Kiơ̆ tơdrong hơgăt đơ̆ng luơ̆t ƀao hiêm tơpôl hrei ‘nâu, dôm bơngai nôp jên ƀao hiêm tơpôl hlŏh 35 sơnăm hăm drŏ nglo păng hlŏh 30 sơnăm hăm drŏ kăn mưh pơdơ̆h hưu, ‘ngoăih kơ jên hưu rim khei đe sư oei đei xa jên tơgŭm 1 vât mưh pơdơ̆h hưu ăn dôm sơnăm nôp Ƀao hiêm tơpôl rơkăh sơnăm hơgăt hơtŏ hăm jên hưu tôch đa ‘nŏh 75%. Mă hơdăh, jên tơgŭm 1 vât ‘nŏh: Hăm 1 sơnăm rơkăh, đei jô̆ dang 1 puăt jên khei đei xa adrol ki.

Ƀok Nguyễn Duy Cường, phŏ Kơdră Anih vei lăng ƀao hiêm tơpôl, găh Anih tơm vei lăng bơngai jang, linh jĭ rơka păng tơpôl ăn tơbăt: “Hăm tơdrong hơgăt oei yoa hrei ‘nâu, mă tơpă tơ̆ 1,2 anih jang, anih tĕch mơdro, mưh bơngai jang truh sơnăm pơdơ̆h hưu bơih păng răt ƀao hiêm tơpôl tôm gơ̆h xa jên hưu tôch ai 75% bơih, ‘nŏh bơngai đa pơdơ̆h jang vă pơm hla ar xa jên hưu hăm anih Ƀao hiêm tơpôl. Đang kơ ‘nŏh đe bơ̆  jang dơ̆ng, yoa akhan răt tôm sơnăm, xa jên hơ tôch đa 75% bơih, đei tôm tơdrong kăl vă gơ̆h xa jên hưu bơih. Kơlih thoi noh kư̆ pơdơ̆h hưu ‘mơ̆i đơ̆ng rŏng kơ ‘nŏh pơm hla ar bơ̆ jang dơ̆ng. Vă akhan hăm tơdrong hơgăt hrei ‘nâu lơ̆m tơdrong tơgŭm mưh răt ƀao hiêm tơpôl ưh đei chih tơdrong pơlung, pơhlŭ dôm bơngai thoi nŏh vă đe sư hơnơ̆ng bơ̆ jang vang răt dơ̆ng ƀao hiêm tơpôl.”

Găh tơdrong hơgăt tơjur sơnăm nôp ƀao hiêm tơpôl tôch ai vă gơ̆h xa jên hưu đơ̆ng 20 sơnăm jur pă 15 sơnăm tŏk bŏk iŏk đei tơdrong tơrĕk tôch dêh đơ̆ng tơpôl. Ƀok Nguyễn Duy Cường ăn tơbăt, tơdrong hơgăt ‘nâu vă pơjing tơdrong ‘lơ̆ng ăn dôm bơngai răt ƀao hiêm klui (đơ̆ng 45- 47 sơnăm ‘nao pơtơm răt) dăh mă dôm bơngai răt ƀao hiêm ưh đei hơnơ̆ng rim sơnăm truh sơnăm pơdơ̆h hưu mă lei tam mă tôm 20 sơnăm răt ƀao hiêm tơpôl kŭm đei xa jên hưu rim khei. Thoi noh, dôm bơngai âu adrol ki ưh đei xa jên hưu, hrei ‘nâu gơ̆h xa jên hưu rim khei bơih; jên hưu dôm yơ gô đei tĕh đak jô̆ hơmet, atŭm hăm ‘nŏh lơ̆m khei ‘năr xa jên hưu gô đei anih ƀao hiêm tơpôl răt ăn the ƀao hiêm y tê̆.

Vă pơlung bơngai jang hơnơ̆ng răt ƀao hiêm tơpôl đơ̆ng rŏng kơ sơnăm pơdơ̆h hưu, vă hơtŏk ƀiơ̆ jên hưu, hơtŏk tơdrong đei yoa ăn bơngai jang hai, vang vei lăng ‘lơ̆ng ƀiơ̆ ăn bơngai jang mưh oei bơ̆ jang, Luơ̆t ƀao hiêm tơpôl (oei chih hơmet) chă iŏk nơ̆r tơgop hăm 2 trong jang, đei hơmet ming tơdrong hơgăt găh tơdrong tơgŭm xa jên 1 vât mưh pơdơ̆h hưu vă pơlung bơngai jang răt dơ̆ng ƀao hiêm tơpôl đơ̆ng rŏng kơ sơnăm pơdơ̆h hưu. Trong jang mă 1 chih: Jên tơgŭm xa jên 1 vât mưh pơdơ̆h hưu đei jô̆ kiơ̆ sơnăm răt ƀao hiêm tơpôl rơkăh sơnăm hơgăt vă xa tôm jên hưu 75%, 1 sơnăm nôp ƀao hiêm tơpôl rơkăh đei jô̆ 1 puăt jên khei sư xa ƀât oei răt ƀao hiêm tơpôl ki.

Trong mă 2 chih: Jên tơgŭm xa 1 vât mưh pơdơ̆h hưu đei jô̆ kiơ̆ sơnăm nôp ƀao hiêm tơpôl rơkăh kơsô̆ sơnăm hơgăt vă xa tôm 75% jên hưu, 1 sơnăm nôp ƀao hiêm tơpôl đei jô̆ dang 1 puăt jên khei sư xa lơ̆m khei ‘năr răt ƀao hiêm tơpôl. Hăm bơngai jang hlôi đei tôm tơdrong kăl vă gơ̆h xa jên hưu kiơ̆ tơdrong hơgăt tơ̆ Apăng 71 păng Apăng 72 lơ̆m luơ̆t ‘nâu mă oei nôp dơ̆ng jên ƀao hiêm tơpôl ‘nŏh 1 sơnăm nôp ƀao hiiêm tơpôl đơ̆ng rŏng sơnăm pơdơ̆h hưu, nôp rơkăh kơsô̆ sơnăm hơgăt vă xa jên hưu 75% ‘nŏh đei jô dang 02 ‘măng jên khei sư xa ƀât oei jang răt ƀao hiêm tơpôl ki. 

Ƀok Nguyễn Duy Cường, phŏ Kơdră Anih vei lăng ƀao hiêm tơpôl, găh Anih tơm vei lăng bơngai jang, linh jĭ rơka păng tơpôl ăn tơbăt dơ̆ng: “Lơ̆m luơ̆t ƀao hiêm tơpôl (oei chih hơmet) ‘nŏh oei athei chă iŏk nơ̆r tơgop ăn 2 trong jang ‘nâu. Lơ̆m nŏh đei chih dơ̆ng 1 tơdrong hơgăt ‘nŏh jĭ: Hăm dôm bơngai jang oei hơnơ̆ng bơ̆ jang đơ̆ng rŏng kơ sơnăm pơdơ̆h hưu, sơnăm nôp ƀao hiêm tơpôl đơ̆ng rŏng kơ sơnăm pơdơ̆h hưu rơkăh hăm kơsô̆ sơnăm nôp vă xa tôm 75% jên hưu ‘nŏh, 1 sơnăm nôp rơkăh gô đei jô̆ dang 2 ‘măng jên khei tơplih ăn lăp 1 puăt jên khei nhen tơdrong hơgăt oei yoa hrei ‘nâu. Hăm tơdrong hơgăt âu, vă pơlung dôm bơngai jang hơnơ̆ng răt ƀao hiêm tơpôl đơ̆ng rŏng kơ sơnăm pơdơ̆h. Tơdrong bơngai jang hơnơ̆ng răt ƀao hiêm tơpôl đơ̆ng rŏng kơ sơnăm pơdơ̆h hưu ‘nŏh: Mă mônh vă vei lăng ‘lơ̆ng ƀiơ̆ tơdrong đei yoa ăn bơngai vang răt, kơlih yoa ning mônh kơnh jên hưu rŏ năng gô tŏk ƀiơ̆; mă 2 lơ̆m khei ‘năr bơ̆ jang đơ̆ng rŏng kơ sơnăm pơdơ̆h hưu, yoa bơngai jang oei răt ƀao hiêm kơna đe gơ̆h xa dôm tơdrong đei yoa nai, dôm tơdrong tơgŭm nai hai, pơtih gia dôm tơdrong tơgŭm ƀơm truh jĭ jăn kŭm đei vei lăng ‘lơ̆ng ƀiơ̆ ‘năi.