Truh dang ei, hô sơ trong vă pơjing Khôi luơt Groi teh (hơmet ming) hlôi hơmet pơ ‘lơ̆ng, tôm tong kiơ̆ Tơdrong tơchơ̆t 18 đơ̆ng Trung ương, ‘moi kiơ̆ kơ jăp Khôi luơ̆t tơm teh đak, tơdrong tơchơ̆t đơ̆ng Đảng păng dôm tơdrong jang khôi luơ̆t hrei au đei.

Iung pơma tơ̆ hop akŏm, Kơdră chĕp pơgơ̆r Kuô̆k hô̆i Vương Đình Huệ athei akŏm lơ̆m dôm tơdrong oei đei nơ̆r tơgop phara dih băl nhen: iŏk tơvih teh vă ming man hnam oei mơdro sa, tơdrong vă jang kăl hnam oei mơdro sa, tĕch mơdro; Trong pơkăp sơkơ̆t hơdăh kơjă, tơdrong gơ̆h jang, hơnăp jang cha rơih trong sơkơ̆t hơdăh kơjă; Tơdrong jang pơjing Hơnih teh ăn jang au to, hơnih jang atŏk tơ iung teh, tơplih iŏk yua teh. Kơdră chĕp pơgơ̆r Kuô̆k hô̆i pơma hơdăh dôm tơdrong au kăl đei chă tơchĕng hơlen mă brĕ hơdrol pơtruh ăn Kuô̆k hô̆i lăng hơlen, pơdrơng kiơ̆ Khôi luơ̆t Groi teh (hơmet ming) tơ̆ ‘Măng hop akom hăt hot ‘măng mă 5.

Găh trong vă pơjing Khôi luơ̆t Rim hơnih mong jên ăn tŏk iŏk (hơmet ming), Kơdră chĕp pơgơ̆r Kuô̆k hô̆i pơma hơdăh ‘nau jei tơdrong vă pơjing Khôi luơ̆t gĭt kăl, đei ƀơm truh găh jên hu, sơđơ̆ng mŭk drăm, sơđơ̆ng dơ̆ng kơjăp, tơdrong jang jên hu lơ̆m teh đak. Athei hơnơ̆ng pơm pơkeh trong vă pơjing Khôi luơ̆t vă sơđơ̆ng trŏ lăp trong vă pơjing Khôi luơ̆t pơdrơ̆ng kiơ̆ ‘lơ̆ng hơ iă hloh, trŏ lăp hăm tơdrong jang khôi luơ̆t nhen Khôi luơ̆t tơm hinh sư̆, Khôi luơ̆t xek tơlang, khôi luơ̆t vei lăng thuê̆ ... păng trŏ lăp hăm tơdrong ‘meh vă yan au, hơmet ming dơ̆ng hơnih jang ăn tŏk iŏk jên păng hơnih mong jên.

Ăn tơgop nơ̆r găh trong vă pơjing tơdrong Tơchơ̆t găh mĭnh ƀar trong jang gĭt kăl vă hơmet pơ ‘lơ̆ng tơnap tap, tơhlăk tơhlĭn, hơtŏk kơtang jang kiơ̆ rim Tơdrong jang tơm Teh đak, Hơnih bơ̆ jang Kuô̆k hô̆i drơ̆ng nơ̆r lăp đon găh tơdrong kăl hloh kơ tơdrong pơjing đei trong jang kăl ‘noh iŏk đơ̆ng dôm tơdrong đei ƀôh yan au vă hơmet pơ ‘lơ̆ng tơnap tap, tơhlăk tơhlĭn lơ̆m tơlĕch jang kiơ̆ rim Tơdrong jang tơm Teh đak vă atŏk kơtang iung jang tĕnh koăng, jơnei kơ rim tơdrong jang au lơ̆m khei năr kơnh. Kơ iĕng Kơdră chĕp pơgơ̆r Kuô̆k hô̆i Nguyễn Khắc Định athei: "Tơdrong tơchơ̆t ‘noh hơmet pơ ‘lơ̆ng rim tơdrong, hơmet pơ ‘lơ̆ng tơnap tap păng hơtŏk kơtang iung jang keh đang tĕnh koăng. Kơ yuơ lơ loh kăl akŏm hơmet pơ ‘lơ̆ng păng hơtŏk kơtang. Mă blŭng, hlôi hơmet pơ ‘lơ̆ng ‘noh ‘nĕ pă pơm tơnap tap dơ̆ng. Mă ƀar, hlôi hơtŏk kơtang lei ‘nĕ pơjing dơ̆ng rim trong tơlĕch jang pơm ăn hiơ̆ hyĭn, tơtok kơtang, tơhiong jơ ‘năr lơ, truh po đơ̆ng rŏng pơm ăn ưh kơ jăh keh đang. Athei iung jang kiơ̆ kơjăp Tơdrong tơchơ̆t 98, Tơdrong tơchơ̆t 100. Hơnăn kơđeh đĕch păng jei drơ̆ng mĭnh nơ̆r ưh kơ krao ‘nŏh Tơdrong tơchơ̆t jang pơlong năng. Kơ yuơ dôm trong iung jang ‘noh jĭ đĭ jang pơlong năng bơih, đei pơkăp hơdăh khei ‘năr, đei tơdrong vă jang kiơ̆ păng tơdrong jang au lăp lơ̆m hloh 1 sơnăm, vă jê̆ 2 sơnăm dơ̆ng".

Kơdră chĕp pơgơ̆r Kuô̆k hô̆i Vương Đình Huệ lăng kơjăp tơdrong pơjao jang, pơjao gơ̆h jang ăn kơdră apŭng lơ̆m jang kiơ̆ rim Tơdrong jang tơm Teh đak. Mă lei, khei ‘năr jang kiơ̆ kăl hơlen mă brĕ, ‘măn ăn tơ iung pơjing trong jang păng pơgơ̆r jang kiơ̆ lơ̆m jăl jang kơnh: "Tơdăh pơjao ăn apŭng mă dang ei jang kiơ̆ ưh kơ ‘lơ̆ng hloi, adoi ưh kơ iŏk đei jơnei yă kiơ ăn bơ̆ jang tơ iung pơjing trong vă jang lơ̆m Tơdrong jang kơ khei năr kơnh lei bơ̆n chih tơmơ̆t tơdrong au lơ̆m Tơdrong tơchơ̆t kơ Kuô̆k hô̆i păng mưh kĭ tơchơ̆t rim tơdrong jang tơm teh đak kơ jăl đơ̆ng rŏnh kơnh. Găh tơdrong đei hơmet pơ ‘lơ̆ng dôm tơdrong ƀơ̆t măt dăh mă đei hloi iŏk yua ‘lơ̆ng hơ iă ‘nŏh trong tơlĕch jang kiơ̆ hloi hơmet ming trong bơ̆ jang vă rim hơnih bơ̆ jang kơ Khul kơdră chĕp pơgơ̆r teh đak mưh pơjing tơdrong vă jang ‘noh bơ̆n gô chă pơma dơnuh hơlen ƀơ̆t dŏh kơnh. Lơ loh gô pha ƀiơ̆ hăm rim trong pơkăp, trong tơlĕch jang".

Tơ̆ hop akŏm, Kơ iĕng Thủ tướng Trần Lưu Quang tơbăt: Khul kơdră chĕp pơgơ̆r Teh đak gô jang keh đang rim tơdrong jang uơ oei, trŏ lăp hăm rim tơdrong ‘meh vă tơlĕch ăn lơ̆m khei năr hrôih hloh: "Mă blŭng ‘noh hơpơi ‘meh vă rim ‘nu bơ̆n hơnơ̆ng tơgum djru vă pơtôch hop akŏm ‘măng mă au bơ̆n đei mĭnh trong jang hơmet pơ ‘lơ̆ng vă tơdrong jang au hơnơ̆ng đei jang kiơ̆ păng kĕ jang keh đang ƀlep hăm nơ̆r pơkă. Mă ƀar, ‘meh vă tơchơ̆t hơmet pơ ‘lơ̆ng truh tơ̆p truh troch, tơdăh ưh kơnh gô chă pơtho ăn lơ hloh dơ̆ng păng gô tơjră muh măt hăm dôm tơdrong tơnap tap anai. Mă pêng, tơdrong yă kiơ tim mă hơdăh ‘noh bơ̆n vang hơmet pơ ‘lơ̆ng, pơjing rơvơn đei kĭ tơchơ̆t lơ̆m khei năr truh vă hơnơ̆ng hơmet pơ ‘lơ̆ng mă keh đang tơdrong jang kiơ̆ 3 Tơdrong jang tơm au".

Tơ̆ ‘măng hop akŏm mă 29, Hơih bơ̆ jang Kuô̆k hô̆i jei ăn tơgop nơ̆r găh tơmơ̆t dơ̆ng Trong pơprŏ tơmơ̆t jên jang kơ teh đak hăm kon jên bơ̆ jang Trung ương jăl jang 2021-2025 đơ̆ng kon jên răk hơtŏ hăm kon jên iŏk đei lơ, pơkom kon jên jang Trung ương sơnăm 2022 ăn rim tơdrong jang, tơdrong vă jang teh đak tơmơ̆t jên jang păng tơmơ̆t dơ̆ng Trong pơprŏ tơmơ̆t jên jang ăn Grŭp jang ŭnh hơyuh Việt Nam đơ̆ng kon jên mong răk kơ Trong pơprŏ jang Tơmơ̆t jên jang teh đak đunh păh ai.