VOV4.Bahnar - Năr 28/10, rim bơngai tang măt ăn Kuôk hô̆i pơtoi pơma đam tơ̆ Hnam akŏm găh tơdrong đei jơnei lơ̆m pơkăp hơtŏk mŭk drăm – tơpôl xơnăm; kơchĕng pơkăp hơtŏk mŭk drăm – tơpôl xơnăm 2023; Tơdrong pơm kiơ̆ pơkăp jên mong kơ teh đak xơnăm 2022, xơkơ̆t jên mong kơ teh đak, pơkăp axong jang kŏng kiơ̆ jên mong kơ teh đak, trong pơkăp axong jên mong trung ương xơnăm 2023. 

Rim bơngai tang măt vang akŏm pơma đam

Lơ̆m 'măng hop akŏm ăh pơgê, rim bơngai tang măt tơlĕch trong jang vă tơjră tơtom hăm kơjă đak xăng đak dâu tŏk kăp; xek tơlang dôm tơdrong jang ưh đei yua; pơkăl pơih xă tơdrong pơkăp mă lei tơguăt hăm tơdrong đei jơnei lơ̆m axong jang kŏng vă tang găn hiong răm ưh đei xơđơ̆ng hăm mŭk drăm.   

        Ƀô̆ trưởng Anih tơm Y tê̆ Đào Hồng Lan tơblang tơ̆ anăp Kuôk hô̆i

Tơ̆ hop akŏm, rim bơngai tang măt duh pơkăl hơlen axong pơtoi pơdui khei năr iŏk yua hla bar pơkăp găh pơgang vă pơklaih tơnap tap hrôih hloh găh tơdrong ưh kơ măh pơgang, tơmam drăm y tê̆, xơđơ̆ng khăm hơmet jĭ ăn kon pơlei. Rim bơngai tang măt xơkơ̆t: ưh đei pơgang vă hơmet jĭ jing tơdrong jang ưh hơƀăp hăm kon pơlei.