‘Năr brei (26/3), Khŭl vei lăng drŏ kăn Việt Nam păng Khŭl pơgơ̆r khŭl lui Phât Việt Nam dêh char Kon Tum pơgơ̆r kĭ tơchơ̆t Tơdrong jang hơdai jăl jang 2024 - 2025. Kiơ̆ kơ ‘noh, 2 păh jang hơdai krao hơvơn ƀok phât, tăng ni mơlôh păng hơdruh tơdăm lui Phât arih ‘lơ̆ng lui kơjăp, pơm kiơ̆ tơdrong gơh jang đơ̆ng kon pơlei; hơdrin vang jang hơtŏk tơiung mŭk drăm - tơpôl, vei sơđơ̆ng chĭnh trĭ, sơđơ̆ng tơpôl; krao hơvơn kon jên vei lăng ăn hơdruh tơdăm hơioh đei tơdrong arih sa mơmat tat.

Kŭm ƀlep ƀơ̆t tơbăt 93 sơnăm năr pơjing Đoàn hơdruh tơdăm CS Hồ Chí Minh, lơ anih jang Đoàn tơ̆ dêh char Kon Tum pơgơ̆r tơmơ̆t đoàn viên ‘nao; tơdrong jang truh hăm hơnih ƀrê; năm ngôi asong tơmam ăn ŭnh hnam teh đak tơgŭm, bơngai kră oei sa hơdrô̆; iung jang tơgŭm yua kơ tơdrong arih sa tơpôl.