Kŭm hăm lơ̆m teh đak, ‘măng pơlong tốt nghiệp hŏk jăl 3 sơnăm 2024, pơgơ̆r đơ̆ng ‘năr 26- 29/6 dêh char Đắk Lắk đei vă jê̆ 21.000 ‘nu hŏk tro vang pơlong tơ̆ 33 hơnih pơlong hăm hloh 870 lăm pơlong tơ̆ đĭ đăng dôm apŭng, thị xăh, pơlei tơm. Hloh 2.000 kang ƀô̆, thây kô pơtho lăng pơlong, dăr hơlen păng pơvih pơvăn tơ̆ dôm hơnih pơlong. Truh jơ ‘năr âu, Đắk Lắk hlôi hơmet tôm pơgơ̆r ‘măng pơlong kiơ̆ trong tơlĕch jang păng tơdrong hơgăt đơ̆ng Anih tơm vei lăng găh pơtho pơhrăm tơlĕch ăn, yak truh 1 ‘măng pơlong sơđơ̆ng, ‘lơ̆ng, đei iŏk điểm lơ.

Tơdrong jang tang găn jĭ, pơm rơgoh cham char, vei rơgoh ‘lơ̆ng tơmam sa, tơgŭm pơyan pơlong, tơgŭm hŏk tro, bơngai ŭnh hnam hŏk tro, kŭm đei Khŭl pơgơ̆r ‘măng pơlong rim tơring tơlĕch jang păng đei trong jang đơ̆ng hrôih lơ̆m jang hơdai bơ̆jang kiơ̆. Tơdrong vei sơđơ̆ng ‘măng pơlong đei tôch kơ bơngơ̆t truh. Kiơ̆ kơ Đại tá Nguyễn Hữu Lương, kơdră Anih vei lăng tơdrong sơđơ̆ng Chĭnh trĭ kơdih (PA03), Kŏng an dêh char Đắk Lắk, anih jang kŏng an iŏk đơ̆ng hrôih hlôi pơjing trong tơlĕch jang hơdai kơjăp hăm dôm anih jang kơchăng lơ̆m dôm trong jang vei sơđơ̆ng ăn ‘măng pơlong.