Tơdrong jang chĕng hơmet teh ăn kon pơlei oei tơ̆ xăh Đăk Long, apŭng Đăk Hà, dêh char Kon Tum đei tơlĕch jang kiơ̆ đơ̆ng hơtuch sơnăm 2009 đei tơdrong jang sơđơ̆ng tơdrong arih sa ăn kơ dang 300 ŭnh hnam kon pơlei hăm 1.500 ‘nu bơngai. Mă lei truh dang ei đơ̆ng rŏng vă jê̆ 14 sơnăm ‘nao đei 84 ŭnh hnam kon pơlei truh arih sa tơ̆ hơnih oei hle păng 42 ŭnh hnam mă đơ̆ng hlôi iŏk teh oei, teh choh jang sa mă lei ưh kơ truh oei sa tơ̆ âu.

Tơdrong tơm đei băt hơdăh yua đơ̆ng tơdrong jang chĕng hơmet teh, rơih hơnih ưh kơ lăp; ưh kơ măh đak yua, ưh kơmăh teh jang sa, tơdrong tơgŭm kon pơlei sơđơ̆ng tơdrong arih sa tam mă đei bơngơ̆t truh ƀlep tơdrong. Ƀok Nguyễn Minh Vương, Phŏ Kơdră Anih vei lăng kon pơlei apŭng Đăk Hà, tơbăt tơdrong hơmet pơ ‘lơ̆ng dôm tơdrong oei đei, tam mă ‘lơ̆ng tơ̆ hơnih oei hle âu tơƀơ̆p lơ mơmat tat păng đei tơdrong tơhlăk yua đơ̆ng dôm tơdrong tơplih đơ̆ng Luơ̆t teh.