Kơsơ̆ năr 19/7, Khul bơ̆ jang dăr lăng kơ Kuô̆k hô̆i kơ yuơ Thượng tướng Trần Quang Phương, Kơ iĕng Kơdră chĕp pơgơ̆r Kuô̆k hô̆i pơm kơdră khul hlôi bơ̆ jang hăm kơdră dêh char Đăk Lăk găh tơlĕch jang kiơ̆ rim Tơdrong tơchơ̆t kơ Kuô̆k hô̆i ‘noh: tơdrong jang tơm Teh đak tơ iung pơjing tơring tơrang ‘nao; Tơdrong jang tơjur dơnuh kơjăp ‘lơ̆ng jăl jang 2021-2025 păng tơdrong jang atŏk tơ iung mŭk drăm-tơpôl tơring kon kông păng groi kông jăl jang 2021-2030. Tơbăt hăm khul bơ̆ jang, đơ̆ng rŏng vă jê̆ 3 sơnăm tơlĕch jang kiơ̆ 3 tơdrong jang tơm teh đak, tơring tơrang tơ̆ Đăk Lăk hlôi tơplih hơdăh. Tơdrong hơrih sa kon pơlei tơring kon kông roi năr roi sơđơ̆ng, tơdrong oei sa joh ayŏ-tơpôl đei lơ tơdrong hơ iă, ŭnh hnam dơnuh roi năr roi pă tŏ sĕt. Tơdrong oei sa, jang sa kơ kon pơlei hơnơ̆ng đei lăng ba kơjăp ‘lơ̆ng. Mă lei, lơ̆m khei năr jang kiơ̆ 3 Tơdrong jang tơm teh đak tơ̆ Đăk Lăk jei tơƀơ̆p tôch lơ tơdrong tơnap tap, tơhlăk tơhlĭn. Mĭnh ƀar trong tơlĕch jang tơnap mă jang keh đang ƀlep hăm trong tơlĕch ăn. Tơdrong tơjur dơnuh tim mă kơjăp ‘lơ̆ng tơpă, tơdrong hơmơt đei dơ̆ng dơnuh hin oei kơtang. 

Tơƀôh hơdăh mĭnh ƀar tơdrong tơm pơm ăn tơnap tap lơ̆m jang kiơ̆ 3 tơdrtong jang tơm teh đak, rim kơdră tang măt akhan: Khul jang păng tơdrong bơ̆ jang kơ khul kang ƀô̆ jang kiơ̆ rim tơdrong jang tơ̆ tơring oei ưh kơ măh păng tim mă gơh hơgei. Kon jên jang rim tơdrong jang đei tơlĕch ăn hiơ hiơ̆ pơm kơnê̆ truh tơdrong iung jang, pơm ăn ưh kơ jơnei. Atŭm hăm ‘noh, mĭnh ƀar tơdrong vă jang păng dôm trong jang kơ 3 Tơdrong jang tơm teh đak tim mă tơlĕch jang păng tơlĕch kon jên jang ‘noh kơ yuơ tim mă đei hla bơar pơtho tơbăt ăn tôm tong đơ̆ng Trung ương păng rim hơnih tơm bơ̆ jang. Ƀok Đinh Xuân Hà, Kơdră chĕp pơgơ̆r Hơnih Pơprŏ tơdrong jang-Tơmơ̆t jên jang dêh char Đăk Lăk tơbăt: “Hlôi đei minh ƀar hla bơar đei hơmet ming, tơmơ̆t dơ̆ng, oei hơgrop dih băl. Mă kăl, hla bơar au, tơbăt hơdăh truh hla bơar anai, đŏkl hla bơar tơchơ̆t anai ‘nŏh tă kiơ̆ mĭnh hla bơar tơchơ̆t anai dơ̆ng. Mĭnh jăl đei chih tơlĕch mĭnh tơdrong pha dơ̆ng lơ̆m jang kiơ̆ ‘nŏh mĭnh tơring tă đei minh hơnih bơ̆ jang hlôh vao kiơ̆ trong kơdih kơdih dơ̆ng”.

Ƀĭ thư Đảng dêh char Đak Lăk Nguyễn Đình Trung jei tơbăt hơdăh dôm tơdrong tơnap tap, tim gan trŏ lăp nhen: tơdrong pơjao teh ăn kon pơlei kon kông oei tơƀơ̆p tôch kơ lơ tơhlăk tơhlĭn, kăl đei trong tơlĕch jang mă trŏ ƀlep yan au hloi; tơdrong kang ƀô̆ bơ̆ jang tơ tơring jei kăl đei trong tơchơ̆t tơgŭm ăn mă trŏ lăp hăm tơring Tây Nguyên; dôm tơdrong jang lơ̆m jăl jang 2021 - 2025 đei lơ trong hle kơna bơ̆ jang dăr lăng, sơkơ̆t hơdăh pơkăp hơlen ăn vă klăh asong, xơkơ̆t hơdăh hơnăn tơdrong jang vă tơmơ̆t jên jang oei đei lơ tơdrong tim gan lăp…

Iung pơma tơ̆ jơ bơ̆ jang, Thượng tướng Trần Quang Phương, Kơ iĕng Kơdră chĕp pơgơ̆r Kuô̆k hô̆i hôn bơnê dôm trong tơlĕch jang kiơ̆ rim Tơdrong jang tơm teh đak mă Đak Lăk hlôi iŏk đei. Adoi, hăm trong jang dăr lăng ‘nŏh trong tơm vă atŭm dih băl hơmet pơ ‘lơ̆ng, pơdrơ̆ng kiơ̆ tơdrong jang tơ̆ dêh char, Kơ iĕng Kơdră chĕp pơgơ̆r Kuô̆k hô̆i athei:“Rim kơdră chĕp pơgơ̆r dêh char kăl đei nơ̆r pơrô̆ jang kơtang, đei chih tơbăt hơdăh tôm tong nơ̆r tơgop đơ̆ng rim hơnih bơ̆ jang păng rim kơdră jang, chih tơlĕch hơnăn rim tơdrong jang oei tơhlăk tơhlĭn hơnơ̆ng pơtruh nơ̆r apĭnh athei dơ̆ng. Mă ƀar, hơnơ̆ng lăng ba kơjăp chĕp pơgơ̆r pơrô̆ jang kơtang hloh dơ̆ng, atŏk kơtang tơdrong bơ̆ jang kơ hơnih chĕp pơgơ̆r păng iung jang hơdoi tơtom kơjăp ƀar păh rim hơnih bơ̆ jang, hơvơn jơhngơ̆m pran đơ̆ng rim hơnih, khul vă roi năr roi tơplih ‘nao trong joăt jang sa vă atŏk tơ iung mŭk drăm-tơpôl”.

Khei năr au ki, Kuô̆k hôi tơlĕch jang kiơ̆ Trong pơprŏ dăr lăng, lăng hơlen tơdrong jang kiơ̆ rim Tơdrong jang tơm teh đak sơnăm 2023 tơ̆ 3 tơring. Mă hơdăh ‘nŏh: Dăr lăng, lăng hơlen yan au hloi păng bơ̆ jang kơtă atŭm hăm trư̆k tuyên hăm 14 dêh char Tơring Tŏk bŏk păng Groi kông Bắc Bộ tơ̆ dêh char Yên Bái; Dăr lăng hơlen păng iung jang kơtă atŭm hăm trư̆k tuyên hăm 19 dêh char tơring Bắc Trung Bộ păng Tơring Tơmăn Tŏk bŏk păng tơring Tây Nguyên tơ̆ Bình Định; Dăr lăng hơlen păng iung jang kơtă atŭm hăm trư̆k tuyên hăm 13 dêh char Tơring Tơmăn đak kroong Cưủ Long tơ̆ dêh char Bạc Liêu.

Kơ iĕng Thủ tướng jei pơjao ăn Hơnih tơm Pơprŏ tơdrong jang păng Tơmơ̆t jên jang pơm tơm, iung jang hơdoi hăm rim Hơnih tơm, hơnih bơ̆ jang: Choh jang sa păng Atŏk tơ iung tơring tơrang, Hơnih tơm vei lăng Tơdrong jang-Bơngai rơka dŏng tĕh đak păng Tơpôl, Hpơnih vei lăng kon kông păng rim Hơnih tơm, hơnih bơ̆ jang, tơring đei ƀom truh hơmet ăn Hla bơar tơbăt trong bơ̆ jang, hla bơar jang tơgŭm ăn rim jơ bơ̆ jang hăm rim tơring, lơ̆m au pơkă lăng hơlen rim trong kăl jang kiơ̆, tơbăt hơdăh dôm trong jang hơ iă, tơchăr hơgei lơ̆m bơ̆ jang tơ iung pơjing, pơm pơkeh trong tơchơ̆t jang, trong jang tơgŭm djru, tơlĕch kon jên jang iung jang kiơ̆ rim Tơdrong jang tơm Teh đak tơ̆ rim tơring; dăr lăng hơlen, ƀôh rim tơdrong tơnap tap, tơhlăk tơhlĭn vă tơlĕch ăn, apĭnh athei, pơtruh ăn rim trong jang hơdăh vă hơmet pơ ‘lơ̆ng, pơtrŭt kơtang tơlĕch jang kiơ̆ ‘lơ̆ng. Hơnih bơ̆ jang ăn Khul kơdră Teh đak iung jang hơdoi hăm rim hơnih tơm, hơnih bơ̆ jang, tơring đei ƀơm truh hơmet ăn rim tơdrong jang păng dôm tơdrong rơvơn kăl hloh vă pơgơ̆r jang kiơ̆ trong pơprŏ jang.