Găh dôm tơdrong vă jang tơm lơ̆m khei 2, Kơdră Kuô̆k hô̆i athei dôm anih jang akŏm jơhngâm hơmet mă ‘lơ̆ng ăn Hop akŏm Anih chĕp kơ̆l pơgơ̆r Kuô̆k hô̆i (vă pơgơ̆r lơ̆m 4 năr); atŭm hăm ‘nŏh ‘moi kiơ̆ tơdrong vă jang đơ̆ng Đảng khul Kuô̆k hô̆i bơ̆ jang kiơ̆ tơdrong Tơchơ̆t đơ̆ng Hop akŏm Đảng lơ̆m tĕh đak ‘măng mă XIII. Mĭnh tơdrong tôch gĭt kăl nai ‘nŏh jĭ Hop akŏm lơ̆m tĕh đak pơtôch tơdrong jang đơ̆ng Jơnŭm pơgơ̆r kon pơlei dôm dêh char, plt găh Trung ương (vă pơgơ̆r tơ̆ Quảng Ninh).

Găh dôm tơdrong jang lơ̆m jăl khei mă 1 păng prăt sơnăm, Kơdră Kuô̆k hô̆i Vương Đình Huệ athei Anih chih pơjing luơ̆t pơgơ̆r tơlĕch tơdrong jang chih pơjing luơ̆t, tơdrong tơchơ̆t sơnăm 2024, hơmet ming Tơdrong jang chih pơjing luơ̆t, tơdrong tơchơ̆t sơnăm 2023, dôm anih jang nai kơ chăng jang hơdoi hăm dôm anih jang kơpal vă tơlĕch dôm tơdrong jang tơroi ăn Anih chĕp kơ̆l pơgơ̆r Kuô̆k hô̆i, Kuô̆k hô̆i kiơ̆ hơnăp jang.

Hơdrô̆ Luơ̆t tĕh (oei chih hơmet), Kơdră Kuô̆k hô̆i athei dôm anih jang ‘moi kiơ̆ tơdrong tơchơ̆t đơ̆ng Anih chĕp kơ̆l pơgơ̆r Kuô̆k hô̆i chă iŏk nơ̆r tơgop đơ̆ng kon pơlei, kiơ̆ đon pơhnŏng, adrin tôch ai, chih pơkĕh păng tơroi ăn Anih chĕp kơ̆l pơgơ̆r Kuô̆k hô̆i lơ̆m khei 3. Ƀơm truh tơdrong dăr lăng, Kơdră Kuô̆k hô̆i Vương Đình Huệ pơma tơƀôh trong: “Tơlĕch dôm tơdrong jang dăr lăng lơ̆m sơnăm ‘nâu, 4 tơdrong jang athei dăr lăng tơm nhen: unh hơyuh; Kơsơ̆p hla ar hŏk, hla ar pơtho hŏk; 3 tơdrong jang tơm kơ tĕh đak; dôm tơdrong jang pơgang, đĭ đăng tơdrong 'nâu tơtă pơmat tat păng tôch tơtŏ đon; hơnơ̆ng hơtŏk tơdrong dăr lăng găh tơdrong jang mŭk drăm lơ̆m tĕh đak, dôm anih jang găh jên hu, chứng khoán, anih tĕch mơdro tĕh, hnam oei, anih tĕch trái phiếu. Anih vei lăng hơdrĕch kon kông, dôm anih tơchĕng hơlen vă chă rơih dôm tơdrong kăl akŏm jơhngâm tơblang tơƀôh, apinh jet dôm tơdrong oei tơtŏ hrĕi 'nâu, nhen tơdrong khăm hơlen gre 'nŏh jĭ tơdrong tôch tơtŏ đon. Dôm tơdrong 'nâu, tơdăh gô Kuô̆k hô̆i apinh jet 'nŏh jing hiơ̆, kơna athei jăh bơ̆ jang hloi. Yoa thoi nŏh, Anih vei lăng hơdrĕch kon kông, dôm anih jang ăn Kuô̆k hô̆i chă rơih dôm tơdrong kăl tơpă, lăp hăm tơdrong arih xa, lê̆ ăn đei tơdrong jang đang 'nŏh lê̆ ƀât dŏh, kŭm ưh đei yoa yă kiơ. Mưh đei tơdrong ‘nao 'nŏh bơ̆n athei đei trong jang 'nao 'năi”.

Kiơ̆ trong vă jang, Anih chĕp kơ̆l pơgơ̆r Kuô̆k hô̆i, Kuô̆k hô̆i vă pơgơ̆r apinh jet, hơlen năng rim tơdrong ‘nao đei lơ̆m tơdrong arih xa, Kơdră Kuô̆k hô̆i tơtă athei tơlĕch trong chă rơih dôm tơdrong mă trŏ, mă lăp, đei yoa tơ̆ yăn âu kŭm nhen hơnơ̆ng tơchĕng hơlen vă tơplih 'nao trong jang păng trong pơgơ̆r apinh jet.

“Apinh jet ưh kơsơ̆ vă pơhle ngơ̆r, pơm pơmat ăn ƀok Kơdră, bơ ngai chĕp kơ̆l anih jang mă vă kŭm hăm băl pơm hơdăh rim tơdrong vă sek tơlang dôm tơdrong kăl đei tơlĕch lơ̆m tơdrong arih xa. Roi tơbăt rơđăh rơđong, pơm hơdăh rim tơdrong, chă đei trong jang vă hơmet pơ ‘lơ̆ng pơmat tat. Găh tơdrong hơmet ăn dôm tơdrong vă dăr lăng lơ̆m sơnăm đơ̆ng rŏng, kiơ̆ inh, bơ̆n dăr lăng tơdrong bơ̆ jang dôm tơdrong tơchơ̆t găh jang tơiung ming păng atŏk tơiung mŭk drăm, dôm tơdrong jang tơm kơ tĕh đak, dôm tơdrong tơchơ̆t đơ̆ng Trung ương, tơdrong Tơchơ̆t đơ̆ng Kuô̆k hô̆i, đơ̆ng rŏng kơ ‘nŏh Khul kơdră tĕh đak tơlĕch dôm tơdrong jang, trong jang vă pơgơ̆r bơ̆ jang; hơlen năng dơ̆ng tơdrong jang dăr lăng kiơ̆ dôm hla-ar chih hơgăt luơ̆t đơ̆ng Anih vei lăng hơdrĕch kon kông, dôm anih jang găh tơlĕch trong bơ̆ jang dăr lăng mă kiơ̆ tơdrong tơchơ̆t nơ̆r pơtho đơ̆ng Anih chĕp kơ̆l pơgơ̆r Kuô̆k hô̆i hăm Jơnŭm pơgơ̆r kon pơlei jơ̆p tơring, dăh mă tơdrong tơmât jên jang kơ tĕh đak tơ̆ hơnăp kơnh 'nŏh kăl hơlen năng mă tôm, vă hơlen năng yoa kiơ mă oei hơnơ̆ng “hiơ̆ hyĭn” thoi nŏh”.

Sơnăm ‘nâu, Kuô̆k hô̆i vă pơgơ̆r iŏk kơphĭu lui dăh ưh hăm dôm kơchư̆k yoa Kuô̆k hô̆i pôk hơtŏk păng kĭ ăn, yoa thoi nŏh, Kơdră Kuô̆k hô̆i pơma hơdăh, tơdrong jang hơmet vă bơngai tang măt Kuô̆k hô̆i hơlen năng trŏ hăm tơdrong lui dang yơ hăm dôm kơchư̆k jang kŭm jing hơnăp jang gĭt kăl đơ̆ng Anih vei lăng hơdrĕch kon kông, dôm Anih jang, Khul grŭp lơ̆m Anih chĕp kơ̆l pơgơ̆r Kuô̆k hô̆i. Kơdră Kuô̆k hô̆i oei athei hơmet mă 'lơ̆ng păng mă hrôih ăn dôm tơdrong chih hơgăt tơlĕch jên jang, jên vă thu mong păng tơlĕch jang kơ tĕh đak; tơdrong jang tơbôl đơ̆ng ngĭ viê̆n, lơ̆m nŏh đei dôm 'măng năm hơpong tơ̆ tĕh đak đe đơ̆ng Kơdră, Phŏ kơdră Kuô̆k hô̆i, Hop akŏm ngĭ si mơlôh lơ̆m plei tĕh yoa tĕh đak bơ̆n pơgơ̆r.