Kơdră chĕp pơgơ̆r Kuô̆k hô̆i Vương Đình Huệ sơkơ̆t hơdăh rim tơdrong tơchơ̆t đơ̆ng Kuô̆k hô̆i jei lăng kon pơlei păng hơnih mơdro sa ‘nŏh tơm hloh. Kŏng nhân păng bơngai jang ‘nŏh tơ-‘ngla kăl hloh lơ̆m tơdrong tơgoăt jang ‘lơ̆ng hơ iă, sơđơ̆ng păng gơh hơgei, jing dôm khul hơmet ming kơ rim trong jang khôi luơ̆t.

Tơdrong Kuô̆k hô̆i, Khul kơdră chĕp pơgơ̆r Kuô̆k hô̆i, rim hơnih bơ̆ jang đei ƀơm truh đei rơvơn tơƀơ̆p, chă mơ̆ng jơhngơ̆m đon hơpơi ‘mĕh vă đơ̆ng bơngai jang vă roi năr roi pơm pơkeh trong jang khôi luơ̆t ‘nŏh jĭ kăl hlŏh.“Nhôn lăng ‘nau jing ‘măng tơƀơ̆p pơma dơnuh hăm bơngai tăh hla gĭt kăl, vă tơƀơ̆p mơ̆ng păng pơma dơnuh hăm rim kang ƀô̆ kŏng đoàn, bơngai jang lơ̆m khul kŏng đoàn, bơngai jang tang măt ăn khul bơngai jang dang 50 triu ‘nu bơngai lơ̆m teh đak, ‘nau jing khul iung jang, choh jang sa, pơjing đei mŭk drăm ăn tơpôl păng tơgop gĭt kăl kơ tơdrong atŏk tơ iung mŭk drăm-tơpôl kơ teh đak; adoi ‘nau jei jing dôm bơngai đei ƀơm truh đơ̆ng tơdrong hơmet ming kơ rim khôi luơ̆t lơ̆m khôi luơ̆t tơm Việt Nam".

Pơma dơnuh tơ̆ hop akŏm, trong trong jang tơgŭm hnam oei ăn kŏng nhân ‘nŏh mĭnh lơ̆m dôm tơdrong mă kơdrơ̆m bơngai jang lăng kơjăp. ‘Nhŏng Nguyễn Việt Anh, bơngai jang lơ̆m Hơnih tơm Kŏng ty Bưu chính Viettel găh Grŭp jang bưu chính viễn thông Ƀô̆ đô̆i akhan:“Sơ̆, hnam oei tơpôl tôch kơ lơ, tơ̆ yơ đei Hơnih jang kmăi kmŏk pơm tơlĕch tơmam drăm, đei lơ kŏng nhân ‘nŏh tơ̆ noh đei hnam oei tơpôl. Mă lei truh dang ei, teh đak bơ̆n hlôi đei ƀôh ƀiơ̆ bơih, mă lei lơ hơnih jang kmăi kmŏk pơm tơlĕch tơmam drăm, kŏng nhân đei truh kơ hrĕng, kơ rơbau kŏng nhân. Tơdăh lăng lơ̆m hnam atŭm ‘nŏh dang ei tim mă tơgăl đei hnam oei sa atŭm. Kơna pơm ưh kơ ‘lơ̆ng truh bơngai jang”.

Tơl nơ̆r găh tơdrong au, Kơdră chĕp pơgơ̆r Kuô̆k hô̆i Vương Đình Huệ tơbăt, ‘nau jing tơdrong tim gan lăp ƀar păh lơ̆m jang kiơ̆ kmăi kmŏk gơ̆h hơgei. Đei tơring đei tơdrong jang, hơnih jang kmăi kmŏk pơm tơlĕch tơmam drăm lơ, mă lei ưh kơ đei hnam oei atŭm vă chă oei sa.“Tơdăh tơdrong atŏk tơ iung tơdrong jang tơ̆ tơring kơdrơ̆m tĕnh koăng hloh, lơ̆m tơring ‘nao iung jang oei hiơ hiơ̆ ƀiơ̆, lei gô ưh kơ lăp ‘nŏh ưh kơ đei trong tơgŭm găh hnam oei. Mă lei hơdrơ̆k dơ̆n, tơdăh bơ̆n druh kiơ̆ atŏk tơ iung tơring kơdrơ̆m hơdrol ‘nŏh đei hnam oei kơdrơ̆m mă lei pă bĭ bu oei, pơm đang mă lei pă bĭ bu oei. Hrei au, Khul kơdră Teh đak, Thủ tướng adoi nhen tŏk bŏk pơrô̆ kơtang tơ iung pơjing trong pơprŏ jang dêh char. Tơdrong pơprŏ tơring kơdrơ̆m, pơprŏ jang tơring choh jang sa, pơm lơ liơ vă trŏ lăp ăn ƀar tơdrong ‘nau”.

Jei tơ̆ hop akŏm au, bơngai jang hlôi apĭnh kơdră chĕp pơgơ̆r Kuô̆k hô̆i, Khul kơdră chĕp pơgơ̆r Teh đak, rim hơnih tơm đei ƀơm truh tơdrong rơgŏh tơmam drăm sa; rim tơdrong tơchơ̆t, tơdrong pơkăp, trong jang tơgŭm djru đei ƀơm truh tơdrong hơrih sa, jơhngơ̆m đon kơ bơngai jang, bơngai jang chĕp pơgơ̆r păng bơ̆ jang hơmet pơ ‘lơ̆ng trong tơgum djru; rim trong jang tơgŭm ăn hăm bơngai jang; găh tơdrong rơvơn jang sa, tơdrong sŏng sa lơ̆m jơ ‘năr jang. Kơdră chĕp pơgơ̆r Hơnih bơ̆ jang vei lăng Tơpôl kơ Kuô̆k hô̆i, Kơdră chĕp pơgơ̆r Hơnih bơ̆ jang Khoa hŏk păng Kmăi kmŏk, Kơdră chĕp pơgơ̆r Hơnih bơ̆ jang Khôi luơ̆t, Kơdră chĕp pơgơ̆r Hơnih tơm vei lăng jang pơgang; Kơdră chĕp pơgơ̆r Hơnih vei lăng Hnam trương pơtho pơhrăm hlôi tơl hơdăh dôm nơ̆r apĭnh đơ̆ng bơngai jang.

Iung pơma pơtôch hop akŏm, Kơdră chĕp pơgơ̆r Kuô̆k hô̆i Vương Đình Huệ hơlen, rim nơ̆r tơgop đơ̆ng đoàn viên, bơngai jang hlôi tơbăt trŏ ƀlep hăm dôm tơdrong hơrih sa, tơdrong jang, jơhngơ̆m đon, tơdrong lăng ba đơ̆ng đoàn viên, bơngai jang lơ̆m teh đak păng dôm tơdrong tim mă lăp lơ̆m jang kiơ̆ rim trong tơgŭm djru, khôi luơ̆t pơm ăn đoàn viên, kŏng nhân, bơngai jang oei mơsuơ̆l mơsoăl, tơtăm, chhŭr nuih, nhen găh tơdrong kơ tơdrong jang, jang sa iŏk đei, hơmet pơ ‘lơ̆ng tơdrong gơ̆h jang, trong tơgŭm djru đei hnam oei, găh tơdrong ƀao hiêm tơpôl, ƀao hiêm jang pơgang, trong tơgŭm djru kăl anai: “Tơdrong jơnei kơ Hop akŏm gô hơnơ̆ng sơkơ̆t hơdăh jơhngơ̆m đon hơnơ̆ng tơplih ‘nao, iung jang kơtang đơ̆ng Kuô̆k hô̆i kơ yuơ đei iŏk yua ăn Kon pơlei, ăn Khul kŏng nhân; adoi sơkơ̆t hơdăh sơnong jang kơtang đơ̆ng Khul Kŏng đoàn Việt Nam lơ̆m vang iung jang tơ iung pơjing Đảng, tơ iung pơjing khul kơdră chĕp pơgơ̆r. Bơ̆n lui akhan, hăm trong chĕp pơgơ̆r trŏ ƀlep, gơ̆h hơgei đơ̆ng Đảng, tơdrong iung jang hơdoi kơjăp, hơbĕch hơbăl păng iung jang kơtang đơ̆ng rim hơnih jang păng pơđĭ khul jang chinh trĭ, tơdrong tơgŭm djru, lăp đon, hơdrin păng kơrŭn đĭ ai đơ̆ng Kon pơlei, bơngai jang, khil hơnih mơdro sa, ưh kơ jor bơ̆n gô yak hloh tơnap tap, tơdrong long”.

Tơ̆ hop akŏm, Kơdră chĕp pơgơ̆r Kuô̆k hô̆i Vương Đình Huệ, rim Kơ iĕng Kơdră chĕp pơgơ̆r Kuô̆k hô̆u hlôi pôk tơmam drăm ăn 20 đoàn viên kŏng đoàn gơ̆h hơgei pran kơtang; đoàn viên, bơngai jang ŭnh hnam tơnap tap.