Hơnơ̆ng lơ̆m 12 sơnăm, Hnam trương Teh đak rong ‘me dêh char Gia Lai iŏk đei jơnei 100% hŏk tro đei lĕch ‘măng khoă, Ƀok thây vei lăng hnam trương Võ Thành Nguyên tơbăt, đơ̆ng blŭng sơnăm hŏk, hnam trương hlôi pơjing trong pơprŏ pơtho ming trŏ lăp.

Tơ̆ Hnam trương jăl pêng Đinh Tiên Hoàng, apŭng atăih yăih Krông Pa, hơnih đei 99% hŏk tro ‘noh kon kông, rim đe oh đei klăh asong pơjing khul trŏ lăp vă hŏk pơhrăm ming ‘măn ăn ‘măng pơlong lĕch ‘măng khoă. ‘Măng pơlong lĕch ‘măng khoă jăl pêng Teh đak sơnăm au tơ̆ dêh char Gia Lai đei 41 hơnih pơlong hăm hloh 15.300 ‘nu hŏk tro chih hơnăn vang năm pơlong, lơ̆m au đei vă jê̆ 4.100 ‘nu hŏk tro kon kông. Tơdrong tơlĕch jang kơtang đơ̆ng hnam trương, dôm tơdrong pơtho phăl hơlăng đơ̆ng ƀok thây kô gô tơgop tơgŭm ăn hŏk tro chơ̆n jơhngơ̆m mơ̆t pơlong đei jơnei kơtang.