum chih hơ dăh tơ drong jang tơm tơ̆ hơ năp kơnh ‘nŏh: “Kơ chăng tang găn mă ‘lơ̆ng, ưh gơ̆h lê̆ tơ drong lui Hà Mòn chă trong pơ gơ̆r hơ kŭm, krao khan dơ̆ng”. Chih răk dôm tơ drong jơ nei ‘lơ̆ng hơ iă đơ̆ng dôm khul grŭp, rim bơ ngai lơ̆m tơ drong jang tang găn, sut pơ đĭ lui Hà Mòn, vang tơ gop vei lăng ‘lơ̆ng tơ drong sơ đơ̆ng tĕh đak păng vei kơ jăp tơ drong sơ đơ̆ng tơ pôl tơ̆ dêh char Kon Tum, ƀlep ƀât ‘măng mă âu Kơ dră tơm vei lăng Công an hơ păh Ƀăng khen ăn 5 khul grŭp păng 12 ‘nu bơ ngai; Kơ dră vei lăng kon pơ lei dêh char Kon Tum hơ păh Ƀăng khen ăn 3 khul grŭp păng 5 ‘nu bơ ngai.   

                Khoa Điềm: Chih

Dơ̆ng: Tơ blơ̆