Bơ̆ jang pôk tơmơ̆t kơdră chĕp pơgơ̆r hlôi đei jang kiơ̆ kơjăp ƀlep hăm tơdrong tơchơ̆t kơ đơ̆ng Đảng, khôi luơ̆t Teh đak, iŏk đei drơ̆ng mĭnh nơ̆r kơtang đơ̆ng rim kơdră tang măt Kuô̆k hô̆i. Kuô̆k hô̆i hlôi pơdrơ̆ng kiơ̆ Tơdrong Tơchơ̆t găh tơdrong kĭ tơchơ̆t pôk tơmơ̆t Kơ iĕng Thủ tướng hăm 432/432 ‘nu kơdră tang măt Kuô̆k hô̆i vang hop akŏm drơ̆ng nơ̆r. 3 ‘nu kơdră đei tơchơ̆t pôk tơmơ̆t iŏk jang kơchư̆k Thủ tướng ‘noh đei: Kơdră jang lơ̆m Hơnih tơm Chinh trĭ Nguyễn Hòa Bình, Kơdră jang lơ̆m Trung ương, Kơdră chĕp pơgơ̆r Hơnih jang jene hu Hồ Đức Phớc păng Kơdră jang lơ̆m Trung ương, Kơdră chĕp pơgơ̆r Hơnih tơm jang tơbôl Bùi Thành Sơn. Pôk tơmơ̆t jang Kơdră chĕp pơgơ̆r Hơnih tơm Tư pháp hăm ƀok Nguyễn Hải Ninh păng Kơdră chĕp pơgơ̆r Hơnih tơm jang vei lăng Mŭk drăm Bri brăh păng Cham char hăm ƀok Đỗ Đức Duy. 

Iung pơma pơtôch hop akom, tang măt ăn Kuô̆k hô̆i, Hơnih bơ̆ jang Kuô̆k hô̆i, Kơdră chĕp pơgơ̆r Kuô̆k hô̆i Trần Thanh Mẫn hôn bơnê tơdrong bơ̆ jang chĕp pơgơ̆r ‘lơ̆ng hơ iă đơ̆ng Khul kơdră chĕp pơgơ̆r Trung ương Đảng, Hơnih tơm Chinh trĭ, Ban Bí thư, mă kăl ‘noh Tổng Bí thư, Kơdră chĕp pơgơ̆r Teh đak Tô Lâm lơ̆m bơ̆ jang hơmet ăn păng pơgơ̆r ‘Măng hop akŏm. Rim kơdră tang măt Kuô̆k hô̆i hlôi hơtŏk hơnăp jang, pơma dơnuh tơpăt, tơchơ̆t bơ̆ jang pôk tơmơ̆t kơdră iŏk đei drơ̆ng mĭnh nơ̆r kơtang. Kơdră chĕp pơgơ̆r Kuô̆k hô̆i Trần Thanh Mẫn pơma hơdăh.“Bơ̆n lui kơtang, hăm trong chĕp pơgơ̆r đơ̆ng Đảng; tơ drong vang iung jang đơ̆ng pơđĭ khul chinh trĭ, rim hơnih jang; tơdrong kơrŭn đĭ ai đơ̆ng pơđĭ Đảng, pơđĭ kon pơlei, pơđĭ ƀô̆ đô̆i kŏng ang, tơpôl hơnih mơdro sa, kon pơlei teh đak bơ̆n oei tơ̆ teh đak đe, ưh kơ jor teh đak bơ̆n gô yak hloh tơdrong tơnap tap, tơdrong long, jang keh đang ‘lơ̆ng rim trong tơlĕch jang atŏk tơ iung mŭk drăm-tơpôl, sơđơ̆ng vei lăng teh đak, bơ̆ jang tơbôl păng tang găn sa pơgơ̆m pơjĭp, pơm tơdrong glăi kơ sơnăm 2024, tơgop jang kiơ̆ keh đang Tơdrong tơchơ̆t Pơm lêh hop akŏm lơ̆m teh đak ‘măng mă 13 kơ Đảng; hơmet ăn Pơm lêh hop akŏm Đảng rim hơnih, yak truh Pơm lêh hop akŏm lơ̆m teh đak ‘măng mă 14 kơ Đảng”.  

Lăp đơ̆ng rŏng pơtôch ‘măng hop akŏm, Hơnih bơ̆ jang Kuô̆k hô̆i pơgơ̆r hop akŏm tơbăt hăm khul chih kơtơ̆ng ang, tơroi tơbăt pơtôch ‘Măng hop akŏm.  Tổng Thư ký Kuô̆k hô̆i, Kơdră chĕp pơgơ̆r Hơnih bơ̆ jang Kuô̆k hô̆i Bùi Văn Cường tơbăt: ‘Măng hop akŏm ‘măng mă 8, Kuô̆k hô̆i jăl 15 hlôi jơnei keh kong, rim kơdră đei pôk tơmơ̆t păng pơgơ̆r pôk tơmơ̆t iŏk đei drơ̆ng nơ̆r kơtang:“Kơdră chĕp pơgơ̆r Teh đak ‘noh lơ̆m Tơdrong tơchơ̆t kơ Trung ương khei 10 ou gô pôk rơ̆ih. Kơdră chĕp pơgơ̆r Hơnih tơm jang jên hu gô iok jang hloi dĭng truh kĭ tơchơ̆t pôk tơmơ̆t Kơdră chĕp pơgơ̆r ‘nao. Găh Kơdră chĕp pơgơ̆r Hơnih tơm jang tơbôl ‘noh pơjao ‘noh Kơ iĕng Thủ tướng mă lei hơnơ̆ng iŏk jang Kơdră dơnơm, măt bơngai pơprŏ kơ rim kơdră lơ̆m Khul kơdră chĕp pơgơ̆r Teh đak, khei năr blŭng jăl jang ‘noh Tơdrong tơchơ̆t kơ Kuô̆k hô̆i pơprŏ đei 4 Kơ iĕng Thủ tướng, ou ki Kuô̆k hô̆i drơ̆ng nơ̆r đơ̆ng 4 Kơ iĕng Thủ tướng truh 5 ‘nu Kơ iĕng Thủ tướng. Hơnăn hlôi đei pôk tơmơ̆t bơih, 2 ‘nu Kơ iĕng Thủ tướng hlôi đei păng 3 ‘nu ‘nao đei kĭ tơchơ̆t đang ‘noh jing 5 ‘nu”.

Kơdră Hơnih bơ̆ jang Kơdră tang măt Nguyễn Thanh Hải jei tơbăt: kiơ̆ pơprŏ hơdrol đơ̆ng Trung ương, đơ̆ng dang ei truh đĭ sơnăm 2024 gô akŏm jang keh đang rim kơchư̆k kơdră kơpal păng kơdră jang găh đảng, kơdră chĕp pơgơ̆r tơring, vă atŏk kơtang hơnăp jang chĕp pơgơ̆r đơ̆ng Đảng hăm tơdrong jang atŏk tơ iung mŭk drăm-tơpôl, joh ayŏ, vei lăng sơđơ̆ng teh đak, sơđơ̆ng tơring, jang tơbôl păng hơmet ăn Pơm lêh hop akŏm Đảng rim hơnih yak truh Pơm lêh hop akŏm Đảng lơ̆m teh đak ‘măng mă 14 kơ Đảng. Tơdrong pôk hơtŏk tôm kơdră chĕp pơgơ̆r vă sơđơ̆ng ăn bơ̆ jang chinh trĭ keh kong hloh; tơgoăt mĭnh ƀơ̆r đon hloh; bơ̆ jang ‘lơ̆ng hơ iă hloh, jơnei hloh păng pơjing rơvơn hloh, ‘lơ̆ng hloh ăn atŏk tơ iung mŭk drăm-tơpôl; pơm hơtŏk tơdrong hơrih sa ‘lơ̆ng hơ iă kơ kon pơlei; atŏk kơtang tơgoăt kơjăp hăm kon pơlei, hơmet pơ ‘lơ̆ng jơhngơ̆m đon lui yom kơtang đơ̆ng kon pơlei hăm Đảng păng Teh đak: “Kang ƀô̆ hrei ou đei pơprŏ kiơ̆ trong jang đei tŏk, đei jur, đei mơ̆t, đei lĕch mơ̆ng kiơ̆ tơdrong bơ̆ jang păng gơh jang đơ̆ng rim kơdră. Tơdrong Kuô̆k hô̆i kĭ tơchơ̆t 3 Kơ iĕng  Thủ tướng, 2 ‘nu kơdră dơnơm năr ou, ‘moi kiơ̆ rim tơdrong tơchơ̆t đei hloh 90%, tơƀôh hơdăh “trong jang đơ̆ng Đảng, jơhngơ̆m đon kon pơlei”, “Đảng tơƀôh, kon pơlei pơlei pôk rơih” đei tơdrong tơgŭm djru, lui yom kơtang đơ̆ng kơdră tang măt Kuô̆k hô̆i ‘noh tang măt ăn kon pơlei”..