Tơ̆ tơdrong tơchơ̆t tơroi tơbăt hơdăh tơdrong đei ƀôh hăm 2 tơdrong jang trong nơnăm păng dơnâu mong đak tơ̆ apŭng Sa Thầy, Anih vei lăng kon pơlei dêh char Kon Tum athei Anih vei lăng trong nơnăm gre kơdâu păng Anih vei lăng iŏk jang dôm tơdrong jang dơnâu mong đak dêh char Kon Tum tơlĕch pơm hla ar tơmơ̆t jên jang pơjing tơdrong jang kăl hơmet pơ ‘lơ̆ng tơdrong teh hơlih, hư răm hăm 2 tơdrong jang kơpal.

Hơdrol ‘noh lơ̆m khei 6 păng khei 7/2023, ‘mi tih hơnơ̆ng lơ̆m apŭng Sa Thầy hlôi pơm ăn teh hơlih, rư răm dôm tơdrong jang tơ̆ trong gre 674 ‘nao Yaly- plei Tam An, xăh Sa Sơn- Ya Mô, plei Rẽ, xăh Mô Rai păng tơdrong jang hơmet pơ ‘lơ̆ng dơnâu mong đak Đăk Ngao 1, apŭng sơlam Sa Thầy.