Iung pơma tơ̆ ‘măng tơƀơ̆p muh măt, Kơdră chĕp pơgŏr Kuô̆k hô̆i Vương Đình Huệ akhan, Kuô̆k hô̆i hlôi đei mĭnh sơnăm jơnei kơtang hăm 10 tơdrong pơgơ̆r gĭt kăl hlôi đei hơnih chih kơtơ̆ng ang rơih iŏk. Mă kăl, lơ̆m dôm năr bơ̆ jang blŭng a kơ sơnăm 2024, Kuô̆k hô̆i hlôi pơgơ̆r jơnei ‘Măng hop akom hăt hot mă 5, pơdrơ̆ng kiơ̆ lơ tơdrong kăl, mă kăl ‘noh pơdrơ̆ng kiơ̆ khôi luơ̆t Groi teh (hơmet ming) păng Khôi luơ̆t Rim hơnih ăn tŏk iŏk jên (hơmet ming), đei rim bơngai joăt jang, kon pơlei, hơnih mơdro sa lơ̆m păng teh đak đe hôn bơnê kơtang. Lơ̆m hơdrol năr pơdơ̆h têt Nguyên đán, Kơdră chĕp pơgơ̆r Kuô̆k hô̆i hlôi kĭ tơchơ̆t ƀar khôi luơ̆t gĭt kăl au.

Tang măt ăn Đảng đoàn Kuô̆k hô̆i, Hơnih bơ̆ jang Kuô̆k hô̆i, Kơdră chĕp pơgơ̆r Kuô̆k hô̆i hmach chơt hơ iă păng hôn bơnê rim kơdră tang măt, rim hơnih bơ̆ jang kơ Kuô̆k hô̆i, rim hơnih jang kơ Hơnih chĕp pơgơ̆r Kuô̆k hô̆i, kang ƀô̆ bơ̆ jang, bơngai jang kơ Hơnih bơ̆ jang Kuô̆k hô̆i tôch tơnăp, hơbĕch hơbal, tơchăr hơgei pơjing đei jang keh đang kơtang kơ sơnăm 2023.

          Pơma hơdăh, sơnăm 2024 ‘noh mĭnh sơnăm tôch gĭt kăl, jĭ sơnăm rim hơnih bơ̆ jang, tơring jei kơrŭn đĭ jơhngơ̆m vă jang keh đang trong tơlĕch jang găh mŭk drăm-tơpôl kơ jăl jang, Kơdră chĕp pơgơ̆r Kuô̆k hô̆i akhan, Kuôk hô̆i gơ̆h chơt hơ iă ‘nă hal găh dôm tơdrong jang iŏk đei jơnei lơ̆m sơnăm 2023, mă lei jei ưh kơ gơ̆h lăp đon, prăh prang. Tơchĕng hơ lau, tơdrong bơ̆ jang lơ̆m sơnăm au tôch kơ lơ, ‘ngoăih dôm tơdrong jang joăt joe lơ̆m bơ̆ jang pơjing khôi luơ̆t, dăr lăng, tơchơ̆t rim tơdrong kăl teh đak păng rim tơdrong bơ̆ jang anai, Hơnih bơ̆ jang Kuô̆k hô̆i oei hơdrin hloh dơ̆ng hơmet ăn vă lăng truh tơbăt 80 sơnăm năr Pơgơ̆r pôk rơ̆ih Kuô̆k hô̆i blŭng a. Kơ yuơ lơ loh, Kơdră chĕp pơgơ̆r Kuô̆k hô̆i Vương Đình Huệ pơkă:“Ĭnh hlôi pơma lơ ‘măng bơih ‘noh khei năr ‘noh kăl hloh. Kơ yuơ lơ loh, bơ̆n iung jang hloi đơ̆ng dôm năr blŭng, khei blŭng păng kiơ̆ dôm trong pơprŏ jang hlôi tơlĕch ăn. Bơ̆n hơnơ̆ng hơdrin vă Kuô̆k hô̆i roi năr roi bơ̆ jang ‘lơ̆ng, kơjăp, mă lei tơklep kơjăp lơ̆m tơdrong hơrih sa yan au, atŏk kơtang bơ̆ jang dăr lăng, vă trŏ lăp hăm tơdrong ‘meh vă yan au, sơđơ̆ng ăn bơ̆ jang kơ Kuô̆k hô̆i kơ yuơ trong jang kăl ‘noh đei iŏk yua ăn teh đak păng hơdrĕch hơdrung. Rim tơdrong jang tơm kơ Kuô̆k hô̆i ‘noh iŏk kon pơlei păng hơnih mơdro sa ‘noh kăl hloh. Hăm trong jang pơjing tơdrong chrih jing tơdrong troư lăp, tơtom, sơđơ̆ng ăn tơdrong ‘meh vă atŏk tơ iung teh đak tĕnh koăng, kơjăp ‘lơ̆ng păng mơ̆t hơdoi apŭng plĕnh teh”.

Kơdră chĕp pơgơ̆r Kuô̆k hô̆i pơkă athei rim hơnih jang kơ Hơnih chĕp pơgơ̆r Kuô̆k hô̆i, kang ƀô̆ bơ̆ jang, bơngai jang kơ Hơnih bơ̆ jang Kuô̆k hô̆i tơlĕch jang kiơ̆ kơtang nơ̆r pơrô̆ jang đơ̆ng Tổng bí thư Nguyễn Phú Trọng tơ̆ ‘măng tơƀơ̆p muh măt păng hmach Têt rim Kơdră chĕp pơgơ̆r, Kơdră so chĕp pơgơ̆r Đảng, Teh đak akhan: “Sơnăm 2023 hlôi tơgoăt tơgoăl bơih, sơnăm 2024 sa roi tơgoăt tơgoăl ‘lơ̆ng hơ iă hloh dơ̆ng”.

Ƀlep lơ̆m blŭng Puih mak sơnăm ‘nao, Kơdră chĕp pơgơ̆r Kuôk hô̆i Vương Đình Huệ hmach thơ thâu ăn rim kơdră tang măt Kuô̆k hô̆i, rim hơnih jang kơ Hơnih chĕp pơgơ̆r Kuô̆k hô̆i, kang ƀô̆ bơ̆ jang, bơngai jang kơ Hơnih bơ̆ jang Kuô̆k hô̆i đei mĭnh sơnăm Giáp Thìn hơnuk hơnoa.

Hơdrol kơ ‘noh, Tổng thư ký, Kơdră chĕp pơgơ̆r Hơnih bơ̆ jang Kuô̆k hô̆i Bùi Văn Cường hlôi đŏk tơbăt dôm tơdrong bơ̆ jang lơ̆m khei năr Têt Nguyên đán Giáp Thìn 2024. Kiơ̆ kơ ‘noh, Hơnih chĕp pơgơ̆r Kuô̆k hô̆i hlôi tơbăt, athei Khul kơdră chĕp pơgơ̆r Jơnŭm vei lăng Kon kông, rim Hơnih bơ̆ jang kơ Kuô̆k hô̆i, Hơnih jang Kuô̆k hô̆i, rim hơnih bơ̆ jang găh Hơnih chĕp pơgơ̆r Kuô̆k hô̆i jang kiơ̆ kơtang Nơ̆r athei jang kiơ̆ kơsô̆ 26 đơ̆ng Ban Bí thư, Nơ̆r athei jang kiơ̆ kơsô̆ 30 đơ̆ng Thủ tướng Teh đak, adoi pơkă athei jang kiơ̆ rim trong bơ̆ jang vei lăng năng tông hơrih sa tơpôl, vei lăng năng tông tơdrong hơrih sa kơ kang ƀô̆, bơngai jang, rim ŭnh hnam đei iŏk yua ăn teh đak, bơngai tơnap tap.

Rim tơdrong jang năm ngôi, hmach Têt đơ̆ng Kơdră chĕp pơgơ̆r Kuô̆k hô̆i, rim Kơ iĕng Kơdră chĕp pơgơ̆r Kuô̆k hô̆i, rim kơdră jang lơ̆m Hơnih chĕp pơgơ̆r Kuô̆k hô̆i ‘moi kiơ̆ tơdrong pơjao ăn, sơđơ̆ng ‘lơ̆ng hơ iă, pơkom, jơnei păng trŏ lăp hăm tơdrong đei yan au.

Rim hơnih jang kơ Kuô̆k hô̆i, hơnih bơ̆ jang găh Dơnŏ anih chĕp pơgơ̆r Kuô̆k hô̆i hlôi hơdrin tĕnh koăng pơjing tơlĕch jang kiơ̆ rim trong jang, trong pơprŏ jang tơlĕch bơ̆ jang sơnăm 2024 sơđơ̆ng ƀlep tơdrong pơkăp jang.