Hlŏh 70 sơnăm, mă lei ƀok Ma An, kră pơlei plei Trí A, xăh Krông Na, apŭng Buôn Đôn, dêh char Dak Lak oei tôch hơbech, hơkar jơmăng, hơrăng ‘lơ̆ng nhen ‘long tơnơ̆ng dơ̆ng kơjăp tŏk bŏk bri kông Tây Nguyên.  Sơnăm 2002, Tây Nguyên jĭ tơring tôch tơtŏ găh chinh trĭ hăm tơdrong iung jang đơ̆ng 1,2 khul kơnê̆ chă trong phă ngơ̆r tĕh đak, ƀok Ma An jing bơngai đei kon pơlei lơ̆m plei lui, gơnang yoa. Đunh khei ‘năr oei xa hơdai hăm rim unh hnam lơ̆m pơlei, ƀok hơnơ̆ng chă roi tơbăt, krao hơvơn, pơtho tơƀôh ăn kon pơlei băt truh dôm bơngai kơchu, lu bơngai phă ngơ̆r tĕh đak vă mih ma duch nă băt hơtŏk đon kơchăng, ưh đei mơ̆ng, ưh đei put nơ̆r bơngai kơnê̆ pơhlŭ: “Bơ̆n tơ̆ âu lê̆ mơ̆ng kiơ̆ nơ̆r đe pơhlŭ, bơ̆n athei băt hơdăh trong chĕp kơ̆l pơgơ̆r đơ̆ng Đảng, đơ̆ng tĕh đak, hơnơ̆ng jang kiơ̆ trong jang đơ̆ng Đảng tơjur, pơm thoi yơ vă gơ̆h ‘lơ̆ng ăn kon pơlei tơ̆ tơring.”

Ƀât tơring đei sơđơ̆ng ‘lơ̆ng dơ̆ng, kră pơlei, bơngai đei grih, đei kon pơlei lui yom hơnơ̆ng jang hơdrol, jang kiơ̆ ‘lơ̆ng trong jang đơ̆ng Đảng, khôi luơ̆t tĕh đak. 54 sơnăm mât jang Đảng, ƀok Y Thương K’Măn tơ̆ xăh Bông Krang, apŭng Lắk, dêh char Dak Lak hơnơ̆ng vang năm hŏk hôp tơpôl tơ̆ pơlei, krao hơvơn kon pơlei jang kiơ̆ mă ‘lơ̆ng dôm trong jang, khôi luơ̆t tĕh đak, adrin tơguăt 1 ƀơ̆r đon hăm đĭ đăng hơdrĕch hơdrung.

Ƀok Y Thương tơroi, mă đơ̆ng tĕh đak roi đunh roi tŏk pơdrŏng mă lei tơdrong arih xa kơ kon pơlei dôm hơdrĕch kon kông oei đei lơ pơmat tat, dôm khul hơyăt oei hơnơ̆ng chă trong phă ngơ̆r, iŏk tơdrong ‘nâu vă pơlung đe tơjră plơ̆ kăch mang. Yoa thoi nŏh, đe đảng viên nhen ƀok athei jing jrăng tơjră, jing bơngai ăn kon pơlei gơnang vă kon pơlei lui păng jang kiơ̆: “Đảng păng tĕh đak tôch tơrĕk truh tơdrong arih xa kơ kon pơlei kon kông găh lơ tơdrong, mă mônh jĭ unh điên, rim hnam đei ngăl bơih, mă 2 ‘nŏh năm khăm hơmet jĭ ưh đei hiong jên. Dôm tơdrong ‘nŏh đei đơ̆ng Đảng, tĕh đak tơjur, tơgŭm ăn kon pơlei kon kông bơ̆n.”

Hăm bưng ai đơ̆ng kơdih, lơ kră pơlei krao hơvơn mih ma duch nă jang hơdai vang atŏk tơiung chă tơmang lăng lơ̆m tơpôl hơdai hăm chĕp vei kơjăp tơdrong juăt, jŏh ayŏ kơ dŏ xoang ‘lơ̆ng hơiă đơ̆ng sơ̆. Kiơ̆ kră pơlei Y Nuel Niê, tơ̆ plei Ako Dhong, plt Buôn Ma Thuột, dêh char Dak Lak, tơdrong jang ‘nâu tơgŭm ăn kon pơlei roi băt ‘mêm kơ eng tơdrong juăt, jŏh ayŏ kơ dŏ xoang ‘lơ̆ng hơiă đơ̆ng hơdrĕch hơdrung hai, tơgŭm ăn đe sư đei dơ̆ng kon jên vă pơ ‘nhŏ ăn tơdrong arih xa, hiôk sơđơ̆ng hai:

Kră pơlei Y Nuel Niê akhan: “Chĕp vei tơdrong joh ayŏ kơ dŏ xoang so gơ̆h chă đei kon jên vă rong ‘me kon sâu hŏk pơhrăm kŭm nhen chă tơdrong jang ăn kon hơ ‘lơ̆p lơ̆m pơlei. Tơiung ming, roi tơbăt dôm tơdrong jŏh ayŏ kơ dŏ xoang ‘lơ̆ng hơiă kơ bơngai Rađe nhôn, ưh lăp ăn bơngai chă tơmang lăng lơ̆m tĕh đak bơ̆n đĕch mă ăn tơmoi đơ̆ng tĕh đak đei truh lăng hai. Tưk tơiung tơdrong juăt ‘lơ̆ng hơiă tŏk hơdai hăm tơdrong chă tơmang lăng vă chă jên, hơnhăk iŏk yoa ăn kon pơlei.”

Tây Nguyên hrei ‘nâu đei hlŏh 3.700 ‘nu kră pơlei, bơngai đei grih, đei bưng ai hơnơ̆ng đei kon pơlei lui yom, đe sư ưh lăp hlôh vao kơjăp tơdrong juăt ‘lơ̆ng tơ̆ pơlei pơla đĕch mă oei jing bơngai pơm gơng tơƀưh, pơvih tôch tơnăp ăn khul kơdră pơgơ̆r tơring lơ̆m tơdrong roi tơbăt dôm tơdrong tơgŭm, khôi luơ̆t tĕh đak păng hơnơ̆ng năm hơdrol mưh bơ̆ jang kiơ̆ rim trong jang đơ̆ng kơpal tơjur, tơgop pơm sơđơ̆ng tơdrong arih xa, vei kơjăp ‘lơ̆ng tơdrong hiôk sơđơ̆ng tơ̆ pơlei pơla.