Giĕng âu ki, Khul dăr lăng đơ̆ng Anih chĕp kơ̆l pơgơ̆r Kuô̆k hô̆i bơ̆ jang hăm Anih vei lăng kon pơlei dêh char Bình Định găh tơdrong bơ̆ jang kiơ̆ tơdrong Tơchơ̆t đơ̆ng Kuô̆k hô̆i tơplih ‘nao hla ar hŏk pơhrăm phô thŏng. Kiơ̆ nơ̆r tơroi, dêh char Bình Định hlôi jang kĕh tơdrong pơtho pơhrăm ming kiơ̆ tơdrong pơtho hŏk pơhrăm phô thŏng sơnăm 2018 ăn hlŏh 12.700 ‘nu thây kô păng kăn ƀô vei lăng anih pơtho pơhrăm phô thŏng. Anih vei lăng pơtho pơhrăm dêh char Bình Định pơgơ̆r in, tơlĕch hla ar pơtho pơhrăm tơring hăm lăm 1, lăm 2, lăm 3, lăm 6, lăm 7 păng lăm 10 pơm ‘lơ̆ng păng măh tôm ăn rim anih pơtho pơhrăm tơ̆ dêh char kiơ̆ tơdrong ‘mĕh vă.

Tơ̆ jơ bơ̆ jang hăm Khul dăr lăng đơ̆ng Anih chĕp kơ̆l pơgơ̆r Kuô̆k hô̆i, Anih vei lăng kon pơlei dêh char Bình Định apinh tĕh đak ƀơk đĕch hla ar hok ăn hŏk tro tơ̆ tơring kon kông, tơring groi kông hơtăih yăih; athei Anih tơm vei lăng pơtho pơhrăm jăh roi tơƀôh trong pơgơ̆r thi tốt nghiệp trung học phổ thông đơ̆ng sơnăm hŏk 2024-2025 vă dôm tơring kơchăng ƀiơ̆ lơ̆m tơdrong hơmet.

Phŏ Kơdră chĕp kơ̆l Kuô̆k hô̆i Trần Thanh Mẫn athei dêh char Bình Định hơnơ̆ng chĕp vei dôm tơdrong hlôi jang đei, hơmet pơ ‘lơ̆ng tơdrong tam mă pran đơ̆ng anih pơtho pơhrăm mă Khul dăr hlôi pơma tơƀôh; akŏm jơhngâm mong jên, tơ mam vă atŏk tơiung pơtho pơhrăm, tưk pran tơdrong tơplih hăm kơmăy sô̆ lơ̆m pơtho pơhrăm: “Hơtŏk tơdrong pơtho pơ’lơ̆ng ăn khul thây kô păng kăn ƀô̆ vei lăng tơ̆ jơ̆p tơring. Tưk pran tơdrong tơplih hăm kơmăy sô̆, iŏk yoa kơmăy kơmŏk rơgei, tơmât hơdai 'lơ̆ng dôm tơdrong jang, trong jang tơm đơ̆ng tĕh đak, dôm kơsô̆ jên mong akŏm trŏ luơ̆t lơ̆m tơpôl vă gơ̆h đei dơ̆ng kon jên tơmât ăn tơring kon pơlei kon kông, tơring pơmat tat”.

Khul dăr lăng đơ̆ng Anih chĕp kơ̆l pơgơ̆r Kuô̆k hô̆i akhan, tơdrong tơlĕch hla ar chih nơ̆r pơtho, roi tơƀôh bơ̆ jang tơdrong pơtho hŏk phô thŏng 2018 đơ̆ng dêh char Bình Định đei bơ̆ jang tơpăt ‘lơ̆ng, pơih trong jang chinh trĭ – trŏ luơ̆t tôch hiôk hian ăn dôm anih jang kơpal, tơring tơrang jang kiơ̆.

Lơ̆m khei ‘năr âu mơ̆n, Phŏ Kơdră chĕp kơ̆l Kuô̆k hô̆i Trần Thanh Mẫn kŭm hăm Khul dăr lăng đơ̆ng Anih chĕp kơ̆l pơgơ̆r Kuô̆k hô̆i hlôi bơ̆ jang hăm Anih vei lăng kon pơlei dêh char Hưng Yên găh tơdrong jang kiơ̆ Tơdrong tơchơ̆t đơ̆ng Kuô̆k hô̆i tơplih ‘nao tơdrong pơtho pơhrăm phô thŏng. Bí thư đảng dêh char Hưng Yên Nguyễn Hữu Nghĩa ăn tơbăt, dêh char hlôi pơ ‘nhŏ jên tơmât ăn tơdrong man hnam trưng, lăm hŏk, hăm đon pơhnŏng khŏm pơm lăp hăm tơdrong ‘mĕh vă hŏk pơhrăm đơ̆ng hŏk tro: “Đơ̆ng blŭng jăl jang nhôn hlôi tơlĕch tơdrong tơchơ̆t kơsô̆ 12 găh “Atŏk tơiung pơtho pơhrăm dêh char Hưng Yên truh sơnăm 2025 păng trong jang truh sơnăm 2030”. Tơdrong tơchơ̆t tơƀôh hơdăh rim tơdrong kăl, dôm tơdrong hơgăt vă atŏk tơiung tôch rơđăh, ưh lăp sek tơlang dôm tơdrong kăl găh anih jang, lăm hŏk đĕch mă oei tơmât hăm tơdrong pơgơ̆r pơtho hŏk, hla ar hŏk ‘nao tơ̆ hơnăp kơnh hai, akŏm lơ̆m 5 tơdrong tơm: mă mônh- kon bơngai, mă loi jĭ đe thây kô păng khul kăn ƀô̆ vei lăng pơtho pơhrăm; mă 2 ‘nŏh tơmam drăm, lăm hŏk; mă 3 ‘nŏh ƀơm truh jên vă jang; mă 4 ‘nŏh hơtŏk tơdrong krao hơvơn lơ̆m tơpôl păng mă 5 ‘nŏh ƀơm truh hơnăp jang, pơgơ̆r bơ̆ jang dôm tơdrong ‘nâu”.

Pơma pơtôch jơ bơ̆ jang, Phŏ Kơdră chĕp kơ̆l Kuô̆k hô̆i Trần Thanh Mẫn athei, tơ̆ hơnăp kơnh, dêh char Hưng Yên hơnơ̆ng hơlen năng trong tơprŏh jang, man hnam hŏk pơhrăm, vă set hơlen, hơmet ming pơm lăp ‘lơ̆ng hlŏh hăm tơdrong ‘mĕh vă đơ̆ng bơngai hŏk păng hơtŏk tơdrong 'lơ̆ng đơ̆ng pơtho pơhrăm: “Mong akŏm jên, tơmam ăn pơtho pơhrăm, athei tưk hơtŏk hlŏh dơ̆ng tơdrong krao hơvơn lơ̆m tơpôl. Hrei 'nâu đei lơ hnam trưng đơ̆ng kon pơlei pơjing kơdih, lơ thây kô pơtho tơ̆ 'ngoăih kơ hnam trưng tĕh đak pơjing 'nŏh bơ̆n ƀôh roi chơt hơiă, 'nă hal, mă lei bơ̆n athei vei lăng mă 'lơ̆ng. Klăih song hơnăp jang mă hơdăh, hơtŏk tơdrong kơchăng đơ̆ng kơdih, chĭu pŭ kơdih hăm rim anih pơtho pơhrăm, đang kơ 'nŏh hơtŏk tơdrong dăr lăng, sek tơlang tơdrong glăi tơ̆ anih pơtho pơhrăm”.