VOV4.Bahnar - Giĕng âu ki, tơ̆ Hnam Kuôk hô̆i,hlôi pơ gơ̆r Hop akŏm ‘măng mă 9 kơ Anih pơ gơ̆r Kuôk hô̆i. ‘Măng hop akŏm ‘măng âu đei klăih song pơm 2 ‘măng hăm akŏp jơ năr bơ̆ jang 7 năr 1 puăt. Kăl kơ lăng truh, tơ̆ ‘măng hop akŏm âu, Anih pơ gơ̆r Kuôk hô̆i ‘măn 1 năr bơ̆ jang vă pơ gơ̆r apĭnh jet păng tơl nơ̆r apĭnh jet đơ̆ng bơ ngai tang măt Kuôk hô̆i hăm 2 ‘nu kơ dră jang lơ̆m Khŭl Kơ dră teh đak. Đơ̆ng rŏng ‘măng pơ gơ̆r, giĕng âu ki, Anih pơ gơ̆r Kuôk hô̆i ăn tơ gop nơ̆r lơ̆m hla ar chih ming khôi luơ̆t tơ proh, hla ar set hơ len, tơ chơ̆t ba bơ ngai dư ma túy đơ̆ng tôm 12 sơ năm truh hơ la 18 sơ năm tnăm tơ̆ anih hơ met dư pơ gŏ; păng 1,2 tơ drong tơm gĭt kăl nai.

Pơ ma pơ gơ̆r blŭng a ‘măng Hop akŏm, Kơ dră Kuôk hô̆i Vương Đình Huệ tơ băt: Anih pơ gơ̆r Kuôk hô̆i hlôi jang kiơ̆ trong jang păng apĭnh tơ gop nơ̆r 6 grŭp tơ drong. Lăng kiơ̆ lơ̆m kơ phiê̆u drơ̆ng kiơ̆ hlôi tơ chơ̆t 2 grŭp tơ drong apĭnh jet Kơ dră Anih tơm vei lăng kơ măy kơ mŏk mơ dro sa Nguyễn Hồng Diên păng Kơ dră Anih tơm vei lăng tơ mam drăm păng cham char Trần Hồng Hà. Tơ drong tơm apĭnh jet Kơ dră Anih tơm vei lăng găh kơ măy kơ mŏk mơ dro sa akŏm găh tơ drong pơm tơ lĕch, tĕch mơ dro đak xăn đak dâu; tơ drong jang hơ met ming kơ jă đak xăng khei ‘năr âu ki. Tơ drong jang vei lăng anih tĕch mơ dro, tang găn tĕch mơ dro ôn, tơ mam ya, tơ mam ưh kơ ‘lơ̆ng, tơ mam ưh kơ băt đơ̆ng yơ pơm tơ lĕch... Kơ dră Anih tơm vei lăng găh tơ mam drăm păng cham char Trần Hồng Hà tơl nơ̆r găh tơ drong jang kiơ̆ tơ chơ̆t păng dăr hơ len tơ drong jang đơ̆ng Kuôk hô̆i ƀơm truh chĕng hơ met, vei lăng, iŏk yua teh tơ̆ anih kơ drơ̆m. Hơ năp jang păng trong jang tang găn tơ drong iŏk yua tơ drong kla kơ jă lơ̆m dôm ‘măng pơ ting răt teh hăm kơ jă măk hloh kơ anih tĕch mơ dro vă hơ tŏk kơ jă teh dôm tơ ring tơ jê̆ tŏk măk vă sa yua ăn kơ dih. Kơ dră Kuôk hô̆i Vương Đình Huệ tơ roi:

        “Kŭm hăm tơ drong tơ lĕch jang, dăr hơ len tơ drong jang tih kơ Kuôk hô̆i păng Anih pơ gơ̆r Kuôk hô̆i ‘noh dôm tơ drong tơ plih ‘lơ̆ng đơ̆ng tơ drong jang apĭnh jet tơl nơ̆r apĭnh jet hlôi sơ kơ̆t hơ dăh ‘nâu jĭ tơ drong jang dăr hơ len kơ tă, đei yua đơ̆ng Kuôk hô̆i, tơ gop păr ang tơ drong hơ iă bơ̆ jang hơ gei lơ̆m hơ drin tơ plih ‘nao bơ̆ jang dăr hơ len păng pơm ăn tơ drong jang đơ̆ng Kuôk hô̆i, jang kiơ̆ yan âu păng tơ drong hơ iă đơ̆ng tơ drong arih; pơm lăp đei ‘meh vă đơ̆ng kon pơ lei păng đơ̆ng bơ ngai tăh hla athei pơ jing teh đak chĕp kơ̆l kiơ̆ khôi luơ̆t xã hội chủ nghĩa đơ̆ng kon pơ lei, yua đơ̆ng kon pơ lei păng yua kơ kon pơ lei”.

        ‘Măng apĭnh jet tơ chĕng hơ drol pơ gơ̆r lơ̆m ‘năr 16/3, đei pơ gơ̆r tơ̆ Hnam hop akŏm Diên Hồng, Hnam Kuôk hô̆i păng pơ dăh ti vi kơ tă hăm 63 Khŭl bơ ngai tang măt Kuôk hô̆i păng đei pơ dăh ti vi kơ tă vă lơ lap bơ ngai tăh hla păng kon pơ lei răp lăng.

Kŭm lơ̆m giĕng âu ki, đơ̆ng rŏng lêh pơ gơ̆r  blŭng a ‘măng hop akŏm mă 9, Anih pơ gơ̆r Kuôk hô̆i hlôi drơ̆ng nơ̆r hăm tơ drong kăl tơ lĕch Khôi luơ̆t găh tơ proh, hla ar set hơ len, tơ chơ̆t ba bơ ngai dư ma túy đơ̆ng tôm 12 sơ năm truh hơ la kơ 18 sơ năm mơ̆t tơ̆ hơ nih hơ met dư pơ gŏ lơ̆m dôm bơ ngai dư ma tuý ưh kơ chih măt, ưh kơ pơm kiơ̆ dăh mă pơ dơh kơ dih hơ met dư ma tuý; bơ ngai dư ma tuý lơ̆m khei ‘năr hơ met dư ma tuý kơ dih đei chă ƀôh yua glăi kơ chơ̆t ma tuý; bơ ngai dư ma tuý dôm kơ chơ̆t kơ loăi hơ̆t phiên ưh kơ đei chih măt, ưh kơ pơm kiơ̆ dăh mă pơ dơh kơ dih hơ met dư.

Kơ dră Kuôk hô̆i Vương Đình Huệ

 Mă lei, kiơ̆ dôm bơ ngai tang măt, bơ ngai đei hơ met ming đơ̆ng hla ar chih ming khôi luơ̆t ‘noh bơ ngai dư ma túy đơ̆ng tôm 12 sơ năm truh 18 sơ năm păng tơ drong ba đe sư mơ̆t tơ̆ hơ nih hơ met dư pơ gŏ ưh kơ sĭ trong phak hành chính, kơ na kăl tơ ƀôh tơ drong hơ drô̆ âu, pơm hla ar hiôk păng vei sơ đơ̆ng đei yua ‘lơ̆ng hloh đơ̆ng bơ ngai đei athei. Kơ dră Anih vei lăng khŭl linh – vei sơ đơ̆ng kơ Kuôk hô̆i  Lê Tấn Tới tơ roi:

        “Đei dôm bơ ngai thông mang hoang đai, vă chih hla ar hla sơ găh ŭnh hnam, hơ năn, năr rơ neh, sơ năm tôch kơ mơ mat, pơ ma kiơ truh tơ drong pơm glăi đơ̆ng bơ ngai hơ la kơ 18 sơ năm. Ĭnh bơ ngơ̆t yan âu, ƀơ̆t tŏk bŏk pơm hla ar hô sơ, băt hơ dăh bơ ngai năm hơ met dư, đe sư tơ roi “ kon ĭnh pơm hla ar hơ met dư kơ dih” ‘noh athei thoi noh hiong jơ năr đĕch. ‘Nâu jing tơ drong ưh kơ ‘lơ̆ng lơ̆m yan âu vă dôm bơ ngai iŏk yua”.

        Tơ̆ ‘măng hop akŏm, phŏ kơ dră Anih tơm vei lăng găh jang pơ gang Trần Văn Thuấn akhan; dư ma túy ‘noh tơ drong jĭ đunh đơ̆ng ‘ngok đei WHO akhan ‘noh tơ drong jĭ đunh tam mă đei pơ gang hơ met klăih. Anih tơm vei lăng găh jang pơ gang drơ̆ng nơ̆r tơ mơ̆t dơ̆ng bơ ngai ưh kơ chih măt hơ met dư kơ dih kiơ̆ tơ drong hơ găt đơ̆ng khôi luơ̆t mă lơ̆m kơ plăh anih sek tơ lang set hơ len tơ chơ̆t ba mơ̆t lơ̆m anih hơ met dư pơ gŏ, dăh mă mĕ ƀă bơ ngai vei lăng bơ ngai dư chih măt hơ met dư ma túy kơ dih.

Lơ̆m ‘măng mă 1 âu, Anih pơ gơ̆r Kuôk hô̆i oei ăn tơ gop nơ̆r găh hla ar tơ roi tơ băt pơ tôch yak blŭng đơ̆ng khŭl dăr hơ len tơ drong jang găh tơ drong proh hơ met dôm anih jang hành chính tơ̆ apŭng, tơ̆ xăh lơ̆m jăl jang 2019-2021”. Tơ roi tơ băt pơ tôch yak blŭng đơ̆ng khŭl dăr hơ len tơ drong jang “ Tơ drong bơ̆ jang kiơ̆ khôi luơ̆t găh sơng kon pơ lei păng hơ met pơ ‘lơ̆ng hla ar tơ kêng đơ̆ng ‘năr 1-7-2016 truh ‘năr 1-7-2021”.

Hơ dai hăm ‘noh, tơ̆ ‘măng hop akŏm âu, Anih pơ gơ̆r Kuôk hô̆i oei ăn tơ gop nơ̆r găh hla ar tơ roi tơ băt đơ̆ng Khŭl kơ dră teh đak găh pơ tôch, hơ len lăng đĭ đăng tơ drong jang kiơ̆ trong jang tơ mơ̆t jene jang ming man trong Hồ Chí Minh; set hơ len tơ drong tơ mơ̆t dơ̆ng jên jên jang teh đak jên tơ gŭm ưh kơ pơ drĕo dơ̆ng đơ̆ng teh đak đe; tơ drong pơ dui đunh khei ‘năr jang kiơ̆ păng tơ lĕch jên tơ mơ̆t jang  đơ̆ng jên jang trung ương sơ năm 2021 truh sơ năm 2022; ăn tơ gop nơ̆r găh tơ drong tơ chĕng vă jang tơ mơ̆t jên jang păh lăp khei ‘năr jăl jang 2021-2025 ăn rim tơ drong jang, dôm jên tam mă klăih song ăn..

                                                                                                VOV 1

Thuem: Tơ blơ̆