Pơgê ‘năr 10/1, Jơnŭm vei lăng bơngai răm đơ̆ng pơgang đioxin dêh char Kon Tum jang hơdai hăm Kŏng ti mơdro sa Akŏm Kon Tum pơgơ̆r pơjao asong 389 kơsuơ̆t tơmam Têt đei akŏp kơjă hloh 146 triệu hlak jên ăn bơngai jo jăn ‘noh bơngai răm đơ̆ng pơgang điôxin jơhnơr mă 3 tơ̆ dôm apŭng: Đăk Hà, Kon Rẫy, Ngọc Hồi păng pơlei tơm Kon Tum.

Kŭm hăm ‘noh Jơnŭm vei lăng bơngai răm đơ̆ng pơgang dioxin dêh char Kon Tum kŭm tơlĕch Jên mong bơngai răm đơ̆ng pơgang điôxin hloh 137 triệu  hlak jên asong 846 bơngai răm lơ̆m dêh char. Hơdrol ‘noh, Kŏng đoan Dôm anih jang kơmăy kơmŏk - anih mŭk drăm dêh char Kon Tum jang hơdai hăm Kŏng đoan bơngai jang teh đak pơgơ̆r tơdrong jang têt ngôi hơdai - pơyan puih mak tơklep hơdai sơnăm 2023. Tơ̆ tơdrong jang 360 đoàn viên kŏng đoan bơngai jang đei tơdrong arih sa mơmat tat đei asong tơmam 1 kơ suơ̆t đei kơjă đơ̆ng 500 rơbâu hlak jên truh 1 triệu hlak jên.