Tơdrong tơgŭm djru phe ăn ŭnh hnam vang pơtăm ‘long bri jang sa păng atŏk tơ iung bri ‘long tơ̆ dêh char Kon Tum hrei ou oei tim mă tơlĕch jang kiơ̆. ‘Nou tơdrong đei bơngai tang măt Jơnŭm vei lăng kon pơlei dêh char Kon Tum jăl XII lăng kơjăp, apĭnh hơlen tơ̆ ‘Măng hop akŏm mă 7 tŏk bŏk pơgơ̆r tơ̆ pơlei tơm Kon Tum. Bơngai tang măt Ka Ba Thành, Bĭ thư Đảng apŭng Tu Mrông tơbăt jơhngơ̆m đon ưh gan lăp, kơ yuơ tơdrong jang tơgŭm djru ou găh lơ̆m Tơdrong vă jang mă 3 Tơdrong jang tơm teh đak atŏk tơ iung mŭk drăm-tơpôl tơring kon kông păng groi kông, hrei ou dêh char tim mă tơlĕch jang kiơ̆:“Tơdrong tơgŭm ou jăl jang 2021- 2025 dang ei vă đĭ sơnăm 2024 bơih ‘noh dang yơ mă vă tơlĕch jang kiơ̆? Ĭnh apĭnh lăng ba kơjăp pơrô̆ jang kiơ̆ tơdrong ou vă kon pơlei kon kông păng ŭnh hnam bơngai Yuăn tơnap tap đei iŏk yoa sa hơpăh đơ̆ng tơdrong tơgŭm djru ou”.

        Sơnăm 2024 hơgăt teh tơgŭm djru pơtăm bri kơ dêh char Kon Tum kiơ̆ trong pơprŏ jang ‘noh 2.100 ha păng tơdrong ‘meh vă sơng iŏk tơgum djru phe ăn ŭnh hnam vang jang vei lăng năng tông, pơtăm bri ‘long ‘noh hloh 1.000 tân phe. Kiơ̆ đơ̆ng ƀok Nguyễn Hữu Tháp, Kơ iĕng Kơdră chĕp pơgơ̆r Hơnih vei lăng kon pơlei dêh char Kon Tum, tơdrong tơm pơm ăn tim mă tơlĕch jang kiơ̆ gơ̆h ‘noh tơhlăk tơhlĭn đei ƀơm truh tơdrong tơchơ̆t Apăng 22, tơdrong Tơchơ̆t kơsô̆ 12 năr 20/9/2022 đơ̆ng Hơnih tơm vei lăng Tơdrong jang păng Atŏk tơ iung Tơring tơrang:“Tơhlăk tơhlĭn tơ̆ ou ‘noh hrei ou tim mă đei tơdrong tơchơ̆t hơdăh vă sơkơ̆t hơdăh tơgŭm ăn phe kiơ̆ hơgăt teh, măt bơngai jang trŏ lăp hăm yan ou kơ tơring. Tim mă tơchơ̆t hơdăh găh Hơnih bơ̆ jang gơ̆h kĭ tơchơ̆t tơdrong vă jang ƀơk ăn phe vei lăng năng tông păng atŏk tơ iung bri. Tim mă đei tơchơ̆t hơnih ayơ gơ̆h jang tơbăt hơdăh kơjă phe lơ̆m dêh char, apŭng păng hơnih jang tơbăt hơdăh”.

Đei ƀơm truh rim tơdrong tơhlăk kơpal, đei băt dêh char Kon Tum hlôi chih pơtruh ăn lơ hla bơar tơbăt ăn rim Hơnih tơm, Hơnih jang Trung ương athei pơtho tơbăt trong hơmet pơ ‘lơ̆ng. Mă lei, truh dang ei rim hơnih Tơm, Hơnih jang Trung ương jei tim mă pơtho tơbăt hơdăh kơna dêh char tim mă tơlĕch jang kiơ̆ tơdrong jang tơgŭm djru phe ăn ŭnh hnam pơtăm bri jang sa păng pơtăm ‘long bri tĕch mơdro. Lơ nơ̆r tơgop đơ̆ng bơngai tang măt Jơnŭm vei lăng kon pơlei dêh char Kon Tum akhan, tơdrong bơ̆ jang tơgŭm djru hlôi đei mă lei hiơ hiơ̆ tơlĕch jang kiơ̆ tŏk bok pơm kơnê̆ truh trong tơlĕch jang atŏk tơ iung mŭk drăm-tơpôl adoi nhen tơdrong hơmet pơ ‘lơ̆ng hơrih sa ăn kon pơlei.

Jei tơ̆ ‘Măng hop akŏm kơ Jơnŭm vei lăng kon pơlei dêh char Kon Tum, tơdrong ŭnh hnam kon kông ưh kơ măh teh oei păng teh jang sa tŏk bŏk pơm ăn chă pơma dơnuh dih băl kơtang lơ̆m hop akŏm ou. Lơ nơ̆r tơgop đơ̆ng dôm bơngai tang măt akhan, đei tơdrong pleh ploh dih băl tôch kơtang ƀar păh tơbăt ăn păng tơdrong hơrih sa yan ou kơ kon pơlei. Kiơ̆ hla bơar tơbăt đơ̆ng Hơnih vei lăng kon pơlei dêh char Kon Tum, tơchĕng hơlou  lơ̆m 6 khei blŭng sơnăm 2024, ŭnh hnam kon kông lơ̆m dêh char đei teh oei păng teh jang sa jei truh 99,3%. Mă lei yă Phan Thị Thủy, Kơdră Hơnih vei lăng Joh ayŏ oei sa-Tơpôl oei drơ̆ng drơ̆t găh kơsô̆ chih jô̆ au hăm tơdrong tơpă yan ou kơ tơdrong hơrih sa kơ kon pơlei:“Tơpă yan ou đei ƀôh, lơ̆m mĭnh pơbŭng hnam đei 2, 3 ŭnh om hơrih sa hơdoi. Jei lăp chă jang sa, hơrih sa nông nôt đĕch kơ yuơ ưh kơ đei teh jang sa. Tơdrong mă ou jĭ đei tơpă. Kăl hơlen lơ liơ vă xek tơlang tơgŭm djru ƀiơ̆, tơdăh hơnơ̆ng druh kiơ̆ kơsô̆ chih jô̆ lei jei tơnap tơpă mơ̆n”.

Bơngai tang măt Jơnŭm vei lăng kon pơlei dêh char Kon Tum akhan, tơdrong xek tơlang tơdrong ưh kơ măh teh oei, teh jang sa ăn ŭnh hnam kon kông ưh khan lăp tơgŭm ŭnh hnam dơnuh sơđơ̆ng hơrih sa mă lei oei pơm hơtŏk jơhngơ̆m đon lui yom lơ̆m tơdrong chĕp pơgơ̆r kơ Đảng, Teh đak; tơgop sơđơ̆ng chinh trĭ, sơđơ̆ng tơpôl tơring kon kông, tơring sơlam teh đak kơ Teh đak. Kơ yuơ lơ loh, tơdrong jang kiơ̆ tơdrong tơgŭm djru ou kăl iung jantg mă brĕ, mă trŏ lăp hăm tơdrong yan ou. Bơngai tang măt Xiêng Thanh Phúc pơma hơdăh, ƀok ưh kơ lui lơ̆m kơsô̆ pơđĭ lơ̆m dêh char lăp oei vă jê̆ 1% ŭnh hnam kon kông ưh kơ măh teh oei păng teh choh jang sa:“Ĭnh ưh lơ lui lơ̆m kơsô̆ ou. Kiơ̆ kơ ĭnh ƀôh jĭ tim mă lăp, tim mă ƀlep tơpă. Kiơ̆ yan ou bơ̆n ƀôh tơring kon kông năm tơ̆ yơ jei ƀôh ưh kơ măh teh oei. Truh hloi pơlei Nông Nội, pơlei đei ƀôh hloh kơ tơring Đak Nông ‘noh oei đei lơ ŭnh hnam ưh kơ măh teh oei, teh jang sa. Kơ yuơ lơ loh kơna, kơsô̆ ou ưh kơ đei chih tơpăt ôh”.

Kơtơ̆ng ang đơ̆ng hơnih bơ̆ jang vei lăng tơdrong ou kơ dêh char Kon Tum đei ƀôh, hloh 20 sơnăm jang kiơ̆ trong bơ̆ jang tơgŭm djru đơ̆ng Đảng, Teh đak, dêh char hlôi tơgŭm djru teh oei păng teh choh jang sa ăn hloh 16.100 ŭnh hnam kon kông. Dang ei, lơ̆m dêh char oei đei vă jê̆ 3.900 ŭnh hnam kon kông ưh kơ măh, ưh kơ đei teh oei păng teh choh jang sa.