Pơgê năr 26/7, Trung tướng Thái Đại Ngọc, Tư lệnh Quân khu 5 atŭm hăm Khul bơ̆ jang Quân khu 5 hlôi năm ngôi, pôk tơmam drăm ăn Yă Mĕ Việt Nam nuih mơng, ŭnh hnam đei iŏk yua ăn teh đak, ƀô̆ đô̆i rơka lơ̆m kuâ̆n Cẩm Lệ păng apŭng Hoà Vang, pơlei tơm Đà Nẵng.

Tang măt ăn kang ƀô̆, ƀô̆ đô̆i Quân khu 5, Trung tướng Thái Đại Ngọc tơbăt jơhngơ̆m đon ‘mêm kơ eng kơtang hăm rim yă Mĕ Việt Nam nuih mơng, ƀô̆ đô̆i rơka, ƀô̆ đô̆i so, ŭnh hnam đei iŏk yau ăn teh đak hlôi plang ăn pham lĕch sĕch huŏng ăn tơdrong bơ̆ jang iung tơblăh kĕch mang, teh đak rơngei keh kong. Lơ̆m tơring Quân khu 5, hloh 180.000 ‘nu ƀô̆ đô̆i lôch dŏng teh đak, 176.000 ‘nu ƀô̆ đô̆i so, ƀô̆ đô̆i rơka hlôi plang ăn pham lĕch sĕch huŏng lơ̆m ƀar ‘măng iung tơblăh tang găn Phalăng păng ayăt Mi. Hrei au, Quân khu 5 hơnơ̆ng ăn 3 khul năm tơchă kôch akŏm kơting ƀô̆ đô̆i lôch dŏng teh đak iung jang năm tơchă kôch akŏm tơ̆ 2 teh đak boăl Lào păng Campuchia. 

 Anih Pơtrŭt choh jang sa kơ teh đak 'nao truh apong, asong tơmam ăn dôm unh hnam kon kông tơgŭm jơhngơ̆m ăn kăch mang tơ̆ săh Quảng Nhân, apŭng A Lưới, Thừa Thiên Huế. Tơ̆ thôn Pi Ân 2, khul kơpal truh apong păng ăn tơmam kơ yă Kăn Nghĩah (97 sơnăm) bơngai Pa Cô. Yă Kăn Nghĩah hlôi đei lơ tơgop ăn 2 tơdrong iung tơjră dŏng t/đ. Adoi tơ̆ thôn Pi Ân 2, Khul kơpal hlôi truh apong păng ăn tơmam kơ yă Kăn Cần (92 sơnăm). Yă Cần 'noh bơngai Pa Cô oei lơ̆m tơchơ̆t tơgŭm, đei kŏng hăm kăch mang atŭm hăm noh jing unh hnam hin dơnuh tơ̆ săh Quảng Nhâm, apŭng A Lưới.

Tơ̆ tơring Tây Nguyên, jei đei lơ tơdrong jang “nhă đak chăm kơ tu”. Tơ̆ apŭng Đăk Glei, dêh char Kon Tum, Công ty Ŭnh hơyuh Kon Tum pơgơ̆r Pơm lêh et hơtŏk păng pơjao 6 pơbŭng hnam ‘mêm mơnat atŭm hăm lơ tơmam drăm ăn rim ŭnh hnam dơnuh, ŭnh hnam kon kông hơrih sa tơnap tap, ŭnh hnam đei iŏk yua ăn teh đak, đei iŏk yua ăn kĕch mang tơ̆ 2 tơring Mường Hoong păng Ngọc Linh. Tơ̆ tơring sơlam teh đak Ia Rvê, apŭng Ea Súp, Khul kơdră chĕp pơgơ̆r Hơnih Ƀô̆ đô̆i vei lăng sơlam teh đak kơ dêh char Đak Lăk jei ‘nao iung jang hơdoi hăm mĭnh ƀar hơnih jang pơgơ̆r et hơtŏk păng pơjao “Hnam tơgoăt tơgoăl ƀô̆ đô̆i kon pơlei” ăn ŭnh hnam ƀok Phan Thanh Sang. Pơbŭng hnam kơjă kơjên 210 triu hlak jên. Lơ̆m au, 100 triu hlak jên kơ yuơ kang ƀô̆, ƀô̆ đô̆i rim hơnih ƀô̆ đô̆i vang chă tơra tơgop, pă dôm yơ ‘nŏh kon jên kơ dih ŭnh hnam ƀok, kơtum kơtŏng vang tơgum djru; kang ƀô̆, ƀô̆ đô̆i găh Kơđông ƀô̆ đô̆i vei lăng sơlam teh đak Ia Rvê tơgŭm năr jang ming man.