VOV4.Bahnar - Dơnŏ anĭh tơm vei lăng Tơdrong jang, Bơngai rơka păng Tơpôl ‘nao đei Hla bơar pơtrŭh ăn Thủ tướng tĕh đak găh tơdrong pơtrŭh ăn Kơdră chĕp pơgơ̆r tĕh đak pôk tơmam drăm ăn bơngai đei iŏk yau ăn kĕch mang ƀlep lơ̆m năr tơbăt 75 sơnăm Năr Bơngai rơka-lôch dŏng tĕh đak (27/7). Kiơ̆ kơ ‘nŏh, hơnĭh au apĭnh tơlĕch ăn hlŏh 400 ti hlak jên vă răt pôk tơmam drăm ăn rim Yă Mĕ Việt Nam nuih mơng, ŭnh hnam bơngai lôch dŏng tĕh đak, ƀô̆ đô̆i jĭ rơka. Pơgê năr 15/6, tơ̆ Hà Nội, Khŭl Tơgŭm djru ŭnh hnam đei bơngai lôch plang ăn tĕh đak Việt Nam pơgơ̆r pơm lêh tơlĕch tơdrong jang nhăn tin “Ƀlŏk hơdơ̆r ƀô̆ đô̆i lôch dŏng tĕh đak 2022”. Hăm chư chĭh TALS pơtrŭh ăn kơsô̆ 1400, lơ̆m mĭnh tin nhăn đei pơtrŭh ăn gô tơgŭm djru 20.000 hlak jên Ƀlŏk hơdơ̆r ƀô̆ đô̆i lôch dŏng tĕh đak 2022. Khei ‘năr jang kiơ̆ đơ̆ng năr 15/6 trŭh đĭ năr 13/8/2022. Tơdrong jang au băt tơbăt jơhngơ̆m đon ‘mêm kơ eng, hôn bơnê kơtang kơ tơdrong joăt “Nhă đak chăm kơtu”, “Ƀlŏk hơdơ̆r ‘mêm mơnat” păng jing jơhngơ̆m đon ‘lơ̆ng hơ iă kơ hơdrĕch hơdrung bơ̆n. ‘Nau jei jing tơdrong tơgŭm djru ‘lơ̆ng hơ iă hlŏh hăm ŭnh hnam đei bơngai lôch dŏng ăn tĕh đak.

Tơblơ̆ nơ̆r: Amazưt