Tơdrong chơ chă, xir kôch akŏm 8 kơting linh lôch dŏng teh đak đei đơ̆ng tơdrong mă kơyuơ linh xo Lã Mạnh Tùng, xơ̆ jang kang ƀô̆ tơ̆ Kơdrăn tơblăh B3 tơring Tây Nguyên tơroi. Đơ̆ng rŏng kơ băt kơtơ̆ng ang đơ̆ng ‘nhŏng oh linh lôch plang, kon pơlei lơ̆m tơring păng pơtêng hăm hla bar chih akŏm đe linh lôch dŏng teh đak kơyuơ Kuân đoan 3 pơtruh, khul linh pơlei tơm Kon Tum hlôi akŏm chă xir kôch kơting linh dŏng teh đak lơ̆m tơring teh kơ 2 phương Duy Tân păng Ngô Mây. Mă tơdrong tơroi kơ 14 ‘nu linh lôch plang lơ̆m tơring âu chŏng mă kơlih đunh xơnăm bơih, tơring teh tơplih um ai, kiơ̆ kơ dôm tơmam oei đei, khul chă xir kôch băt đei kơting kơ 8 linh lôch plang. Dang ei khul jang đei tơrĕk tam mă  băt hơdăh hơnăn kơ rim linh lôch plang âu.