Kơdră chĕp pơgơ̆r Kuô̆k hô̆i Trần Thanh Mẫn hơlen: “măng mă 1 kơ ‘Măng hop akŏm hlôi jơnei; đei bơngai tăh hla păng kon pơlei lăng ba kơjăp. Bơ̆ jang pôk hơtŏk khul kơdră hlôi jang keh đang tơtom, ƀlep hăm tơdrong tơchơ̆t hăm kơphĭu pôk tơmơ̆t lơ. Tơdrong chă pơma dơnuh lơ̆m hnam hop akŏm, lơ̆m khul păng ‘măng pơgơ̆r apĭnh jet ‘lơ̆ng hơ iă, trŏ lăp hloh. Lơ kơdră tang măt đei iung pơma, lơ nơ̆r tơgop trŏ lăp hơnăp jang ‘lơ̆ng, tơƀôh ăn lơ trong jang vă tơgŭm ăn trong bơ̆ jang chĕp pơgơ̆r mŭk drăm-tơpôl, sơđơ̆ng teh đak-sơđơng tơpôl đơ̆ng Khul kơdră Teh đak, rim hơnih tơm, hơnih bơ̆ jang.

Tơ̆ ‘măng hop akŏm mă 34, Hơnih bơ̆ jang chĕp pơgơ̆r Kuô̆k hô̆i lăng hơlen tôch brĕ păng tơƀôh hơdăh trong trŏ lăp kơ tơdrong vă jang, trong pơprŏ ayơ hlôi sơđơ̆ng đei tôm rơvơn vă Kuô̆k hô̆i pơdrơ̆ng lơ̆m ‘măng hop akŏm mă 2, mă kăl dôm tơdrong vă jang đei ƀơm truh kơtang nhen Khôi luơ̆t Ƀao hiêm tơpôl (hơmet ming) păng rim tơdrong vă jang, trong pơprŏ vă jang pơtruh ăn Kuô̆k hô̆i pơdrơ̆ng nơ̆r kiơ̆ ƀlep trong jang lơ̆m 1 ‘măng hop akŏm (nhein: Pơprŏ jang cham char đak dơsĭ teh đak; Khôi luơ̆t Ve lăng, iŏk yua ƀrơ̆m phao kơtoang, tơmam đôh păng tơmam tơgŭm ăn (hơmet ming); rim tơdrong tơchơ̆t jang pơlong năng trong jang kăl ăn dêh char Nghệ An, pơlei tơm Đà Nẵng. Ƀok Trần Thanh Mẫn, kơdră chĕp pơgơ̆r Kuô̆k hô̆i athei Hơnih bơ̆ jang chĕp pơgơ̆r Kuô̆k hô̆i akŏm lơ̆m tơdrong hlôi đei tơmơ̆t dơ̆ng lơ̆m Tơdrong jang tơ iung pơjing khôi luơ̆t, Khôi luơ̆t tơm teh đak sơnăm  2024: "Khôi luơ̆t hơmet 4 Khôi luơ̆t ‘noh: Khôi luơ̆t hơmet ming, tơmơ̆t dơ̆ng mĭnh ƀar apăng Khôi luơ̆t Groi teh; Khôi luơ̆t Hnam oei, Khôi luơ̆t Tĕch mơdro hnam teh; Khôi luơ̆t hơnih jang mong jên ăn tŏk iŏk jên păng Tơdrong Tơchơ̆t kơ Kuô̆k hô̆i găh tơjur thuê̆ kơjă tĕch răt. Dôm tơdrong ayơ hơnih gơ̆h jang tơlĕch ăn jang ‘noh kăl hơdrin đĭ ai iung jang hơmet pơ ‘lơ̆ng tơnap tap, tơhlăk tơhlĭn".

Hơnih bơ̆ jang chĕp pơgơ̆r Kuô̆k hôi ăn tơgop nơ̆r trong vă pơjing Khôi luơ̆t vei lăng sơđơ̆ng trong nơnăm. Kơdră chĕp pơgơ̆r Hơnih bơ̆ jang vei lăng Sơđơ̆ng teh đak păng Sơđơ̆ng dơ̆ng kơjăp kơ Kuô̆k hô̆i Lê Tấn Tới pơma hơdăh: năr 22/5, Kuô̆k hô̆i hlôi pơma dơnuh tơ̆ Hnam hop akŏm găh trong vă pơjing Khôi luơ̆t vei lăng sơđơ̆ng trong nơnăm. Găh lơ rim nơ̆r tơgop jei lăp đon hăm trong vă pơjing Khôi luơ̆t vei lăng sơđơ̆ng trong nơnăm hlôi tơgoăt iok, hơmet ming. Mă kăl, Kơdră chĕp pơgơ̆r Hơnih bơ̆ jang vei lăng sơđơ̆ng teh đak pơma hơdăh: ‘Moi kiơ̆ dôm tơdrong yan ou đei ƀôh khei năr ou ki, athei Hơnih bơ̆ jang chĕp pơgơ̆r Kuô̆k hô̆i asong tơmơ̆t dơ̆ng tơdrong tơchơ̆t: “Gre ôtô chơ hŏk tro, hơ ioh mâm non dăh mă gre ôtô chă chơ tơmoi iok jang chơ ba hŏk tro, hơ ioh mâm non” tơmơ̆t lơ̆m Apăng 46 kơ trong vă pơjing Khôi luơ̆t. Kơ iĕng Kơdră chĕp pơgơ̆r Kuô̆k hô̆i Nguyễn Khắc Định pơma hơdăh:"Gre chơ hok tro kăl đei pơkăp hơdrô̆, pơm lơ liơ vă bơngai vei lăng, bơngai vơ̆r jur mưh lơ̆m gre pă đei mĭnh ‘nu bơngai ayơ bơih. Bơ̆n kăl tơroi tơbăt tơdrong ou mă kơtang hloh dơ̆ng, vei lăng mă kơjăp hloh dơ̆ng, iung jang dăr lăng hơlen mă brĕ vă dôm gre pă gan ‘lơ̆ng ƀlep tơdrong pơkăp ‘lơ̆ng pă đei iok yua chă chơ đe hŏk tro bơih."

Tơbăt jơhngơ̆m đon lăp đon kơtang hăm tơdrong tơchơ̆t tôch kơhret hăm gre ôtô chơ hŏk tro, hơ ioh, sơđơ̆ng trong nơnăm hăm bơ̆ jang chă chơ ba hơ ioh mâm non, hŏk tro hăm gre ôtô, Tổng Thư ký Quốc hội Bùi Văn Cường akhan: ‘Ngoăih tơdrong pơkăp hăm gre ôtô, oei pơkăp hăm bơngai vơ̆r gre, bơngai vei lăng gre, hnam trương pơtho pơhrăm ... Mă kăl, gre chơ đe hŏk tro jăl kơđeh, đe hơ ioh mâm non lei kăl đei giơng tơ oei trŏ lăp hăm đe hơ ioh ou, păng kăl pơm hơdăh pơjao ăn hơnih bơ̆ jang ayơ sơkơ̆t hơdăh vă mă tôm tong hloh trŏ lăp hloh: "Apăng 70 Khôi luơ̆t Trong nơnăm tơchơ̆t đei 2 kơ loăi gre chơ ba hŏk tro ‘noh hnam trương pơtho pơhrăm; păng hơnih mơdro sa, athei khôi luơ̆t ou ưh khan lăp tơchơ̆t hơnăp jang kơ hnam trương pơtho pơhrăm mă lei oei tơchơ̆t hăm hơnih mơdro sa jang găh gre chơ ba hŏk tro hăm gre jei kăl đei hơnăp jang kơtang lơ̆m tơdrong ou".

Jei tơ̆ hop akŏm ou, Hơnih bơ̆ jang chĕp pơgơ̆r Kuô̆k hô̆i ăn tơgop nơ̆r găh tơdrong tơblang hơdăh, tơgoăt iok, hơmet ming trong vă pơjing Khôi luơ̆t Hơnih tơm (Hơmet ming) păng ăn tơgop nơ̆r găh Trong pơprŏ Hơnih tơm Hà Nội jăl jang 2021 - 2030, lăng truh sơnăm 2050 păng Hơmet ming Trong pơprŏ jang Hơnih tơm Hà Nội truh sơnăm 2045, lăng truh sơnăm 2065.