Mơ̆t đảng đơ̆ng sơnăm 26 sơnăm, pơm bí chư chi bộ pơlei đơ̆ng sơnăm 30 sơnăm păng đơ̆ng noh truh dang ei, ‘nhŏng  K’Boer bí thư chi bộ plei B’Dơr, xăh Lộc An, apŭng Bảo Lâm (Lâm Đồng) oei tơjê̆ kon pơlei. Sư kŭm hăm dôm bơngai jang lơ̆m chi bộ păng kon pơlei lơ̆m pơlei hơdrin tơplih hơmet ming ‘long pơtăm, kon tơrong, hơtŏk tơiung mŭk drăm, pơjing tơdrong arih ‘lơ̆ng hơiă.

Kiơ̆ kơ ƀok K’Đèo, mĭnh ‘nu bơngai đe lui yom tơ̆ plei B’Dơr, truh dang ei, tơdrong arih sa ‘lơ̆ng hơiă đơ̆ng kon pơlei lơ̆m pơlei đei hơtŏk ‘lơ̆ng rơ đăh rơ đong. Dôm tơdrong pơ kăp pơ jing tơdrong arih sa ‘nao, tơring kon pơlei ‘lơ̆ng rŏ đei pơlei pơla lăp đon jang kiơ̆ păng hơdrin vang pơ jing. Ƀok  K’Đèo akhan, tơplih ‘nao âu đei tơdrong tơgop jơhngơ̆m tôch kơ ‘lơ̆ng đơ̆ng K’Boer - Bí thư chi bộ pơlei: “Lăng ƀôh đei hơdăh đơ̆ng tơdrong hơtŏk hơiung pơlei pơla ‘noh tôch kơ chhôk. Kŭm gơnang đơ̆ng tơdrong bơngơ̆t truh pơgơ̆r đơ̆ng xăh, mă loi ‘noh jĭ ‘nhŏng Bí thư chi bộ K’Boer, sơnăm mơ lôh thoi noh mă lei đei tơdrong jang ‘lơ̆ng thoi noh... nhôn tơgŭm dêh.”

Hăm dôm đảng viên lơ̆m chi bộ pơlei, ‘nhŏng K’boer kŭm jing bí thư ling lang đĭ jĭ jơhngơ̆m lơ̆m tơdrong jang păng đei lơ pơcheh hơgei. Ka Thủy, mĭnh ‘nu đảng viên lơ̆m chi bộ tơbăt, lơ̆m dôm ‘măng hŏk hôp đảng, ‘nhŏng K’Boer đa hơvơn dơ̆ng kang ƀô̆ pơlei, kră pơ lei, bơngai đei đe lui yom lơ̆m tơpôl kon pơlei oei vă vang jang, pơtho dơnuh, tơroi, chă trong hơmet pơ ‘lơ̆ng dôm tơdrong kăl, đơ̆ng noh pơm đei tơdrong drơ̆ng lăp ‘lơ̆ng păng yak mơ̆t bơ̆jang đei iŏk yua ‘lơ̆ng. Mă hơdăh ‘noh, athei tơroi truh tơdrong krao hơvơn kon pơlei plang song teh, tơgop năr jang, jên, mŭk drăm kŭm hăm teh đak ming man đang hloh 20km trong năm lơ̆m pơlei, hloh 15 km trong năm chŭn na:“Bí thư Chi bộ K’Boer ‘noh jĭ bơngai đảng viên ling lang năm hơdrol, năm tơ ƀơ̆p kơ tă kon pơlei vă tơ roi tơbăt, krao hơvơn ăn kon pơlei hlôh. Ling lang vang tơgop lơ nơ̆r vă pơjing, hơnhăk chi bộ hơtŏk tơiung ‘lơ̆ng”.

Plei B’Dơr đei hloh 98% kon pơlei oei ‘noh bơngai K’Ho. Hơdrol sơ̆, ‘ngoăih kơ tơdrong choh jang sa oei tam mă gan hlôh vao, lơ tơdrong jang, tơdrong joăt so ưh kơ ‘lơ̆ng oei đei, tơdrong arih sa mŭk drăm mơmat tat. Dang ei, đon tơchĕng jang sa đơ̆ng kon pơlei hlôi đei tơplih lơ, jang sa jơnei hăm dôm hơdrĕch hla che, cheh phe ‘lơ̆ng, pơtăm hơlam dôm kơ loăi ‘long sa plei nhen ƀơ, sầu riêng… Gơnang đơ̆ng noh, iŏk yua lơ̆m 1 hơgăt teh pơtăm hlôi iŏk đei jô̆ păh lăp hloh 150 triệu hlak jên 1 hek tar 1 sơnăm, kơ sô̆ ŭnh hnam dơnuh hin đơ̆ng 30% dang ei lăp oei pă hơla kơ 2%.

Kiơ̆ kơ yă Trịnh Thị Vân, Phŏ Bí thư anih jang Đảng xăh Lộc An, ‘nhŏng K’Boer ‘noh jĭ mĭnh bí thư chi bộ hơgei lơ̆m hŏk pơhrăm păng pơm kiơ̆ jơhngơ̆m đon ‘lơ̆ng đơ̆ng ƀok Hồ. Hăm kơchư̆k jang pơm Bí thư chi bộ, kơ dih kâu sư ling lang hơdrin ‘noh jĭ hơnih 1 jơhngơ̆m đon, pơm jŭk yŭk trong hơlâu bơ̆ jang kiơ̆ păng jang đang rim hơnăp jang đei pơ jao: “K’Boer ‘noh jĭ bơngai đảng viên, Bí thư chi bộ plei B’Dơr, jĭ 1 ‘nu bơngai tôch kơ tơnăp, hơbĕch hơbal, pơ̆n tơchĕng, pơ̆n pơma, pơ̆n jang păng pơ̆n pŭ hơnăp jang. Hơtŏk ‘lơ̆ng hơnăp jang chĕp kơ̆l, pơgơ̆r, kon pơlei lơ̆m pơlei pơm kiơ̆ ‘lơ̆ng rim trong jang, tơdrong jang tơgŭm đơ̆ng Đảng, khôi luơ̆t đơ̆ng teh đak păng dôm tơdrong hơgăt đơ̆ng tơring. Arih ‘lơ̆ng lui kơ jăp.”

Plei B’Dơr dang ei đei vă jê̆ 500 ŭnh hnam, hloh 2.000 ‘nu bơngai. Kon pơlei lơ̆m pơlei ling lang pơm kiơ̆ ‘lơ̆ng trong jang đơ̆ng Đảng, tơdrong jang tơgŭm, khôi luơ̆t đơ̆ng Teh đak, pơ̆n tơmơ̆t jên jang hơtŏk tơiung pơm tơlĕch, hơdrin vang tơgŭm pơ jing tơring tơrang ‘nao. Sơnăm 2021, plei B’Dơr đei drơ̆ng ăn ‘noh jĭ Tơring kon pơlei oei sa ‘lơ̆ng hơiă kơ xăh Lộc An păng dang ei ‘noh pơlei hơgei đei ƀôh lơ tơdrong jang hơiă, tơdrong jang đei iŏk yua đơ̆ng đĭ đăng tơpôl păng rim bơngai.

‘Nhŏng K’Boer, Bí thư Chi bộ plei B’Dơr tơroi, hăm hơnăp jang đơ̆ng kơdih kâu, sư gô oei hơnơ̆ng hơdrin lơ hloh dơ̆ngvang plang jơhngơ̆m, tơgop ăn tơdrong hơtŏk tơiung kơ tơring sư: “Ĭnh lăng kăl hloh găh tơdrong jang mŭk drăm, pơm liơ ăn pơlei pơla nhôn tơjur đei kơ sô̆ ŭnh hnam dơnuh hin, hơtŏk kơ sô̆ ŭnh hnam pơdrŏng păng đei ƀôh. Tơdrong ‘noh athei nhôn băt pơ jing dôm tơdrong tơchơ̆t lăp hăm tơdrong yan âu kơ tơring”.

Hăm tơdrong hơdrin lơ̆m tơdrong pơjing tơdrong jang chĭnh trĭ tơ̆ tơring, tơgop đĭ jơhngơ̆m ăn tơdrong jang hơtŏk tơiung kơ pơlei pơla, K’Boer hlôi lơ sơnăm tơtil đei iŏk bằng khen đơ̆ng Anih pơgơ̆r jang Tây Nguyên găh jơnei ‘lơ̆ng hloh lơ̆m tơdrong jang pơjing Đảng. K’Boer oei chơt hơiă đei Kơdră Anih vei lăng kon pơlei dêh char Lâm Đồng hơpăh Bằng khen yua kơ đei jơnei ‘lơ̆ng hloh lơ̆m hŏk pơhrăm păng pơm kiơ̆ jơhngơ̆m đon ‘lơ̆ng đơ̆ng ƀok Hồ jăl jang 2016 - 2022./.