Kơdră Kuôk hô̆i Vương Đình Huệ tơbăt tơdrong ‘nâu ƀơ̆t iung pơma pơih blŭng ‘măng hop akŏm mă 28 kơ Anih jang chĕp kơ̆l pơgơ̆r Kuôk hô̆i pơgê ‘năr 13/12. ‘Măng hop akŏm pơgơ̆r lơ̆m 3 năr ‘năr 13,14 păng 18/12. Găh tơdrong ăn tơgop nơ̆r pơtôch ‘măng hop akŏm mă 6, Kơdră Kuôk hô̆i tơbăt, kiơ̆ tơdrong joăt gô hơlen lăng pơtôch tôm tơdrong kiơ̆ lơ̆m nơ̆r tơgop đơ̆ng bơngai tang măt păng bơngai tăh hla lăng hăm đei tơdrong kiơ kăl kơ lăng kiơ̆, mă loi ‘noh kăl kơ tơlih ‘nao kiơ vă hơtŏk ‘lơ̆ng đei yua đơ̆ng ‘măng hop akŏm.

Ƀơm truh tơdrong ăn tơgop nơ̆r tam mă tôm găh hơmet ăn ‘măng hop akŏm mă 7 (khei 5/2024), ƀok Vương Đình Huệ tơroi rơđăh âu ki đei 2 luơ̆t gĭt kăl Kuôk hô̆i tơchơ̆t tam mă pơdrơ̆ng kiơ̆ păng oei proh hơmet hơnih kơƀang teh đak, tơchơ̆t pơlong lăng trong jang tơgŭm hơdrô̆ ăn 3 tơdrong jang tơm teh đak kŭm nhen 1,2 tơdrong găh jên hu, jên jang oei đei găh tơdrong gơh jang đơ̆ng Kuôk hô̆i. Yua thoi noh, athei jô̆ truh tơdrong đei 1 ‘măng hop akŏm tơdrong jang (ưh kơ ê) vă hơmet pơ ‘lơ̆ng dôm tơdrong oei đei păng kăl ƀơ̆t măt.