Pơma tơ̆ hop akŏm, ƀok Dương Văn Trang, Kơdră jang lơ̆m Trung ương Đảng, Bí thư Đảng dêh char, Kơdră Jơnŭm pơgơ̆r kon pơlei dêh char, Kơdră Anih pơgơ̆r jang tang găn xa pơjĭp, pơm glăi dêh char Kon Tum ăn tơbăt, khei ‘năr âu ki, Khul kơdră chĕp kơ̆l Đảng dêh char Kon Tum akŏm jơhngâm chĕp kơ̆l pơgơ̆r rim anih jang đảng, khul jang Đảng tơlĕch jang tơpăt, hrơ̆ch ‘lơ̆ng dôm trong jang đơ̆ng Đảng, khôi luơ̆t đơ̆ng tĕh đak găh tơdrong tang găn xa pơjĭp, pơm glăi;

Tơtom pơjing Anih pơgơ̆r jang tang găn xa pơjĭp, pơm glăi kơ dêh char; hơnơ̆ng pơgơ̆r hơlen năng, dăr lăng găh tơdrong tang găn xa pơjĭp, pơm glăi; pơtho tơƀôh hơtŏk tơdrong dăr hơlen tơkêng, sek tơlang dôm tơdrong yoch xa pơjĭp, pơm glăi; dôm trong jang tang găn xa pơjĭp đei tơlĕch hrơ̆ch ‘lơ̆ng; dôm tơdrong glăi, tơdrong yoch xa pơjĭp đei chă ƀôh tơtom, sek tơlang tơpăt.