VOV4.Bahnar - Jang kiơ̆ trong jang tơjur thuê̆ kiơ̆ Tơdrong tơchơ̆t kơsô̆ 43 kơ Kuô̆k hô̆i găh tơgŭm djru hơmet pơ ‘lơ̆ng păng atŏk tơ iung mŭk drăm-tơpôl, đơ̆ng năr 1/2/2022, Kŏng ty hnam kmăi ŭnh hơyŭh Dak Nông hlôi tơlĕch trong jang tơjur 2% thuê̆ VAT hăm tơmoi iŏk yua ŭnh hơyŭh lơ̆m dêh char.

Bơngai jang PC Dak Nông pơtho tơbăt trong kla ăn kon jên iŏk yua ŭnh hơyŭh hăm điên thoăi.

Hăm tơjur thuê̆ đơ̆ng 10%  jur pă 8%. Kiơ̆ đơ̆ng PC Dak Nông, jô̆ hơtŏ lơ̆m 1 khei hơnĭh au tơlĕch đei hlŏh 165.000 hla bơar chĭh jên iŏk yua ŭnh hơyŭh điên tư ăn tơmoi iŏk yua ŭnh hơyŭh, akŏp kon jên tơjur thuê̆ VAT ‘nŏh hlŏh 20 ti hlak jên. Kon jên thuê̆ ‘nao gô đei hơnĭh jang ŭnh hơyŭh pơm kiơ̆ hơnơ̆ng prăt lơ̆m sơnăm 2022, hăm hơpơi ‘mĕh vă tơgŭm ăn tơmoi dă ƀiơ̆ tơhoach lơ kon jên iŏk yua ŭnh hơyŭh, tơgop jang kiơ̆ jơnei tơdrong jang hơmet pơ ‘lơ̆ng păng atŏk tơ iung mŭk drăm-tơpôl.

Tơblơ̆ nơ̆r: Amazưt